ਪੱਤਰ ਪੇ੍ਰਰਕ, ਪਟਿਆਲਾ : ਲੋੜੀਂਦੀ ਪਾਤਰਤਾ ਰੱਖਣ ਵਾਲੇ ਸਾਬਕਾ ਫ਼ੌਜੀ ਹੁਣ ਪੰਜਾਬੀ ਯੂਨੀਵਰਸਿਟੀ ਤੋਂ ਗ੍ਰੈਜੂਏਟ ਡਿਗਰੀ ਹਾਸਲ ਕਰ ਸਕਣਗੇ, ਜੋ ਉਨ੍ਹਾਂ ਲਈ 'ਏ' ਤੇ 'ਬੀ' ਸ਼੍ਰੇਣੀ ਦੀ ਨੌਕਰੀ ਪ੍ਰਰਾਪਤ ਕਰਨ 'ਚ ਸਹਾਈ ਹੋਵੇਗੀ। ਇਸ ਮਕਸਦ ਲਈ ਡਾਇਰੈਕਟੋਰੇਟ ਆਫ਼ ਡਿਫ਼ੈਂਸ ਸਰਵਿਸ ਵੈੱਲਫੇਅਰ ਤੇ ਪੰਜਾਬੀ ਯੂਨੀਵਰਸਿਟੀ ਵਿਚਾਲੇ ਇਕ ਇਕਰਾਰਨਾਮਾ ਸਹੀਬੱਧ ਕੀਤਾ ਗਿਆ। ਪੰਜਾਬ ਭਵਨ ਚੰਡੀਗੜ੍ਹ ਵਿਖੇ ਹੋਏ ਪੋ੍ਗਰਾਮ ਦੌਰਾਨ ਕੈਬਨਿਟ ਮੰਤਰੀ ਚੇਤਨ ਸਿੰਘ ਜੌੜਾਮਾਜਰਾ ਦੀ ਅਗਵਾਈ 'ਚ ਹੋਏ ਸਮਾਗਮ ਦੌਰਾਨ ਪੰਜਾਬੀ ਯੂਨੀਵਰਸਿਟੀ ਵੱਲੋਂ ਵਾਈਸ ਚਾਂਸਲਰ ਪੋ੍. ਅਰਵਿੰਦ ਨੇ ਦਸਤਖਤ ਕੀਤੇ ਤੇ ਦੂਜੇ ਪਾਸੇ ਡਾਇਰੈਕਟੋਰੇਟ ਆਫ ਡਿਫ਼ੈਂਸ ਸਰਵਿਸ ਵੈੱਲਫੇਅਰ ਵੱਲੋਂ ਡਾਇਰੈਕਟਰ ਬਿ੍ਗੇਡੀਅਰ ਭੁਪਿੰਦਰ ਸਿੰਘ ਨੇ ਇਸ ਇਕਰਾਰਨਾਮੇ 'ਤੇ ਸਹੀ ਪਾਈ।
ਇਕਰਾਰਨਾਮੇ ਅਨੁਸਾਰ ਹੁਣ ਲੋੜੀਂਦੀ ਪਾਤਰਤਾ ਰੱਖਣ ਵਾਲੇ ਫ਼ੌਜੀ ਆਪਣੇ ਜ਼ਿਲ੍ਹੇ ਦੇ ਡਿਫ਼ੈਂਸ ਸਰਵਿਸ ਵੈੱਲਫੇਅਰ ਅਫ਼ਸਰ ਰਾਹੀਂ ਡਿਗਰੀ ਪ੍ਰਰਾਪਤ ਕਰਨ ਹਿੱਤ ਅਰਜ਼ੀ ਦੇ ਸਕਣਗੇ। ਡਿਫ਼ੈਂਸ ਸਰਵਿਸ ਵੈੱਲਫੇਅਰ ਅਫਸਰ ਦੀ ਸਿਫ਼ਾਰਸ਼ ਉਪਰੰਤ ਅਗਲੇਰੀ ਕਾਰਵਾਈ ਲਈ ਕੇਸ ਸਬੰਧਤ ਨੋਡਲ ਅਫ਼ਸਰ ਕੋਲ਼ ਆਵੇਗਾ ਜਿੱਥੋਂ ਅੱਗੇ ਸਾਰੇ ਕੇਸ ਸੂਚੀਬੱਧ ਰੂਪ 'ਚ ਪੰਜਾਬੀ ਯੂਨੀਵਰਸਿਟੀ ਕੋਲ ਭੇਜੇ ਜਾਣਗੇ। ਇਸ ਮਕਸਦ ਲਈ ਲੋੜੀਂਦੀ ਫ਼ੀਸ ਸਬੰਧਤ ਸਾਬਕਾ ਫ਼ੌਜੀ ਵੱਲੋਂ ਅਦਾ ਕੀਤੀ ਜਾਵੇਗੀ। ਕਾਰਵਾਈ ਮੁਕੰਮਲ ਹੋਣ ਉਪਰੰਤ ਤਿੰਨ ਮਹੀਨੇ ਦੇ ਅੰਦਰ-ਅੰਦਰ ਪੰਜਾਬੀ ਯੂਨੀਵਰਸਿਟੀ ਵੱਲੋਂ ਸਬੰਧਤ ਸਾਬਕਾ ਫ਼ੌਜੀਆਂ ਨੂੰ ਡਿਗਰੀ ਦਿੱਤੀ ਜਾਵੇਗੀ। ਇਸ ਚਲਾਉਣ ਲਈ ਦੋਵੇਂ ਅਦਾਰੇ ਆਪੋ-ਆਪਣੇ 'ਤੇ ਇਕ-ਇਕ ਕੋਆਰਡੀਨੇਟਰ ਤਾਇਨਾਤ ਕਰਨਗੇ। ਇਹ ਇਕਰਾਰਨਾਮਾ ਦਸਤਖ਼ਤ ਹੋਣ ਦੀ ਮਿਤੀ ਤੋਂ ਲਾਗੂ ਹੈ। ਪੰਜ ਸਾਲ ਦਾ ਸਮਾਂ ਹੋਣ ਉਪਰੰਤ ਇਸ ਨੂੰ ਮੁੜ ਪੜਚੋਲਿਆ ਜਾਵੇਗਾ।
ਜ਼ਿਕਰਯੋਗ ਹੈ ਕਿ ਹਰ ਸਾਲ ਕਰੀਬ 21 ਹਜ਼ਾਰ ਸੈਨਿਕ ਫ਼ੌਜ ਦੇ ਵੱਖ-ਵੱਖ ਵਿੰਗਾਂ ਤੋਂ ਸੇਵਾ ਮੁਕਤ ਹੋ ਕੇ ਪੰਜਾਬ ਵਿਚ ਮੁੜ ਰੁਜ਼ਗਾਰ ਲਈ ਆਉਂਦੇ ਹਨ। ਉਨ੍ਹਾਂ ਦੇ ਮੁੜ ਵਸੇਬੇ ਲਈ ਪੰਜਾਬ ਸਰਕਾਰ ਨੇ ਸਰਕਾਰੀ ਨੌਕਰੀ (ਕਲਾਸ ਏ,ਬੀ,ਸੀ,ਡੀ) 'ਚ 13 ਫ਼ੀਸਦੀ ਰਾਖਵੇਂਕਰਨ ਦਾ ਉਪਬੰਧ ਕੀਤਾ ਹੋਇਆ ਹੈ। 15 ਸਾਲ ਦੀ ਨੌਕਰੀ ਕਰਨ ਉਪਰੰਤ ਸੇਵਾਮੁਕਤ ਹੋ ਕੇ ਆਉਣ ਵਾਲੇ ਵਾਲੇ ਫ਼ੌਜੀ ਨੂੰ 'ਵਿਸ਼ੇਸ਼ ਸਿੱਖਿਆ ਪ੍ਰਮਾਣ-ਪੱਤਰ' ਪ੍ਰਦਾਨ ਕੀਤਾ ਜਾਂਦਾ ਹੈ। ਇਹ ਪ੍ਰਮਾਣ-ਪੱਤਰ 'ਸੀ' ਤੇ 'ਡੀ' ਸ਼੍ਰੇਣੀ ਦੀ ਸਰਕਾਰੀ ਨੌਕਰੀ ਲਈ ਯੋਗ ਹੁੰਦਾ ਹੈ ਪਰ ਕਈ ਸਾਬਕਾ ਫ਼ੌਜੀ ਸਾਰੀਆਂ ਯੋਗਤਾਵਾਂ ਪੂਰੀਆਂ ਕਰਨ ਦੇ ਬਾਵਜੂਦ ਵਿੱਦਿਅਕ ਯੋਗਤਾ ਪੱਖੋਂ ਸ਼੍ਰੇਣੀ 'ਏ' ਤੇ 'ਬੀ' ਦੀ ਨੌਕਰੀ ਹਾਸਲ ਕਰਨ ਤੋਂ ਵਾਂਝੇ ਰਹਿ ਜਾਂਦੇ ਹਨ।
