ਹੱਥ ਵਿੱਚ ਕਿਉਂ ਬੰਨ੍ਹਿਆ ਜਾਂਦਾ ਹੈ ਕਾਲਾ ਕਲਾਵਾ? ਪੜ੍ਹੋ 3 ਗੰਢਾਂ ਦਾ ਰਹੱਸ; ਇਨ੍ਹਾਂ 3 ਦਿਨਾਂ 'ਚ ਪਹਿਨਣ ਨਾਲ ਖੁੱਲ੍ਹੇਗੀ ਕਿਸਮਤ !

ਧਰਮ ਡੈਸਕ, ਨਵੀਂ ਦਿੱਲੀ : ਹਿੰਦੂ ਧਰਮ 'ਚ ਕਲਾਵਾ ਜਾਂ ਮੌਲੀ ਬੰਨ੍ਹਣ ਦੀ ਪਰੰਪਰਾ ਬਹੁਤ ਪੁਰਾਣੀ ਹੈ। ਆਮ ਤੌਰ 'ਤੇ ਪੂਜਾ-ਪਾਠ, ਯੱਗ ਤੇ ਧਾਰਮਿਕ ਅਨੁਸ਼ਠਾਨਾਂ ਦੌਰਾਨ ਲਾਲ ਜਾਂ ਪੀਲੇ ਰੰਗ ਦਾ ਕਲਾਵਾ ਬੰਨ੍ਹਿਆ ਜਾਂਦਾ ਹੈ, ਪਰ ਪਿਛਲੇ ਕੁਝ ਸਮੇਂ ਤੋਂ ਕਾਲਾ ਕਲਾਵਾ ਵੀ ਲੋਕਾਂ 'ਚ ਕਾਫ਼ੀ ਪ੍ਰਸਿੱਧ ਹੋਇਆ ਹੈ। ਖ਼ਾਸ ਕਰਕੇ, ਭਗਵਾਨ ਸ਼ਿਵ ਦੇ ਭਗਤਾਂ ਅਤੇ ਕਾਲ ਭੈਰਵ ਦੀ ਉਪਾਸਨਾ ਕਰਨ ਵਾਲੇ ਸ਼ਰਧਾਲੂਆਂ 'ਚ ਇਸ ਨੂੰ ਪਹਿਨਣ ਦਾ ਰੁਝਾਨ ਤੇਜ਼ੀ ਨਾਲ ਵਧਿਆ ਹੈ।

ਜੇਕਰ ਤੁਸੀਂ ਕਦੇ ਕਿਸੇ ਸ਼ਿਵ ਮੰਦਰ, ਵਿਸ਼ੇਸ਼ ਤੌਰ 'ਤੇ ਮਹਾਕਾਲ ਜਾਂ ਕਾਲ ਭੈਰਵ ਮੰਦਰ ਦੇ ਬਾਹਰ ਧਿਆਨ ਦਿੱਤਾ ਹੋਵੇ ਤਾਂ ਉੱਥੇ ਕਾਲਾ ਕਲਾਵਾ ਵਿਕਦਾ ਹੋਇਆ ਜ਼ਰੂਰ ਦਿਖਾਈ ਦੇਵੇਗਾ। ਕਈ ਸ਼ਰਧਾਲੂ ਪੂਜਾ ਤੋਂ ਬਾਅਦ ਇਸ ਨੂੰ ਆਪਣੇ ਗੁੱਟ 'ਤੇ ਬੰਨ੍ਹਦੇ ਹਨ ਤੇ ਇਸ ਨੂੰ ਪਰਮਾਤਮਾ ਦੀ ਕਿਰਪਾ ਤੇ ਸੁਰੱਖਿਆ ਦਾ ਪ੍ਰਤੀਕ ਮੰਨਦੇ ਹਨ।

ਸ਼ਿਵ ਦਾ ਪ੍ਰਤੀਕ ਹੈ ਕਾਲਾ ਕਲਾਵਾ

ਧਾਰਮਿਕ ਮਾਨਤਾਵਾਂ ਅਨੁਸਾਰ, ਕਾਲਾ ਕਲਾਵਾ ਭਗਵਾਨ ਸ਼ਿਵ ਦੇ ਰੌਦਰ ਸਰੂਪ ਮਹਾਕਾਲ ਤੇ ਕਾਲ ਭੈਰਵ ਨਾਲ ਜੁੜਿਆ ਹੋਇਆ ਮੰਨਿਆ ਜਾਂਦਾ ਹੈ। ਮਾਨਤਾ ਹੈ ਕਿ ਇਸ ਨੂੰ ਧਾਰਨ ਕਰਨ ਨਾਲ ਵਿਅਕਤੀ ਦੀ ਨਕਾਰਾਤਮਕ ਪ੍ਰਭਾਵਾਂ ਤੋਂ ਰੱਖਿਆ ਹੁੰਦੀ ਹੈ ਅਤੇ ਮਨ ਵਿਚ ਸਾਹਸ ਤੇ ਆਤਮਵਿਸ਼ਵਾਸ ਦਾ ਸੰਚਾਰ ਹੁੰਦਾ ਹੈ। ਇਹੀ ਕਾਰਨ ਹੈ ਕਿ ਵੱਡੀ ਗਿਣਤੀ ਵਿੱਚ ਲੋਕ ਇਸ ਨੂੰ ਸਿਰਫ਼ ਇੱਕ ਧਾਗਾ ਨਹੀਂ, ਬਲਕਿ ਆਪਣੀ ਆਸਥਾ ਦਾ ਪ੍ਰਤੀਕ ਮੰਨ ਕੇ ਪਹਿਨਦੇ ਹਨ।

ਕਿਉਂ ਲਗਾਈਆਂ ਜਾਂਦੀਆਂ ਹਨ ਗੰਢਾਂ?

