Tarntaran News : ਰਾਜੂ ਸ਼ੂਟਰ ਤੇ ਹੈਪੀ ਬਾਬਾ ਸਣੇ 7 ਜਣਿਆਂ ਕੋਲੋਂ ਸੱਤ ਪਿਸਤੌਲ ਬਰਾਮਦ, ਪੁਲਿਸ ਨੇ ਪੈਲੇਸ ’ਚ ਪਾਰਟੀ ਕਰਦਿਆਂ ਫੜੇ ਸਨ 7 ਗੈਂਗਸਟਰ

ਜਸਪਾਲ ਸਿੰਘ ਜੱਸੀ•, ਪੰਜਾਬੀ ਜਾਗਰਣ, ਤਰਨਤਾਰਨ : ਪਿੰਡ ਨੌਰੰਗਾਬਾਦ ’ਚ ਸਥਿਤ ਵਿਆਹ ਪੈਲੇਸ ਵਿੱਚੋਂ ਪੰਜ ਸਾਥੀਆਂ ਸਮੇਤ ਗ੍ਰਿਫਤਾਰ ਕੀਤੇ ਗਏ ਚਰਨਜੀਤ ਸਿੰਘ ਰਾਜੂ ਸ਼ੂਟਰ ਤੇ ਹਰਪ੍ਰੀਤ ਸਿੰਘ ਹੈਪੀ ਬਾਬਾ ਤੇ ਹੋਰਨਾਂ ਕੋਲੋਂ ਪੁਲਿਸ ਨੇ ਸੱਤ ਪਿਸਤੌਲ ਅਤੇ ਕਾਰਤੂਸ ਬਰਾਮਦ ਕਰਨ ਦਾ ਦਾਅਵਾ ਕੀਤਾ ਗਿਆ ਹੈ। ਸੱਤੇ ਜਣੇ 26 ਨਵੰਬਰ ਨੂੰ ਉਸ ਵੇਲੇ ਗ੍ਰਿਫਤਾਰ ਕੀਤੇ ਗਏ ਸਨ, ਜਦੋਂ ਉਹ ਜੇਲ੍ਹ ਵਿਚ ਰਿਹਾਅ ਹੋਣ ਦੀ ਖੁਸ਼ੀ ਵਿਚ ਪਾਰਟੀ ਕਰ ਰਹੇ ਸੀ।

ਸ਼ਨਿੱਚਰਵਾਰ ਨੂੰ ਉਕਤ ਜਾਣਕਾਰੀ ਦਿੰਦਿਆਂ ਐੱਸਐੱਸਪੀ ਸੁਰੇਂਦਰ ਲਾਂਬਾ ਨੇ ਦੱਸਿਆ ਕਿ ਸੀਆਈਏ ਸਟਾਫ ਤਰਨਤਾਰਨ ਦੇ ਇੰਚਾਰਜ ਇੰਸਪੈਕਟਰ ਪ੍ਰਭਜੀਤ ਸਿੰਘ ਪੁਲਿਸ ਪਾਰਟੀ ਸਮੇਤ ਗਸ਼ਤ ’ਤੇ ਸਨ। ਇਸੇ ਦੌਰਾਨ ਉਨ੍ਹਾਂ ਨੂੰ ਸੂਚਨਾ ਮਿਲੀ ਕਿ ਚਰਨਜੀਤ ਰਾਜੂ ਸ਼ੂਟਰ ਵਾਸੀ ਪਿੰਡ ਸੰਘੇ ਅਤੇ ਹਰਪ੍ਰੀਤ ਸਿੰਘ ਹੈਪੀ ਬਾਬਾ ਵਾਸੀ ਅਲਾਦੀਪੁਰ ਨੇ ਮਿਲ ਕੇ ਜੇਲ੍ਹ ਵਿੱਚੋਂ ਰਿਹਾਅ ਹੋਣ ਦੀ ਖੁਸ਼ੀ ਵਿਚ ਨੌਰੰਗਾਬਾਦ ਸਥਿਤ ਪੈਲੇਸ ਵਿਚ ਪਾਰਟੀ ਰੱਖੀ ਹੈ। ਜਿੱਥੇ ਇਨ੍ਹਾਂ ਨੇ ਆਪਣੇ ਵਾਕਫ਼ ਵੀ ਸੱਦੇ ਹੋਏ ਹਨ ਅਤੇ ਗੈਂਗਸਟਰਾਂ ਦਰਮਿਆਨ ਕੋਈ ਸੁਲ੍ਹਾ-ਸਫ਼ਾਈ ਹੋਣੀ ਸੀ।

