ਹਾਊਸ ਮੀਟਿੰਗ ’ਚ 11 ਕਰੋੜ ਦੇ 7 ਮਤੇ ਪਾਸ

ਸ਼ਹਿਰ ਦੇ 30 ਵਾਰਡਾਂ ’ਚ 8.90 ਕਰੋੜ ਨਾਲ ਚਮਕਨਗੀਆਂ ਸੜਕਾਂ 2.47 ਕਰੋੜ ਨਾਲ ਭਰਤੀ, ਵਿਕਾਸ ਦੇ ਹੋਣਗੇ 18 ਕੰਮ ਮਹੇਸ਼ ਕੁਮਾਰ/ਸੁਕੇਤ ਗੁਪਤਾ, ਕਪੂਰਥਲਾ : ਨਗਰ ਨਿਗਮ ਦੇ ਮੀਟਿੰਗ ਹਾਲ ’ਚ ਹਾਊਸ ਦੀ ਮੀਟਿੰਗ ’ਚ 11 ਕਰੋੜ ਰੁਪਏ ਦੇ ਸ਼ਹਿਰ ਦੇ ਵਿਕਾਸ ਸਬੰਧੀ ਮਤੇ ਪਾਸ ਕੀਤੇ ਗਏ ਹਨ। ਵਿਧਾਇਕ ਰਾਣਾ ਗੁਰਜੀਤ ਸਿੰਘ, ਨਿਗਮ ਕਮਿਸ਼ਨਰ ਅਨੁਪਮ ਕਲੇਰ, ਮੇਅਰ ਕੁਲਵੰਤ ਕੌਰ ਤੇ ਕਾਂਗਰਸ ਦੇ ਸਾਰੇ ਕੌਂਸਲਰਾਂ ਦੀ ਮੀਟਿੰਗ ’ਚ ਸ਼ਹਿਰ ਦੇ ਰੁਕੇ ਹੋਏ ਵਿਕਾਸ ਕਾਰਜਾਂ ਨੂੰ ਲੈ ਕੇ ਮਤੇ ਰੱਖੇ ਗਏ, ਜਿਨ੍ਹਾਂ ’ਚ 30 ਵਾਰਡਾਂ ਦੀਆਂ ਸੜਕਾਂ ਦੇ ਕੰਮ ਤੋਂ ਇਲਾਵਾ ਨਗਰ ਨਿਗਮ ’ਚ ਫਾਇਰਮੈਨ-ਫਾਇਰ ਡਰਾਈਵਰ ਦੀ ਭਰਤੀ, ਕੁਝ ਪੰਪਾਂ ਦੀ ਮੁਰੰਮਤ, ਸੀਵਰੇਜ ਟ੍ਰੀਟਮੈਂਟ ਪਲਾਂਟ ਦੀ ਮੈਂਟੀਨੈਂਸ, ਟਾਟਾ ਐਸ ਤੇ ਕੁਝ ਟਰਾਲੀਆਂ ਦੀ ਖਰੀਦਦਾਰੀ, ਫੌਗਿੰਗ ਤੇ ਸ਼ਾਲੀਮਾਰ ਬਾਗ ਦੀ ਚਾਰਦੀਵਾਰੀ ਦੇ ਨਿਰਮਾਣ ਸਬੰਧੀ 18 ਕੰਮ ਪਾਸ ਕੀਤੇ ਗਏ। ਸ਼ੁੱਕਰਵਾਰ ਦੀ ਸ਼ਾਮ ਪੰਜ ਵਜੇ ਨਗਰ ਨਿਗਮ ’ਚ ਸ਼ੁਰੂ ਕੀਤੀ ਹਾਊਸ ਦੀ ਮੀਟਿੰਗ ਕਾਫੀ ਦੇਰ ਤੱਕ ਚੱਲੀ। ਇਸ ’ਚ ਵਿਧਾਇਕ ਰਾਣਾ ਨੇ ਸ਼ਹਿਰ ’ਚ ਵਿਕਾਸ ਨਾ ਹੋਣ ਦਾ ਮਸਲਾ ਚੁੱਕਿਆ। ਇਸ ਦੌਰਾਨ ਹਾਊਸ ਦੀ ਮੀਟਿੰਗ ’ਚ ਰੌਲਾ-ਰੱਪਾ ਵੀ ਰਿਹਾ, ਜਿਸ ’ਚ ਕੁਝ ਤਲਖੀ ਵੀ ਦੇਖੀ ਗਈ। ਇਸ ਦੌਰਾਨ ਹਾਊਸ ਦੀ ਬੈਠਕ ’ਚ ਮਤੇ ਰੱਖਣੇ ਸ਼ੁਰੂ ਕੀਤੇ ਗਏ, ਜਿਸ ’ਚ ਸਭ ਤੋਂ ਪਹਿਲਾਂ ਲਗਪਗ 8.83 ਕਰੋੜ ਰੁਪਏ ਨਾਲ ਸ਼ਹਿਰ ਦੇ 30 ਵਾਰਡਾਂ ਦੀਆਂ ਸੜਕਾਂ ਤੇ ਗਲੀਆਂ ਦੀ ਮੁਰੰਮਤ ਦਾ ਮਤਾ ਰੱਖਿਆ ਗਿਆ, ਜਿਸ ਨੂੰ ਪਾਸ ਕਰ ਦਿੱਤਾ ਗਿਆ। ਇਸ ਨਾਲ ਇਨ੍ਹਾਂ ਵਾਰਡਾਂ ਦੀਆਂ ਗਲੀਆਂ ਦੀ ਹਾਲਤ ਸੁਧਰੇਗੀ ਤੇ ਸੜਕਾਂ ਚਮਕਨਗੀਆਂ। ਇਸ ਤੋਂ ਇਲਾਵਾ ਨਗਰ ਨਿਗਮ ਨਾਲ ਸਬੰਧੀ ਲਗਪਗ 2,45 ਕਰੋੜ ਰੁਪਏ ਦੇ 18 ਕੰਮਾਂ ਦੇ ਮਤੇ ਪੇਸ਼ ਕੀਤੇ ਗਏ, ਜਿਨ੍ਹਾਂ ਨੂੰ ਪਾਸ ਕਰ ਦਿੱਤਾ ਗਿਆ। ਇਨ੍ਹਾਂ 10 ਕੰਮਾਂ ਨਾਲ ਜਿਥੇ ਨਿਗਮ ਦੀ ਹਾਲਤ ’ਚ ਸੁਧਾਰ ਹੋਵੇਗਾ, ਉਥੇ ਮਸ਼ੀਨਰੀ ਵੀ ਵਧੇਗੀ ਤੇ 11 ਫਾਇਰਮੈਨ ਤੇ 6 ਫਾਇਰ ਡਰਾਈਵਰਾਂ ਦੀ ਭਰਤੀ ਦਾ ਰਾਹ ਸਾਫ ਹੋ ਗਿਆ, ਜਿਨ੍ਹਾਂ ਲਈ 38 ਲੱਖ ਰੁਪਏ ਦੀ ਰਕਮ ਰੱਖੀ ਗਈ ਹੈ। ਇਨ੍ਹਾਂ ’ਚ 25 ਐੱਮਐੱਲਡੀ ਵਾਲੇ ਸੀਵਰੇਜ ਟ੍ਰੀਟਮੈਂਟ ਪਲਾਂਟ ਦੀ ਸਾਲਾਨਾ ਮੈਂਟੀਨੈਂਸ ’ਤੇ 91.42 ਲੱਖ ਰੁਪਏ ਰੱਖੇ ਗਏ ਹਨ। ਉੱਧਰ 1..17 ਕਰੋੜ ਤੋਂ ਟਾਟਾ ਐਸ-ਟਰਾਲੀ ਖਰੀਦਦਾਰੀ, ਫੌਗਿੰਗ, ਵਾਟਰ ਪੰਪ ਮੁਰੰਮਤ, ਡੋਜ਼ਰ ਸੈੱਟ ਸਮੇਤ ਕਈ ਕੰਮ ਕਰਵਾਏ ਜਾਣਗੇ। ਇਸ ਤੋਂ ਇਲਾਵਾ ਹਾਊਸ ਬੈਠਕ ’ਚ ਸੇਵਾਦਾਰ ਵਿਸ਼ਾਲ ਖੰਨਾ ਦੀਆਂ ਸੇਵਾਵਾਂ ਖਤਮ ਕਰਨ ਦਾ ਮਤਾ ਪੇਸ਼ ਕੀਤਾ ਗਿਆ, ਕਿਉਂਕਿ ਉਸ ਦੇ ਵਿਰੁੱਧ ਐੱਨਡੀਪੀਐੱਸ ਐਕਟ ਤਹਿਤ ਕੇਸ ਦਰਜ ਹੋਣ ਤੋਂ ਬਾਅਦ 10 ਸਾਲਾਂ ਦੀ ਸਜ਼ਾ ਹੋਈ ਹੈ, ਜਿਸ ਨੂੰ ਹਾਊਸ ਨੇ ਮਨਜ਼ੂਰ ਕਰ ਲਿਆ। ਨਿਗਮ ਕਮਿਸ਼ਨਰ ਅਨੁਪਮ ਕਲੇਰ ਨੇ ਦੱਸਿਆਕਿ ਸ਼ਹਿਰ ਦੇ ਵਿਕਾਸ ਲਈ ਰੱਖੀ ਗਈ ਹਾਊਸ ਦੀ ਮੀਟਿੰਗ ਸਫਲ ਰਹੀ। ਇਸ ’ਚ ਰੱਖੇ ਗਏ ਸਾਰੇ ਮਤੇ ਪਾਸ ਕਰ ਦਿੱਤੇ ਗਏ ਹਨ। 2500 ਲਾਵਾਰਿਸ ਕੁੱਤਿਆਂ ਦੀ ਨਸਬੰਦੀ-ਨਲਬੰਦੀ ਕਰਵਾਏਗਾ ਨਿਗਮ ਸ਼ਹਿਰ ’ਚ ਲਾਵਾਰਿਸ ਕੁੱਤਿਆਂ ਦੀ ਸਮੱਸਿਆ ਦੇ ਹੱਲ ਲਈ ਨਗਰ ਨਿਗਮ ਨੇ ਕਪੂਰਥਲਾ ਨਿਗਮ ਕੋਲ ਨਸਬੰਦੀ-ਨਲਬੰਦੀ ਲਈ ਲੋੜੀਂਦੀ ਜਗ੍ਹਾ ਨਾ ਹੋਣ ਕਾਰਨ ਆਪਣੇ ਖਰਚ ’ਤੇ ਏਬੀਸੀ ਸੈਂਟਰ ਫਗਵਾੜਾ ਨਾਲ ਐੱਮਓਯੂ ਸਾਈਨ ਕਰਕੇ ਇਸ ਕੰਮ ਨੂੰ ਪੂਰਾ ਕਰਨ ਦੀ ਪ੍ਰਵਾਨਗੀ ਦਿੱਤੀ ਗਈ ਹੈ, ਜਿਸ ਨਾਲ ਸ਼ਹਿਰ ਦੇ 2500 ਕੁੱਤਿਆਂ ਦੀ ਨਗਰ ਨਿਗਮ ਨਸਬੰਦੀ-ਨਲਬੰਦੀ ਕਰਵਾਏਗਾ। ਵਿਧਾਇਕ ਨੇ ਚੁੱਕਿਆ 6 ਕਰੋੜ ਦੇ ਫੰਡ ਦਾ ਮੁੱਦਾ ਹਾਊਸ ਦੀ ਮੀਟਿੰਗ ਦੌਰਾਨ ਕਾਫੀ ਅਗ੍ਰੈਸਿਵ ਦਿਸੇ ਵਿਧਾਇਕ ਰਾਣਾ ਗੁਰਜੀਤ ਸਿੰਘ ਨੇ ਨਗਰ ਨਿਗਮ ਕੋਲ ਸੀਵਰੇਜ ਪਾਉਣ ਲਈ ਪਏ 6 ਕਰੋੜ ਦੇ ਫੰਡ ਦਾ ਮਾਮਲਾ ਚੁੱਕਿਆ ਹੈ। ਮੌਕੇ ’ਤੇ ਹੀ ਉਨ੍ਹਾਂ ਨੇ ਸਥਾਨਕ ਸਰਕਾਰਾਂ ਮੰਤਰੀ ਡਾ. ਰਵਜੋਤ ਸਿੰਘ ਨੂੰ ਫੋਨ ਕਰਕੇ ਇਸ ਫੰਡ ਦਾ ਇਸਤੇਮਾਲ ਕਰਨ ਲਈ ਕਿਹਾ, ਜਿਸ ’ਤੇ ਮੰਤਰੀ ਨੇ ਛੇਤੀ ਹੀ ਇਸ ਫੰਡ ਨੂੰ ਸ਼ਹਿਰ ਦੇ ਵਿਕਾਸ ਲਈ ਖਰਚ ਕਰਨ ਦਾ ਭਰੋਸਾ ਦਿੱਤਾ। ਇਸ ਤੋਂ ਬਾਅਦ ਸਾਰੇ ਸੱਤ ਮਤੇ ਹਾਊਸ ਦੀ ਮੀਟਿੰਗ ’ਚ ਪਾਸ ਕੀਤੇ ਗਏ।