ਦੁਨੀਆਭਰ ਦੇ 6,000 ਜਹਾਜ਼ਾਂ 'ਚ ਸਾਫਟਵੇਅਰ ਬਦਲੇਗਾ ਏਅਰਬਸ, ਪ੍ਰਭਾਵਿਤ ਹੋ ਸਕਦੀਆਂ ਉਡਾਣਾਂ

ਡਿਜੀਟਲ ਡੈਸਕ, ਨਵੀਂ ਦਿੱਲੀ : ਬੀਤੇ ਦਿਨ ਕਈ ਏਅਰਲਾਈਨਜ਼ ਨੇ ਉਡਾਣਾਂ 'ਚ ਦੇਰੀ ਦਾ ਐਲਾਨ ਕੀਤਾ ਸੀ। ਪਰ, ਹੁਣ ਹਵਾਈ ਯਾਤਰਾ ਕਰਨ ਵਾਲੇ ਯਾਤਰੀਆਂ ਨੂੰ ਕਈ ਘੰਟਿਆਂ ਜਾਂ ਫਿਰ ਕਈ ਹਫ਼ਤਿਆਂ ਦਾ ਇੰਤਜ਼ਾਰ ਕਰਨਾ ਪੈ ਸਕਦਾ ਹੈ। ਏਅਰਬੱਸ ਨੇ 6000 ਤੋਂ ਵੱਧ ਜਹਾਜ਼ਾਂ 'ਚ ਅੱਪਡੇਟ ਦਾ ਐਲਾਨ ਕੀਤਾ ਹੈ। ਏਅਰਬੱਸ ਦੀ ਐਡਵਾਈਜ਼ਰੀ ਤੋਂ ਬਾਅਦ ਦੁਨੀਆ ਭਰ 'ਚ ਕਈ ਉਡਾਣਾਂ ਰੱਦ ਕਰ ਦਿੱਤੀਆਂ ਗਈਆਂ ਸਨ।

ਏਅਰ ਫਰਾਂਸ ਨੇ 35 ਜਦੋਂਕਿ ਜਾਪਾਨ ਦੀ ਏਅਰਲਾਈਨਜ਼ ਨੇ 65 ਫਲਾਈਟਾਂ ਰੱਦ ਕਰ ਦਿੱਤੀਆਂ। ਉੱਥੇ ਹੀ, ਭਾਰਤ 'ਚ ਏਅਰ ਇੰਡੀਆ ਅਤੇ ਇੰਡੀਗੋ ਨੇ ਵੀ ਇਸ ਨੂੰ ਲੈ ਕੇ ਐਡਵਾਈਜ਼ਰੀ ਜਾਰੀ ਕੀਤੀ ਹੈ।

ਏਅਰਬੱਸ ਨੇ A320 ਲਈ ਜਾਰੀ ਕੀਤੀ ਐਡਵਾਈਜ਼ਰੀ

ਏਅਰਬੱਸ ਨੇ A320 ਜਹਾਜ਼ਾਂ ਵਿੱਚ ਸਾਫਟਵੇਅਰ ਅੱਪਡੇਟ ਦਾ ਐਲਾਨ ਕੀਤਾ ਹੈ। ਅਸਲ ਵਿਚ ਪਿਛਲੇ ਸਾਲ ਜੈੱਟਬਲੂ ਦੀ ਉਡਾਣ 'ਚ ਤਕਨੀਕੀ ਖਰਾਬੀ ਦੇਖਣ ਨੂੰ ਮਿਲੀ ਸੀ। ਇਸਦਾ ਮੁਲਾਂਕਣ ਕਰਨ ਤੋਂ ਬਾਅਦ ਪਤਾ ਲੱਗਾ ਕਿ ਤੇਜ਼ ਸੋਲਰ ਰੇਡੀਏਸ਼ਨ ਦਾ ਅਸਰ ਜਹਾਜ਼ ਦੇ ਡੇਟਾ 'ਤੇ ਪੈ ਰਿਹਾ ਹੈ, ਜੋ ਖ਼ਤਰਾ ਸਾਬਤ ਹੋ ਸਕਦਾ ਹੈ।

1 ਹਫ਼ਤੇ ਦਾ ਲੱਗ ਸਕਦਾ ਹੈ ਸਮਾਂ

ਏਅਰਬੱਸ ਦੁਨੀਆ 'ਚ ਸੰਚਾਲਿਤ ਹੋਣ ਵਾਲੇ 6000 ਤੋਂ ਵੱਧ ਜਹਾਜ਼ਾਂ 'ਚ ਨਵਾਂ ਸਾਫਟਵੇਅਰ ਅੱਪਡੇਟ ਕੀਤਾ ਜਾਵੇਗਾ। ਜ਼ਿਆਦਾਤਰ ਜਹਾਜ਼ਾਂ 'ਚ ਇਹ ਪ੍ਰਕਿਰਿਆ ਕੁਝ ਘੰਟਿਆਂ 'ਚ ਪੂਰੀ ਹੋਣ ਦਾ ਅਨੁਮਾਨ ਹੈ। ਹਾਲਾਂਕਿ, ਲਗਪਗ 1000 ਜਹਾਜ਼ਾਂ ਵਿੱਚ ਹਫ਼ਤੇ ਭਰ ਦਾ ਸਮਾਂ ਵੀ ਲੱਗ ਸਕਦਾ ਹੈ।