ਦਸ ’ਚੋਂ ਨੌਂ ਪਾਸ, ਅਫਰੀਕੀ ਟੀਮਾਂ ਨੇ ਰਚਿਆ ਇਤਿਹਾਸ; ਪਹਿਲੀ ਵਾਰ ਵਿਸ਼ਵ ਕੱਪ ਦੇ ਨਾਕਆਊਟ ਗੇੜ ’ਚ ਖੇਡਣ ਵਾਲੀਆਂ ਅਫਰੀਕੀ ਟੀਮਾਂ ਦੀ ਰਿਕਾਰਡ ਗਿਣਤੀ

ਜਾਗਰਣ ਨਿਊਜ਼ ਨੈੱਟਵਰਕ, ਨਵੀਂ ਦਿੱਲੀ: ਅਫਰੀਕੀ ਮਹਾਂਦੀਪ ਨੇ ਫੀਫਾ ਵਿਸ਼ਵ ਕੱਪ 2026 ’ਚ ਇਤਿਹਾਸ ਰਚਿਆ ਹੈ। ਟੂਰਨਾਮੈਂਟ ’ਚ ਹਿੱਸਾ ਲੈਣ ਵਾਲੀਆਂ 10 ਅਫਰੀਕੀ ਟੀਮਾਂ ’ਚੋਂ ਨੌਂ ਨੇ ਰਾਊਂਡ ਆਫ 32 ’ਚ ਜਗ੍ਹਾ ਪੱਕੀ ਕੀਤੀ ਹੈ। ਇਹ ਫੀਫਾ ਵਿਸ਼ਵ ਕੱਪ ਦੇ ਇਤਿਹਾਸ ’ਚ ਪਹਿਲੀ ਵਾਰ ਹੈ ਜਦੋਂ ਅਫਰੀਕੀ ਮਹਾਂਦੀਪ ਦੀਆਂ ਇੰਨੀਆਂ ਟੀਮਾਂ ਨਾਕਆਊਟ ਗੇੜ ’ਚ ਪਹੁੰਚੀਆਂ ਹਨ। ਪਿਛਲਾ ਰਿਕਾਰਡ ਦੋ ਟੀਮਾਂ ਦਾ ਸੀ। 2014 ’ਚ ਅਲਜੀਰੀਆ ਤੇ ਨਾਈਜੀਰੀਆ ਇਕੋ ਸਮੇਂ ਨਾਕਆਊਟ ਮੈਚ ਖੇਡੇ ਸਨ। ਇਤਿਹਾਸਕ ਤੌਰ ’ਤੇ ਇਸ ਤੋਂ ਪਹਿਲਾਂ ਅਫਰੀਕੀ ਮਹਾਂਦੀਪ ਦੇ ਸਿਰਫ਼ ਛੇ ਦੇਸ਼ ਹੀ ਫੀਫਾ ਵਿਸ਼ਵ ਕੱਪ ਦੇ ਨਾਕਆਊਟ ਗੇੜ ’ਚ ਪਹੁੰਚੇ ਸਨ।

ਫੀਫਾ ਵਿਸ਼ਵ ਕੱਪ 2026 ’ਚ ਗਰੁੱਪ ਗੇੜ ਦੇ ਮੈਚਾਂ ਦੀ ਸਮਾਪਤੀ ਤੋਂ ਬਾਅਦ, ਮੋਰੱਕੋ, ਦੱਖਣੀ ਅਫਰੀਕਾ, ਸੇਨੇਗਲ, ਆਈਵਰੀ ਕੋਸਟ, ਘਾਨਾ, ਮਿਸਰ, ਅਲਜੀਰੀਆ, ਕਾਂਗੋ ਤੇ ਕੇਪ ਵਰਡੇ ਅਗਲੇ ਦੌਰ ’ਚ ਪਹੁੰਚ ਗਏ ਹਨ। ਟਿਊਨੀਸ਼ੀਆ ਟੂਰਨਾਮੈਂਟ ਤੋਂ ਬਾਹਰ ਹੋਣ ਵਾਲਾ ਇਕਲੌਤਾ ਅਫਰੀਕੀ ਦੇਸ਼ ਹੈ। ਟੀਮ ਗਰੁੱਪ ਗੇੜ ਦੌਰਾਨ ਇਕ ਵੀ ਮੈਚ ਜਿੱਤਣ ’ਚ ਅਸਫਲ ਰਹੀ।

