ਪੈਨਸ਼ਨਾਂ ਲਗਵਾਉਣ ਲਈ ਲੋਕ ਹੁਣ ਸੇਵਾ ਕੇਂਦਰਾਂ ’ਚ ਧੱਕੇ ਖਾਣ ਲਈ ਹੋਣਗੇ ਮਜਬੂਰ : ਬੇਰੀ

ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਜਲੰਧਰ- ਜ਼ਿਲ੍ਹਾ ਕਾਂਗਰਸ ਕਮੇਟੀ ਸ਼ਹਿਰੀ ਦੇ ਪ੍ਰਧਾਨ ਰਜਿੰਦਰ ਬੇਰੀ ਨੇ ਕਿਹਾ ਕਿ ਪੰਜਾਬ ਸਰਕਾਰ ਨੇ ਜੋ ਬੁਢਾਪਾ, ਵਿਧਵਾ, ਦਿਵਿਆਂਗ ਲੋਕਾਂ ਦੇ ਪੈਨਸ਼ਨਾਂ ਦੇ ਆਫਲਾਈਨ ਫਾਰਮ ਲੈਣੇ ਬੰਦ ਕਰਨ ਦੇ ਹੁਕਮ ਜਾਰੀ ਕੀਤੇ ਹਨ, ਕਾਂਗਰਸ ਪਾਰਟੀ ਇਨ੍ਹਾਂ ਹੁਕਮਾਂ ਦਾ ਸਖਤ ਵਿਰੋਧ ਕਰਦੀ ਹੈ। ਉਨ੍ਹਾਂ ਕਿਹਾ ਕਿ ਇਸ ਸਬੰਧੀ ਅਧਿਕਾਰੀਆਂ ਨੇ ਜੋ ਪੱਤਰ ਜਾਰੀ ਕੀਤਾ ਹੈ, ਉਸ ’ਚ ਸਾਫ਼-ਸਾਫ਼ ਲਿਖਿਆ ਹੈ ਕਿ ਬਿਨੈਕਾਰਾਂ ਨੂੰ ਸੇਵਾਂ ਕੇਂਦਰਾਂ ਰਾਹੀ ਪੈਨਸ਼ਨਾਂ ਲਗਵਾਉਣ ਲਈ ਪ੍ਰੇਰਿਤ ਕੀਤਾ ਜਾਵੇ। ਪਹਿਲਾਂ ਬਜ਼ੁਰਗ, ਅੰਗਹੀਣ ਵਿਅਕਤੀ, ਵਿਧਵਾ ਔਰਤਾਂ ਆਪਣੇ ਇਲਾਕੇ ਦੇ ਕੌਂਸਲਰ ਤੇ ਵਿਧਾਇਕ ਕੋਲ ਜਾ ਕੇ ਆਪਣਾ ਫਾਰਮ ਭਰ ਕੇ ਪੈਨਸ਼ਨ ਲਗਵਾ ਲੈਂਦੇ ਸਨ ਪਰ ਹੁਣ ਇਹ ਸਿਸਟਮ ਬੰਦ ਹੋ ਹੋਣ ਨਾਲ ਹਰ ਕਿਸੇ ਨੂੰ ਪੈਨਸ਼ਨ ਲਗਵਾਉਣ ਲਈ ਸੇਵਾ ਕੇਂਦਰ ਜਾ ਕੇ ਪਰੇਸ਼ਾਨ ਹੋਣਾ ਪਵੇਗਾ। ਬੇਰੀ ਨੇ ਕਿਹਾ ਕਿ ਜੇਕਰ ਇੰਨੇ ਸਾਲਾਂ ਤੋ ਇੰਨਾ ਵਧੀਆਂ ਸਿਸਟਮ ਚੱਲ ਰਿਹਾ ਸੀ ਪਰ ‘ਆਪ’ ਸਰਕਾਰ ਇਸ ਤਰ੍ਹਾਂ ਦਾ ਫ਼ਰਮਾਨ ਜਾਰੀ ਕਰ ਕੇ ਬਜ਼ੁਰਗਾਂ, ਵਿਧਵਾ ਔਰਤਾਂ, ਅੰਗਹੀਣ ਵਿਅਕਤੀਆਂ ਨੂੰ ਪ੍ਰੇਸ਼ਾਨ ਕਰਨ ’ਤੇ ਉਤਾਰੂ ਹੋ ਚੁੱਕੀ ਹੈ। ਪੰਜਾਬ ਸਰਕਾਰ ਨੂੰ ਆਪਣਾ ਇਹ ਲੋਕ ਵਿਰੋਧੀ ਫ਼ਰਮਾਨ ਵਾਪਸ ਲੈਣਾ ਪਵੇਗਾ। ਉਨ੍ਹਾਂ ਕਿਹਾ ਕਿ ਲੋਕ ਭਲਾਈ ਲਈ ਦੋਵਾਂ ਢੰਗਾਂ ਆਫਲਾਈਨ ਤੇ ਆਨਲਾਈਨ ਵੀ ਨਾਲ ਫਾਰਮ ਲਏ ਜਾਣ। ਉਨ੍ਹਾਂ ਦੋਸ਼ ਲਾਇਆ ਕਿ ਪੰਜਾਬ ਸਰਕਾਰ ਨੇ 4 ਸਾਲਾਂ ਦੇ ਰਾਜ ’ਚ ਲੋਕਾਂ ਨੂੰ ਕੋਈ ਹੋਰ ਸਹੂਲਤ ਤਾਂ ਦਿੱਤੀ ਨਹੀਂ, ਜਿਹੜੀਆ ਪੈਨਸ਼ਨਾਂ ਲੱਗ ਰਹੀਆਂ ਸਨ, ਉਹ ਵੀ ਇਹੋ ਜਿਹੇ ਫ਼ਰਮਾਨ ਜਾਰੀ ਕਰ ਕੇ ਬੰਦ ਕਰਵਾਈਆ ਜਾ ਰਹੀਆ ਹਨ। ਬੇਰੀ ਨੇ ਕਿਹਾ ਕਿ ਜੇਕਰ ਸਰਕਾਰ ਨੇ ਇਹ ਫੈਸਲਾ ਵਾਪਸ ਨਾ ਲਿਆ ਤਾਂ ਕਾਂਗਰਸ ਪਾਰਟੀ ਡਿਪਟੀ ਕਮਿਸ਼ਨਰ ਦਫ਼ਤਰ ਵਿਖੇ ਪੰਜਾਬ ਸਰਕਾਰ ਖਿਲਾਫ ਰੋਸ ਪ੍ਰਦਰਸ਼ਨ ਕਰੇਗੀ।