ਇਨ੍ਹਾਂ ਸਮੱਸਿਆਵਾਂ ਸਬੰਧੀ ਕੇਂਦਰੀ ਸੈਨਿਕ ਬੋਰਡ, ਨਵੀਂ ਦਿੱਲੀ ਵੱਲੋਂ ਆਂਧਰਾ ਯੂਨੀਵਰਸਿਟੀ, ਵਿਸ਼ਾਖਾਪਟਨਮ ਨਾਲ ਇਕਰਾਰਨਾਮਾ ਸਹੀਬੱਧ ਕੀਤਾ ਹੋਇਆ ਹੈ। ਇਸ ਅਨੁਸਾਰ 1-1-2010 ਤੋਂ ਬਾਅਦ ਘੱਟੋ-ਘੱਟ 15 ਸਾਲ ਦੀਆਂ ਸੇਵਾਵਾਂ ਉਪਰੰਤ ਸੇਵਾ ਮੁਕਤ ਹੋਏ ਫ਼ੌਜੀ, ਜਿਨ੍ਹਾਂ ਕੋਲ਼ ਬੈਚੂਲਰ ਡਿਗਰੀ ਦੇ ਬਰਾਬਰ ਯੋਗਤਾ ਵਾਲਾ ਆਰਮਡ ਫ਼ੋਰਸਜ਼ ਦਾ 'ਆਰਮੀ ਸਪੈਸ਼ਲ ਸਰਟੀਿਫ਼ਕੇਟ ਆਫ਼ ਐਜੂਕੇਸ਼ਨ' ਹੁੰਦਾ ਹੈ ਉਨ੍ਹਾਂ ਨੂੰ ਆਂਧਰਾ ਯੂਨੀਵਰਸਿਟੀ ਵੱਲੋਂ ਰੈਗੂਲਰ ਗਰੈਜੂਏਟ ਡਿਗਰੀ ਦੇ ਬਰਾਬਰ ਦੀ ਡਿਗਰੀ ਦਿੱਤੀ ਜਾਂਦੀ ਹੈ। ਇਸੇ ਹੀ ਤਰਜ 'ਤੇ ਹੁਣ ਪੰਜਾਬੀ ਯੂਨੀਵਰਸਿਟੀ ਤੇ ਪੰਜਾਬ ਸਰਕਾਰ ਦੇ ਮਹਿਕਮੇ ਡਾਇਰੈਕਟੋਰੇਟ ਆਫ਼ ਡਿਫ਼ੈਂਸ ਸਰਵਿਸ ਵੈਲਫ਼ੇਅਰ ਦਰਮਿਆਨ ਇਹ ਤਾਜ਼ਾ ਸਮਝੌਤਾ ਹੋਇਆ ਹੈ।
ਚੰਡੀਗੜ੍ਹ 'ਚ ਸਮਾਗਮ ਦੌਰਾਨ ਪੰਜਾਬੀ ਯੂਨੀਵਰਸਿਟੀ ਵੱਲੋਂ ਡਾ. ਸੰਜੀਵ ਪੁਰੀ ਡਾਇਰੈਕਟਰ ਯੋਜਨਾ ਤੇ ਨਿਰੀਖਣ ਅਤੇ ਡਾਇਰੈਕਟੋਰੇਟ ਆਫ਼ ਡਿਫ਼ੈਂਸ ਸਰਵਿਸ ਵੈੱਲਫ਼ੇਅਰ ਵਲੋਂ ਡਿਪਟੀ ਡਾਇਰੈਕਟਰ ਸੀ.ਡੀ.ਆਰ.ਬੀ. ਐੱਸ. ਵਿਰਕ ਨੇ ਇਸ ਇਕਰਾਰਨਾਮੇ 'ਤੇ ਗਵਾਹਾਂ ਵਜੋਂ ਦਸਤਖ਼ਤ ਕੀਤੇ।
Copyright © 2023 Jagran Prakashan Limited.