• ਕਾਲਾ ਕਲਾਵਾ ਬੰਨ੍ਹਦੇ ਸਮੇਂ ਉਸ ਵਿੱਚ ਲਗਾਈਆਂ ਜਾਣ ਵਾਲੀਆਂ ਗੰਢਾਂ ਦਾ ਵੀ ਵਿਸ਼ੇਸ਼ ਮਹੱਤਵ ਦੱਸਿਆ ਜਾਂਦਾ ਹੈ। ਪਰੰਪਰਾ ਅਨੁਸਾਰ ਇਸ ਵਿੱਚ 3, 5 ਜਾਂ 7 ਗੰਢਾਂ ਲਗਾਈਆਂ ਜਾ ਸਕਦੀਆਂ ਹਨ, ਪਰ ਤਿੰਨ ਗੰਢਾਂ ਸਭ ਤੋਂ ਵੱਧ ਪ੍ਰਚੱਲਿਤ ਮੰਨੀਆਂ ਜਾਂਦੀਆਂ ਹਨ। ਕਈ ਲੋਕ ਇਹਨਾਂ ਤਿੰਨ ਗੰਢਾਂ ਨੂੰ ਸ਼ਰਧਾ, ਸੁਰੱਖਿਆ ਅਤੇ ਸ਼ੁਭਤਾ ਦਾ ਪ੍ਰਤੀਕ ਮੰਨਦੇ ਹਨ। ਇਹੀ ਕਾਰਨ ਹੈ ਕਿ ਮੰਦਰਾਂ 'ਚ ਪੁਜਾਰੀ ਵੀ ਅਕਸਰ ਤਿੰਨ ਗੰਢਾਂ ਲਗਾ ਕੇ ਹੀ ਕਲਾਵਾ ਬੰਨ੍ਹਦੇ ਹਨ।
• ਭਾਰਤੀ ਪਰੰਪਰਾ 'ਚ ਕਾਲੇ ਰੰਗ ਨੂੰ ਲੰਬੇ ਸਮੇਂ ਤੋਂ ਬੁਰੀ ਨਜ਼ਰ ਅਤੇ ਨਕਾਰਾਤਮਕ ਊਰਜਾ (Negative Energy) ਤੋਂ ਬਚਾਅ ਦੇ ਪ੍ਰਤੀਕ ਵਜੋਂ ਦੇਖਿਆ ਜਾਂਦਾ ਰਿਹਾ ਹੈ। ਇਸੇ ਕਰਕੇ ਕੁਝ ਲੋਕ ਕਾਲਾ ਕਲਾਵਾ ਪਹਿਨਣਾ ਸ਼ੁਭ ਮੰਨਦੇ ਹਨ। ਉਨ੍ਹਾਂ ਦਾ ਵਿਸ਼ਵਾਸ ਹੈ ਕਿ ਇਹ ਆਲੇ-ਦੁਆਲੇ ਦੀ ਨਕਾਰਾਤਮਕਤਾ ਨੂੰ ਦੂਰ ਰੱਖਣ ਅਤੇ ਸਕਾਰਾਤਮਕ ਊਰਜਾ ਬਣਾਈ ਰੱਖਣ 'ਚ ਮਦਦ ਕਰਦਾ ਹੈ।

ਕਿਸ ਦਿਨ ਧਾਰਨ ਕਰਨਾ ਸ਼ੁਭ?

ਧਾਰਮਿਕ ਮਾਨਤਾਵਾਂ ਅਨੁਸਾਰ, ਸੋਮਵਾਰ, ਮੰਗਲਵਾਰ ਤੇ ਸ਼ਨੀਵਾਰ ਨੂੰ ਕਾਲਾ ਕਲਾਵਾ ਧਾਰਨ ਕਰਨਾ ਸ਼ੁੱਭ ਮੰਨਿਆ ਜਾਂਦਾ ਹੈ। ਵਿਸ਼ੇਸ਼ ਤੌਰ 'ਤੇ ਸ਼ਿਵ ਮੰਦਰ ਜਾਂ ਕਾਲ ਭੈਰਵ ਮੰਦਰ 'ਚ ਪੂਜਾ-ਅਰਚਨਾ ਤੋਂ ਬਾਅਦ ਇਸ ਨੂੰ ਪਹਿਨਣ ਦੀ ਪਰੰਪਰਾ ਕਈ ਥਾਵਾਂ 'ਤੇ ਦੇਖਣ ਨੂੰ ਮਿਲਦੀ ਹੈ। ਹਾਲਾਂਕਿ, ਇਸਦੇ ਲਾਭਾਂ ਨੂੰ ਲੈ ਕੇ ਕੋਈ ਵਿਗਿਆਨਕ ਪ੍ਰਮਾਣ ਉਪਲਬਧ ਨਹੀਂ ਹੈ, ਇਸ ਲਈ ਇਸ ਨੂੰ ਪੂਰੀ ਤਰ੍ਹਾਂ ਆਸਥਾ ਅਤੇ ਧਾਰਮਿਕ ਵਿਸ਼ਵਾਸ ਨਾਲ ਜੁੜਿਆ ਵਿਸ਼ਾ ਮੰਨਿਆ ਜਾਂਦਾ ਹੈ।