ਕੈਨਬਰਾ (ਏਪੀ) : ਆਸਟ੍ਰੇਲੀਆ ਨੇ ਖ਼ਬਰਾਂ ਦੇ ਭੁਗਤਾਨ ਨੂੰ ਲੈ ਕੇ ਇਕ ਕਾਨੂੰਨ ਬਣਾਇਆ ਹੈ। ਇਸ ਕਾਨੂੰਨ ਤਹਿਤ ਗੂਗਲ ਤੇ ਫੇਸਬੁੱਕ ਵਰਗੀਆਂ ਦਿੱਗਜ ਕੰਪਨੀਆਂ ਨੂੰ ਖ਼ਬਰਾਂ ਦੀ ਵਰਤੋਂ ਕਰਨ 'ਤੇ ਆਸਟ੍ਰੇਲਿਆਈ ਸਮਾਚਾਰ ਪ੍ਰਕਾਸ਼ਕਾਂ ਨੂੰ ਭੁਗਤਾਨ ਕਰਨਾ ਪਵੇਗਾ। ਇਸ ਲਈ ਆਸਟ੍ਰੇਲਿਆਈ ਮੀਡੀਆ ਕੰਪਨੀਆਂ ਨਾਲ ਸਮਝੌਤਾ ਕਰਨਾ ਪਵੇਗਾ। ਹਾਲਾਂਕਿ ਇਸ ਦਿਸ਼ਾ 'ਚ ਫੇਸਬੁੱਕ ਤੇ ਗੂਗਲ ਨੇ ਕਦਮ ਵਧਾ ਦਿੱਤੇ ਹਨ। ਆਸਟ੍ਰੇਲਿਆਈ ਸੰਸਦ ਨੇ ਵੀਰਵਾਰ ਨੂੰ ਨਿਊਜ਼ ਮੀਡੀਆ ਬਾਰਗੀਨਿੰਗ ਕੋਡ ਨਾਂ ਦਾ ਸੋਧਿਆ ਹੋਇਆ ਬਿੱਲ 'ਤੇ ਮੋਹਰ ਲਗਾ ਦਿੱਤੀ। ਇਸ ਦਾ ਖਰੜਾ ਤਿਆਰ ਕਰਨ ਵਾਲੇ ਸੰਸਦ ਮੈਂਬਰ ਰਾਡਸਿਮਸ ਨੇ ਕਿਹਾ ਕਿ ਉਹ ਸੋਧੇ ਬਿੱਲ ਦੇ ਪਾਸ ਹੋਣ ਤੋਂ ਬੇਹੱਦ ਖੁਸ਼ ਹਨ। ਇਸ ਦੇ ਕਾਨੂੰਨ ਦਾ ਰੂਪ ਲੈਣ 'ਚ ਆਸਟ੍ਰੇਲਿਆਈ ਸਮਾਚਾਰ ਪ੍ਰਕਾਸ਼ਕਾਂ ਤੇ ਗੂਗਲ ਤੇ ਫੇਸਬੁੱਕ ਵਿਚਾਲੇ ਗ਼ੈਰ-ਸੰਤੁਲਿਤ ਬਾਜ਼ਾਰ ਦੀ ਸਮੱਸਿਆ ਦੂਰ ਹੋ ਜਾਵੇਗੀ। ਜਦਕਿ ਆਸਟ੍ਰੇਲਿਆਈ ਮੁਕਾਬਲੇਬਾਜ਼ੀ ਤੇ ਖਪਤਕਾਰ ਕਮਿਸ਼ਨ ਨੇ ਕਿਹਾ, 'ਇਸ ਕਾਨੂੰਨ ਦਾ ਮਕਸਦ ਬਾਜ਼ਾਰ ਦੀ ਤਾਕਤ ਨਾਲ ਨਿਬੇੜਾ ਹੈ। ਸਾਫ਼ ਤੌਰ 'ਤੇ ਗੂਗਲ ਤੇ ਫੇਸਬੁੱਕ ਤਾਕਤ ਹੈ।' ਇਸ ਨਵੇਂ ਕਾਨੂੰਨ ਦੇ ਮੱਦੇਨਜ਼ਰ ਗੂਗਲ ਪਹਿਲਾਂ ਹੀ ਨਿਊਜ਼ ਕਾਰਪ ਤੇ ਸੈਵਨ ਵੈਸਟ ਮੀਡੀਆ ਸਮੇਤ ਕਈ ਵੱਡੀਆਂ ਆਸਟ੍ਰੇਲਿਆਈ ਮੀਡੀਆ ਕੰਪਨੀਆਂ ਨਾਲ ਸਮਝੌਤਾ ਕਰ ਚੁੱਕਾ ਹੈ। ਆਸਟ੍ਰੇਲਿਆਈ ਫਾਇਨਾਂਸ ਮੰਤਰੀ ਜੋਸ਼ ਫਰਾਈਡੈਨਬਰਗ ਨੇ ਕਿਹਾ, 'ਮੈਂ ਗੂਗਲ ਦੀ ਤਰੱਕੀ ਤੋਂ ਖੁਸ਼ ਹਾਂ। ਫੇਸਬੁੱਕ ਵੀ ਆਸਟ੍ਰੇਲਿਆਈ ਕੰਪਨੀਆਂ ਨਾਲ ਸਮਝੌਤਾ ਕਰ ਰਿਹਾ ਹੈ।'

