ਮੌਨਸੂਨ 'ਚ ਤੇਜ਼ੀ ਨਾਲ ਫੈਲ ਰਿਹੈ ਵਾਇਰਲ ਬੁਖ਼ਾਰ

ਬਾਰਸ਼ ਇਕੱਲੀ ਨਹੀਂ ਆਉਂਦੀ, ਸਗੋਂ ਆਪਣੇ ਨਾਲ ਕਈ ਮੌਸਮੀ ਬਿਮਾਰੀਆਂ ਵੀ ਲੈ ਕੇ ਆਉਂਦੀ ਹੈ। ਡੇਂਗੂ ਤੇ ਚਿਕਨਗੁਨੀਆ ਤੋਂ ਲੈ ਕੇ ਮਲੇਰੀਆ, ਟਾਈਫਾਈਡ ਅਤੇ ਹੈਜ਼ਾ ਤੱਕ - ਮੌਨਸੂਨ ਦੌਰਾਨ ਇਨ੍ਹਾਂ ਲਾਗਾਂ ਦੇ ਮਾਮਲੇ ਲਗਾਤਾਰ ਵਧ ਰਹੇ ਹਨ।

ਮੌਸਮੀ ਵਾਇਰਲ

ਅਕਸਰ ਬੁਖ਼ਾਰ ਪਹਿਲੀ ਚਿਤਾਵਨੀ ਵਜੋਂ ਆਉਂਦਾ ਹੈ। ਇਹ ਇੱਕ ਸੰਕੇਤ ਹੈ ਕਿ ਤੁਹਾਡਾ ਸਰੀਰ ਸਿਰਫ਼ ਮੌਸਮ ਨਾਲ ਹੀ ਨਹੀਂ, ਸਗੋਂ ਇੱਕ ਲਾਗ ਨਾਲ ਲੜ ਰਿਹਾ ਹੈ। ਭਾਵੇਂ ਇਹ ਵਾਇਰਲ ਬੁਖ਼ਾਰ ਹੋਵੇ ਜਾਂ ਮੱਛਰ ਤੋਂ ਹੋਣ ਵਾਲੀਆਂ ਬਿਮਾਰੀਆਂ, ਜਿਵੇਂ ਕਿ ਡੇਂਗੂ ਜਾਂ ਮਲੇਰੀਆ। ਸਮੇਂ ਸਿਰ ਉਨ੍ਹਾਂ ਦੇ ਲੱਛਣਾਂ ਨੂੰ ਪਛਾਣਨਾ ਬਹੁਤ ਜ਼ਰੂਰੀ ਹੈ। ਸਹੀ ਸਮੇਂ 'ਤੇ ਕੀਤੀ ਗਈ ਪਛਾਣ ਅਤੇ ਇਲਾਜ ਬਿਮਾਰੀ ਨੂੰ ਗੰਭੀਰ ਹੋਣ ਤੋਂ ਰੋਕ ਸਕਦਾ ਹੈ ਅਤੇ ਜਲਦੀ ਰਾਹਤ ਪ੍ਰਦਾਨ ਕਰ ਸਕਦਾ ਹੈ।

ਵਾਇਰਲ ਬੁਖਾਰ ਕੀ ਹੈ?

ਵਾਇਰਲ ਬੁਖਾਰ ਇੱਕ ਆਮ ਇਨਫੈਕਸ਼ਨ ਹੈ ਜੋ ਵੱਖ-ਵੱਖ ਕਿਸਮਾਂ ਦੇ ਵਾਇਰਸਾਂ ਕਾਰਨ ਹੁੰਦਾ ਹੈ। ਜਿਵੇਂ ਕਿ ਇਨਫਲੂਐਂਜ਼ਾ, ਰਾਈਨੋਵਾਇਰਸ ਜਾਂ ਐਡੀਨੋਵਾਇਰਸ। ਇਹ ਆਮ ਤੌਰ 'ਤੇ ਹਲਕਾ ਹੁੰਦਾ ਹੈ ਅਤੇ ਬਿਨਾਂ ਇਲਾਜ ਦੇ ਕੁਝ ਦਿਨਾਂ ਵਿੱਚ ਠੀਕ ਹੋ ਜਾਂਦਾ ਹੈ। ਹਾਲਾਂਕਿ, ਇਹ ਇਨਫੈਕਸ਼ਨ ਉਨ੍ਹਾਂ ਲੋਕਾਂ ਵਿੱਚ ਗੰਭੀਰ ਰੂਪ ਲੈ ਸਕਦੀ ਹੈ ਜਿਨ੍ਹਾਂ ਦੀ ਇਮਿਊਨਿਟੀ ਕਮਜ਼ੋਰ ਹੁੰਦੀ ਹੈ ਜਾਂ ਉਹ ਪਹਿਲਾਂ ਹੀ ਕਿਸੇ ਬਿਮਾਰੀ ਤੋਂ ਪੀੜਤ ਹਨ।

ਵਾਇਰਲ ਬੁਖਾਰ ਦੀਆਂ ਕਿਸਮਾਂ

ਇਨਫਲੂਐਂਜ਼ਾ (ਫਲੂ), ਆਮ ਜ਼ੁਕਾਮ, ਡੇਂਗੂ, ਚਿਕਨਗੁਨੀਆ, ਹਰਪੀਸ ਸਿੰਪਲੈਕਸ ਵਾਇਰਸ।

ਵਾਇਰਲ ਬੁਖਾਰ ਦੇ ਕਾਰਨ

ਵਾਇਰਸ ਇਨਫੈਕਸ਼ਨ ਮੁੱਖ ਤੌਰ 'ਤੇ ਵਾਇਰਲ ਬੁਖਾਰ ਲਈ ਜ਼ਿੰਮੇਵਾਰ ਹੈ। ਇਹ ਵਾਇਰਸ ਸਰੀਰ ਨੂੰ ਵੱਖ-ਵੱਖ ਤਰੀਕਿਆਂ ਨਾਲ ਪ੍ਰਭਾਵਿਤ ਕਰਦੇ ਹਨ। ਇਨਫਲੂਐਂਜ਼ਾ ਵਾਇਰਸ, ਰਾਈਨੋਵਾਇਰਸ, ਡੇਂਗੂ ਵਾਇਰਸ, ਐਡੀਨੋਵਾਇਰਸ, ਚਿਕਨਗੁਨੀਆ ਵਾਇਰਸ।

ਵਾਇਰਲ ਬੁਖਾਰ ਦੇ ਲੱਛਣ

ਬੁਖਾਰ, ਸਿਰ ਦਰਦ, ਸਰੀਰ ਵਿੱਚ ਦਰਦ, ਥਕਾਵਟ, ਖੰਘ, ਗਲੇ ਵਿੱਚ ਖਰਾਸ਼, ਨੱਕ ਵਗਣਾ, ਛਿੱਕ, ਮਤਲੀ ਜਾਂ ਉਲਟੀਆਂ ਅਤੇ ਦਸਤ ਜਾਂ ਪੇਟ ਖਰਾਬ ਹੋਣਾ। ਇਹ ਸਾਰੇ ਵਾਇਰਲ ਬੁਖਾਰ ਦੇ ਲੱਛਣ ਹਨ, ਜਿਨ੍ਹਾਂ ਨੂੰ ਬਹੁਤ ਸਾਰੇ ਲੋਕ ਨਜ਼ਰਅੰਦਾਜ਼ ਕਰਦੇ ਹਨ।

ਮਲੇਰੀਆ

ਮਲੇਰੀਆ ਇੱਕ ਗੰਭੀਰ ਬਿਮਾਰੀ ਹੈ, ਜੋ ਕਿ ਸੰਕਰਮਿਤ ਮੱਛਰ ਦੇ ਕੱਟਣ ਰਾਹੀਂ ਸਰੀਰ ਵਿੱਚ ਪਹੁੰਚਣ ਵਾਲੇ ਪਰਜੀਵੀਆਂ ਕਾਰਨ ਹੁੰਦੀ ਹੈ। ਇਹ ਬੁਖਾਰ, ਕੰਬਣੀ, ਪਸੀਨਾ ਆਉਣਾ ਅਤੇ ਕਮਜ਼ੋਰੀ ਵਰਗੇ ਲੱਛਣਾਂ ਨਾਲ ਪ੍ਰਗਟ ਹੁੰਦਾ ਹੈ। ਜੇਕਰ ਸਮੇਂ ਸਿਰ ਜਾਂਚ ਅਤੇ ਇਲਾਜ ਨਾ ਕੀਤਾ ਜਾਵੇ, ਤਾਂ ਇਹ ਘਾਤਕ ਵੀ ਸਾਬਤ ਹੋ ਸਕਦਾ ਹੈ।

ਮਲੇਰੀਆ ਦਾ ਇਲਾਜ ਆਮ ਤੌਰ 'ਤੇ ਵਿਸ਼ੇਸ਼ ਮਲੇਰੀਆ ਵਿਰੋਧੀ ਦਵਾਈਆਂ ਨਾਲ ਕੀਤਾ ਜਾਂਦਾ ਹੈ, ਜੋ ਕਿ ਲਾਗ ਦੀ ਕਿਸਮ ਦੇ ਅਨੁਸਾਰ ਦਿੱਤੀਆਂ ਜਾਂਦੀਆਂ ਹਨ। ਸਹੀ ਜਾਂਚ ਨਾਲ ਹੀ ਇਹ ਪਤਾ ਲਗਾਇਆ ਜਾ ਸਕਦਾ ਹੈ ਕਿ ਸਰੀਰ ਵਿੱਚ ਮਲੇਰੀਆ ਦੇ ਪਰਜੀਵੀ ਮੌਜੂਦ ਹਨ ਜਾਂ ਨਹੀਂ।