ਸਕਾਟਲੈਂਡ ਦੇ ਮੁੱਖ ਕੋਚ ਨੇ ਦਿੱਤਾ ਅਸਤੀਫਾ

ਫੀਫਾ ਵਿਸ਼ਵ ਕੱਪ ਤੋਂ ਸਕਾਟਲੈਂਡ ਦੇ ਬਾਹਰ ਹੋਣ ਤੋਂ ਤੁਰੰਤ ਬਾਅਦ, ਮੁੱਖ ਕੋਚ ਸਟੀਵ ਕਲਾਰਕ ਨੇ ਆਪਣੇ ਅਹੁਦੇ ਤੋਂ ਅਸਤੀਫਾ ਦੇ ਦਿੱਤਾ। ਸਕਾਟਿਸ਼ ਫੁੱਟਬਾਲ ਐਸੋਸੀਏਸ਼ਨ ਨੇ ਇਸ ਖ਼ਬਰ ਦਾ ਐਲਾਨ ਕੀਤਾ। 62 ਸਾਲਾ ਕਲਾਰਕ ਸੱਤ ਸਾਲਾਂ ਤੋਂ ਸਕਾਟਿਸ਼ ਟੀਮ ਦੀ ਕੋਚਿੰਗ ਕਰ ਰਿਹਾ ਸੀ। ਉਸ ਨੇ 28 ਸਾਲਾਂ ’ਚ ਪਹਿਲੀ ਵਾਰ ਟੀਮ ਦੀ ਅਗਵਾਈ ਕੀਤੀ ਤੇ ਉਨ੍ਹਾਂ ਨੂੰ ਲਗਾਤਾਰ ਦੋ ਵਾਰ ਯੂਰੋ ਕੱਪ ਲਈ ਕੁਆਲੀਫਾਈ ਕਰਨ ’ਚ ਵੀ ਮਦਦ ਕੀਤੀ। ਕਲਾਰਕ ਦੇਸ਼ ਦੀ ਪੁਰਸ਼ ਫੁੱਟਬਾਲ ਟੀਮ ਦੇ ਇਤਿਹਾਸ ’ਚ ਸਭ ਤੋਂ ਸਫਲ ਕੋਚ ਸੀ। ਸਕਾਟਲੈਂਡ ਨੇ ਗਰੁੱਪ ਸੀ ’ਚ ਤੀਜੇ ਸਥਾਨ ’ਤੇ ਟੂਰਨਾਮੈਂਟ ਖਤਮ ਕੀਤਾ। ਕਲਾਰਕ ਨੇ ਪਿਛਲੇ ਮਈ ’ਚ ਟੀਮ ਨਾਲ ਇਕ ਨਵਾਂ ਇਕਰਾਰਨਾਮਾ ਕੀਤਾ ਸੀ। ਇੱਕ ਅਜਿਹਾ ਇਕਰਾਰਨਾਮਾ ਜੋ 2030 ਵਿਸ਼ਵ ਕੱਪ ਤੱਕ ਚੱਲਦਾ ਤੇ ਉਸ ਨੂੰ ਯੂਰੋ 2028 ਲਈ ਮੁੱਖ ਕੋਚ ਬਣੇ ਰਹਿਣਾ ਪੈਂਦਾ, ਪਰ ਉਸ ਨੇ ਜੂਨ ’ਚ ਅਸਤੀਫਾ ਦੇਣ ਦਾ ਫੈਸਲਾ ਕੀਤਾ।