ਇਨ੍ਹਾਂ ਖੇਤਰੀ ਅਖ਼ਬਾਰਾਂ ਦੀ ਚਿੰਤਾ

ਆਸਟ੍ਰੇਲਿਆ 'ਚ 161 ਖੇਤਰੀ ਅਖ਼ਬਾਰਾਂ ਦੀ ਅਗਵਾਈ ਕਰਨ ਵਾਲੇ ਕਾਊਂਟੀ ਪ੍ਰੈੱਸ ਆਸਟ੍ਰੇਲਿਆ ਨੇ ਇਹ ਚਿੰਤਾ ਪ੍ਰਗਟਾਈ ਹੈ ਕਿ ਵੱਡੇ ਸ਼ਹਿਰਾਂ ਦੇ ਬਾਹਰ ਦੇ ਛੋਟੇ ਪ੍ਰਕਾਸ਼ਕ ਇਸ ਤਰ੍ਹਾਂ ਦੇ ਸਮਝੌਤੇ ਤੋਂ ਵਾਂਝਾ ਰਹਿ ਸਕਦੇ ਹਨ। ਦੁਨੀਆ ਦੀਆਂ ਦਿੱਗਜ ਇੰਟਰਨੈੱਟ ਮੀਡੀਆ ਕੰਪਨੀਆਂ ਸਿਰਫ ਵੱਡੀਆਂ ਆਸਟ੍ਰੇਲਿਆਈ ਕੰਪਨੀਆਂ ਨਾਲ ਸਮਝੌਤਾ ਕਰ ਰਹੀਆਂ ਹਨ।

ਫੇਸਬੁੱਕ ਨੇ ਆਸਟ੍ਰੇਲਿਆਈ ਸਰਕਾਰ ਨਾਲ ਕੀਤਾ ਸਮਝੌਤਾ

ਖ਼ਬਰਾਂ ਦੇ ਭੁਗਤਾਨ ਨੂੰ ਲੈ ਕੇ ਬੀਤੀ 18 ਫਰਵਰੀ ਨੂੰ ਫੇਸਬੁੱਕ ਨੇ ਆਪਣੇ ਪਲੇਟਫਾਰਮ 'ਤੇ ਆਸਟ੍ਰੇਲਿਆਈ ਲੋਕਾਂ ਦੇ ਨਿਊਜ਼ ਦੇਖਣ ਤੇ ਸਾਂਝਾ ਕਰਨ 'ਤੇ ਰੋਕ ਲਗਾ ਦਿੱਤੀ ਸੀ। ਇਸ ਤੋਂ ਬਾਅਦ ਉਸ ਨੇ ਆਪਣੇ ਕਦਮ ਪਿੱਛੇ ਖਿੱਚਦਿਆਂ ਬੀਤੇ ਮੰਗਲਵਾਰ ਨੂੰ ਇਸ ਦੇਸ਼ 'ਚ ਆਪਣੀਆਂ ਸੇਵਾਵਾਂ ਬਹਾਲ ਕਰ ਦਿੱਤੀਆਂ। ਫੇਸਬੁੱਕ ਨੇ ਆਸਟ੍ਰੇਲਿਆਈ ਸਰਕਾਰ ਨਾਲ ਕਾਨੂੰਨ 'ਚ ਬਦਲਾਅ ਨੂੰ ਲੈ ਕੇ ਸਮਝੌਤੇ ਤੋਂ ਬਾਅਦ ਇਹ ਕਦਮ ਉਠਾਇਆ। ਇਸ ਮਾਮਲੇ 'ਤੇ ਫਰਾਈਡੈਨਬਰਗ ਤੇ ਫੇਸਬੁੱਕ ਦੇ ਸੰਸਥਾਪਕ ਮਾਰਕ ਜ਼ੁਕਰਬਰਗ ਵਿਚਾਲੇ ਵਿਸਥਾਰਤ ਗੱਲਬਾਤ ਹੋਈ ਸੀ।

Posted By: Susheel Khanna