ਕਾਬੁਲ (ਏਐੱਨਆਈ) : ਬੰਦੂਕ ਦੇ ਦਮ ’ਤੇ ਅਫ਼ਗਾਨਿਸਤਾਨ ਦੀ ਸੱਤਾ ’ਤੇ ਕਾਬਜ਼ ਹੋਣ ਵਾਲੇ ਤਾਲਿਬਾਨ ਨੇ ਹੁਣ ਦਾੜੀ ਕੱਟਣ ਜਾਂ ਸ਼ੇਵ ਕਰਨ ’ਤੇ ਵੀ ਰੋਕ ਲਗਾ ਦਿੱਤੀ ਹੈ। ਸੈਲੂਨ ਸੰਚਾਲਕਾਂ ਤੇ ਹੋਰਨਾਂ ਨੂੰ ਜਾਰੀ ਪੱਤਰ ’ਚ ਦਾੜੀ ਕੱਟਣ ਜਾਂ ਸ਼ੇਵ ਕਰਨ ਨੂੰ ਇਸਲਾਮੀ ਕਾਨੂੰਨ ਦੀ ਉਲੰਘਣਾ ਦੱਸਿਆ ਗਿਆ ਹੈ ਤੇ ਅਜਿਹਾ ਕਰਨ ਵਾਲਿਆਂ ਨੂੰ ਸਖ਼ਤ ਸਜ਼ਾ ਵੀ ਚਿਤਾਵਨੀ ਵੀ ਦਿੱਤੀ ਗਈ ਹੈ।

ਤਾਲਿਬਾਨ ਦੇ ਪੱਤਰ ਦਾ ਹਵਾਲਾ ਦਿੰਦਿਆਂ ਦ ਫਰੰਟੀਅਰ ਪੋਸਟ ਨੇ ਇਕ ਰਿਪੋਰਟ ਛਾਪੀ ਹੈ। ਰਿਪੋਰਟ ਮੁਤਾਬਕ, ‘ਤਾਲਿਬਾਨ ਨੇ ਵਾਲ਼ਾਂ ਦੀ ਸਟਾਈਲਿਸ਼ ਕਟਿੰਗ ਤੇ ਦਾੜੀ ਦੀ ਸ਼ੇਵਿੰਗ ’ਤੇ ਵੀ ਰੋਕ ਲਗਾ ਦਿੱਤੀ ਹੈ। ਇਸਲਾਮਿਕ ਮਾਮਲਿਆਂ ਦੇ ਮੰਤਰਾਲੇ ਦੇ ਅਧਿਕਾਰੀਆਂ ਨੇ ਹੇਲਮੰਡ ਸੂਬੇ ਦੀ ਰਾਜਧਾਨੀ ਲਸ਼ਕਰ ਗਾਹ ’ਚ ਮਰਦਾਂ ਦੇ ਸੈਲੂਨ ਦਾ ਸੰਚਾਲਣ ਕਰਨ ਵਾਲਿਆਂ ਨਾਲ ਬੈਠਕ ਕੀਤੀ ਤੇ ਉਨ੍ਹਾਂ ਨੂੰ ਦਾੜੀ ਦੀ ਸ਼ੇਵਿੰਗ ਤੇ ਵਾਲ਼ਾਂ ਦੀ ਸਟਾਈਲਿਸ਼ ਕਟਿੰਗ ਨਾ ਕਰਨ ਦੀ ਸਲਾਹ ਦਿੱਤੀ।’ ਇੰਟਰਨੈੱਟ ਮੀਡੀਆ ’ਤੇ ਵਾਇਰਲ ਇਸ ਆਦੇਸ਼ ’ਚ ਸੈਲੂਨ ਸੰਚਾਲਕਾਂ ਨੂੰ ਆਪਣੇ ਅਦਾਰੇ ’ਚ ਸੰਗੀਤ ਜਾਂ ਭਜਨ ਵਜਾਉਣ ਤੋਂ ਵੀ ਮਨ੍ਹਾਂ ਕੀਤਾ ਗਿਆ ਹੈ।

ਆਈਏਐੱਨਐੱਸ ਨੇ ਬੀਬੀਸੀ ਦੀ ਰਿਪੋਰਟ ਦੇ ਹਵਾਲੇ ਨਾਲ ਦੱਸਿਆ ਕਿ ਕਾਬੁਲ ਦੇ ਕੁਝ ਸੈਲੂਨ ਸੰਚਾਲਕ ਵੀ ਇਸ ਆਦੇਸ਼ ਦੀ ਪੁਸ਼ਟੀ ਕਰ ਰਹੇ ਹਨ। ਆਦੇਸ਼ ’ਚ ਕਿਹਾ ਗਿਆ ਹੈ ਕਿ ਇਸਦੇ ਖ਼ਿਲਾਫ਼ ਕਿਸੇ ਨੂੰ ਵੀ ਸ਼ਿਕਾਇਤ ਕਰਨ ਦੀ ਇਜਾਜ਼ਤ ਨਹੀਂ ਹੈ। ਸੈਲੂਨ ਸੰਚਾਲਕਾਂ ਦਾ ਕਹਿਣਾ ਹੈ ਕਿ ਗਾਹਕਾਂ ਨੇ ਵੀ ਦਾੜੀ ਸ਼ੇਵ ਕਰਵਾਉਣਾ ਬੰਦ ਕਰ ਦਿੱਤਾ ਹੈ।

ਅਸਲ ’ਚ ਤਾਲਿਬਾਨ ਸਾਲ 1996-01 ਦੇ ਆਪਣੇ ਸ਼ਾਸਨ ਦੌਰਾਨ ਲਾਗੂ ਇਸਲਾਮਿਕ ਸ਼ਰੀਆ ਕਾਨੂੰਨ ਨੂੰ ਮੁਡ਼ ਤੋਂ ਲਾਗੂ ਕਰ ਰਿਹਾ ਹੈ। ਉਸ ਨੇ ਔਰਤਾਂ ਦੇ ਕੰਮ ਕਰਨ ਅਤੇ ਬਾਜ਼ਾਰ ਜਾਣ ’ਤੇ ਵੀ ਰੋਕ ਲਗਾ ਦਿੱਤੀ ਹੈ।

Posted By: Tejinder Thind