ਸੂਚਨਾ ਸੀ ਕਿ ਰਾਜੂ ਸ਼ੂਟਰ ਤੇ ਹੈਪੀ ਬਾਬਾ ਸਮੇਤ ਇਨ੍ਹਾਂ ਦੇ ਸਾਥੀਆਂ ਕੋਲ ਅਸਲਾ ਵੀ ਹੈ। ਇਸ ’ਤੇ ਸੀਆਈਏ ਸਟਾਫ ਦੇ ਇੰਚਾਰਜ ਨੇ ਵੱਖ ਵੱਖ ਟੀਮਾਂ ਤਿਆਰ ਕਰ ਕੇ ਨੌਰੰਗਾਬਾਦ ਦੇ ਸ਼ਾਹ ਪੈਲੇਸ ’ਚ ਛਾਪੇਮਾਰੀ ਕੀਤੀ ਹੈਪੀ ਬਾਬਾ ਕੋਲੋਂ ਇਕ ਪਿਸਤੌਲ ਤੇ ਦੋ ਕਾਰਤੂਸ ਮਿਲੇ ਸਨ ਜਦੋਂਕਿ ਰਾਜੂ ਸ਼ੂਟਰ ਕੋਲੋਂ ਵੀ 32 ਬੋਰ ਦਾ ਪਿਸਤੌਲ ਤੇ 2 ਕਾਰਤੂਸ ਮਿਲੇ ਹਨ। ਐੱਸਐੱਸਪੀ ਨੇ ਦੱਸਿਆ ਕਿ ਇਨ੍ਹਾਂ ਤੋਂ ਇਲਾਵਾ ਬਾਕੀ ਗ੍ਰਿਫਤਾਰ ਕੀਤੇ ਗਏ ਮਨਜਿੰਦਰ ਸਿੰਘ ਮਨੀ ਵਾਸੀ ਜੋਧਪੁਰ ਕੋਲੋਂ 32 ਬੋਰ ਦਾ ਪਿਸਤੌਲ ਤੇ ਦੋ ਕਾਰਤੂਸ, ਰਾਜਕਰਨ ਸਿੰਘ ਰਾਜਾ ਵਾਸੀ ਸ਼ਹਾਬਪੁਰ ਕੋਲੋਂ ਡੰਮੀ ਪਿਸਤੌਲ, ਬੌਬੀ ਵਾਸੀ ਸਰਾਵਾ ਅਜਨਾਲਾ ਕੋਲੋਂ 30 ਬੋਰ ਦਾ ਪਿਸਤੌਲ ਤੇ ਦੋ ਕਾਰਤੂਸ, ਜੁਗਰਾਜ ਸਿੰਘ ਵਾਸੀ ਨੌਰੰਗਾਬਾਦ ਕੋਲੋਂ 30 ਬੋਰ ਦਾ ਪਿਸਤੌਲ ਤੇ ਦੋ ਕਾਰਤੂਸ ਮਿਲੇ ਜਦੋਂਕਿ ਇਨ੍ਹਾਂ ਦੇ ਨਾਲ ਗੁਰਦੇਵ ਸਿੰਘ ਪੁੱਤਰ ਬਲਵਿੰਦਰ ਸਿੰਘ ਵਾਸੀ ਕੱਕਾ ਕੰਡਿਆਲਾ ਨੂੰ ਵੀ ਗ੍ਰਿਫਤਾਰ ਕੀਤਾ ਗਿਆ।

ਉਨ੍ਹਾਂ ਦੱਸਿਆ ਕਿ ਲੋਕਾਂ ਕੋਲੋਂ ਕੁਲ 7 ਪਿਸਤੌਲ ਅਤੇ ਇਕ ਡੰਮੀ ਪਿਸਤੌਲ ਮਿਲੀ ਹੈ। ਐੱਸਐੱਸਪੀ ਨੇ ਲਾਂਬਾ ਨੇ ਇਹ ਵੀ ਦੱਸਿਆ ਕਿ ਗੈਂਗਸਟਰ ਰਾਜੂ ਸ਼ੂਟਰ ਦੇ ਖਿਲਾਫ ਪਹਿਲਾਂ ਵੀ ਵੱਖ-ਵੱਖ ਧਾਰਾਵਾਂ ਤਹਿਤ 17 ਮੁਕੱਦਮੇ ਦਰ ਹਨ ਅਤੇ 18 ਅਕਤੂਬਰ ਨੂੰ ਹੀ ਕਪੂਰਥਲਾ ਜੇਲ੍ਹ ’ਚੋਂ ਜ਼ਮਾਨਤ ’ਤੇ ਰਿਹਾਅ ਹੋਇਆ ਸੀ ਜਦੋਂਕਿ ਹੈਪੀ ਬਾਬਾ ਵਿਰੁੱਧ 16 ਮੁਕੱਦਮੇ ਦਰਜ ਹਨ ਤੇ ਇਹ ਕੇਂਦਰੀ ਜੇਲ੍ਹ ਹੁਸ਼ਿਆਰਪੁਰ ਤੋਂ ਜ਼ਮਾਨਤ ’ਤੇ ਆਇਆ ਹੈ। ਦੋ ਦਿਨਾਂ ਦੇ ਰਿਮਾਂਡ ਦੌਰਾਨ ਹੈਪੀ ਬਾਬਾ ਦੀ ਨਿਸ਼ਾਨਦੇਹੀ ’ਤੇ ਉਸ ਦੇ ਘਰੋਂ ਪਿਸਤੌਲ ਅਤੇ ਦੋ ਕਾਰਤੂਸ ਮਿਲੇ ਜਦੋਂਕਿ ਰਾਜੂ ਦੀ ਨਿਸ਼ਾਨਦੇਹੀ ’ਤੇ ਉਸ ਦੇ ਘਰੋਂ ਵੀ ਪਿਸਤੌਲ ਤੇ ਦੋ ਕਾਰਤੂਸ ਬਰਾਮਦ ਹੋਏ ਹਨ।