ਬੱਸ ਅੱਡੇ ਵਿਖੇ ਯਾਤਰੀ ਤੇ ਸਿਵਲ ਹਸਪਤਾਲ ’ਚ ਮਰੀਜ਼ ਹੁੰਦੇ ਰਹੇ ਪਰੇਸ਼ਾਨ

ਪੰਜਾਬੀ ਜਾਗਰਣ ਟੀਮ, ਜਲੰਧਰ : ਸਿਰਫ ਪ੍ਰਾਈਵੇਟ ਬੱਸਾਂ ਹੀ ਚੱਲੀਆਂ, ਦਿਵਿਆਂਗ ਤੇ ਬਜ਼ੁਰਗ ਸਵਾਰੀਆਂ ਹੋਈਆਂ ਪਰੇਸ਼ਾਨ ਕਿਲੋਮੀਟਰ ਸਕੀਮ ਤਹਿਤ ਸਰਕਾਰ ਵੱਲੋਂ ਟੈਂਡਰ ਜਾਰੀ ਕਰਨ ਤੋਂ ਬਾਅਦ ਰੋਡਵੇਜ਼ ਕਰਮਚਾਰੀਆਂ ਨੇ ਵਿਰੋਧ ਵਿੱਚ ਅਣਮਿੱਥੇ ਸਮੇਂ ਲਈ ਹੜਤਾਲ ਦਾ ਐਲਾਨ ਕੀਤਾ। ਸ਼ੁੱਕਰਵਾਰ ਸਵੇਰੇ 5 ਵਜੇ ਪੰਜਾਬ ਦੇ ਰੋਡਵੇਜ਼, ਪਨਬੱਸ ਤੇ ਪੀਆਰਟੀਸੀ ਯੂਨੀਅਨ ਕਰਮਚਾਰੀਆਂ ਨੇ ਹੜਤਾਲ ਸ਼ੁਰੂ ਕਰ ਦਿੱਤੀ। ਜਲੰਧਰ ਸਮੇਤ ਸੂਬੇ ਦੇ 18 ਰੋਡਵੇਜ਼ ਤੇ 9 ਪੀਆਰਟੀਸੀ. ਡਿਪੂਆਂ ’ਚ ਤਾਇਨਾਤ ਸੈਂਕੜਿਆਂ ਕਰਮਚਾਰੀਆਂ ਨੇ ਬੱਸਾਂ ਦਾ ਚੱਕਾ ਜਾਮ ਕਰ ਦਿੱਤਾ। ਕਰਮਚਾਰੀਆਂ ਨੇ ਸ਼ੁੱਕਰਵਾਰ ਨੂੰ ਕਿਲੋਮੀਟਰ ਸਕੀਮ ਤਹਿਤ ਨਿੱਜੀ ਬੱਸਾਂ ਦਾ ਟੈਂਡਰ ਖੋਲ੍ਹਣ ਦੇ ਵਿਰੋਧ ’ਚ ਗੇਟ ਰੈਲੀਆਂ ਕਰਨ ਦਾ ਐਲਾਨ ਕੀਤਾ ਸੀ। ਉਨ੍ਹਾਂ ਦੀ ਯੋਜਨਾ ਨੂੰ ਨਾਕਾਮ ਕਰਨ ਲਈ ਪੁਲਿਸ ਨੇ ਸਵੇਰੇ 3 ਵਜੇ ਕਈ ਯੂਨੀਅਨ ਨੇਤਾਵਾਂ ਨੂੰ ਘਰਾਂ ’ਚ ਹੀ ਨਜ਼ਰਬੰਦ ਕਰ ਦਿੱਤਾ ਤੇ ਕੁਝ ਨੂੰ ਹਿਰਾਸਤ ’ਚ ਲਿਆ। ਪੁਲਿਸ ਦੀ ਕਾਰਵਾਈ ਤੋਂ ਨਾਰਾਜ਼ ਕਰਮਚਾਰੀਆਂ ਨੇ ਸੂਬਾ ਪੱਧਰ ’ਤੇ ਅਣਮਿੱਥੇ ਸਮੇਂ ਲਈ ਹੜਤਾਲ ਕਰ ਕੇ ਬੱਸਾਂ ਦਾ ਚੱਕਾ ਜਾਮ ਕਰ ਦਿੱਤਾ। ਸਵੇਰੇ ਪਹਿਲਾਂ ਬੱਸ ਅੱਡੇ ’ਚ ਕਿਸੇ ਵੀ ਸਰਕਾਰੀ ਬੱਸ ਨੂੰ ਦਾਖਲ ਨਹੀਂ ਹੋਣ ਦਿੱਤਾ ਗਿਆ, ਜਿਸ ਨਾਲ ਯਾਤਰੀਆਂ ਨੂੰ ਕਾਫ਼ੀ ਮੁਸ਼ਕਲ ਦਾ ਸਾਹਮਣਾ ਕਰਨਾ ਪਿਆ। ਬਾਅਦ ’ਚ ਸਰਕਾਰੀ ਬੱਸਾਂ ਨੂੰ ਡਿਪੂਆਂ ’ਚ ਖੜ੍ਹੇ ਕਰ ਦਿੱਤਾ ਗਿਆ ਤੇ ਨਿੱਜੀ ਬੱਸਾਂ ਨੇ ਸਾਰੇ ਰੂਟਾਂ ’ਤੇ ਸਵਾਰੀਆਂ ਚੁੱਕਣੀਆਂ ਸ਼ੁਰੂ ਕਰ ਦਿੱਤੀਆਂ। ਯੂਨੀਅਨ ਆਗੂ ਚਾਨਣ ਸਿੰਘ ਤੇ ਵਿਕਰਮਜੀਤ ਸਿੰਘ ਨੇ ਕਿਹਾ ਕਿ ਸਰਕਾਰ ਦੀ ਕਿਲੋਮੀਟਰ ਸਕੀਮ ਟ੍ਰਾਂਸਪੋਰਟ ਵਿਭਾਗ ਨੂੰ ਨਿੱਜੀ ਹੱਥਾਂ ’ਚ ਦੇਣ ਦੀ ਕੋਸ਼ਿਸ਼ ਹੈ, ਜਿਸ ਦਾ ਕਰਮਚਾਰੀ ਵਿਰੋਧ ਕਰ ਰਹੇ ਹਨ। ਹੜਤਾਲ ਉਦੋਂ ਤੱਕ ਜਾਰੀ ਰਹੇਗੀ ਜਦ ਤੱਕ ਸਰਕਾਰ ਸਕੀਮ ਨੂੰ ਪੂਰੀ ਤਰ੍ਹਾਂ ਵਾਪਸ ਨਹੀਂ ਲੈਂਦੀ। ਯੂਨੀਅਨ ਦੇ ਪ੍ਰਧਾਨ ਸਤਪਾਲ ਸਿੰਘ ਤੇ ਸਕੱਤਰ ਰਣਜੀਤ ਸਿੰਘ ਨੇ ਕਿਹਾ ਕਿ ਸਰਕਾਰ ਕਰਮਚਾਰੀਆਂ ਨੂੰ ਵਰਕਸ਼ਾਪਾਂ ਤੇ ਘਰਾਂ ’ਚ ਨਜ਼ਰਬੰਦ ਕਰ ਕੇ ਉਨ੍ਹਾਂ ਦੀ ਆਵਾਜ਼ ਦਬਾਉਣ ਦੀ ਕੋਸ਼ਿਸ਼ ਕਰ ਰਹੀ ਹੈ। ਸਰਕਾਰ ਜਦ ਤੱਕ ਟੈਂਡਰ ਰੱਦ ਨਹੀਂ ਕਰਦੀ, ਹੜਤਾਲ ਜਾਰੀ ਰਹੇਗੀ। ਬੱਸ ਅੱਡੇ ’ਤੇ ਅਚਾਨਕ ਬੱਸ ਸੇਵਾ ਬੰਦ ਹੋਣ ਨਾਲ ਯਾਤਰੀਆਂ ਨੂੰ ਕਾਫ਼ੀ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪਿਆ। ਔਰਤਾਂ ਤੇ ਬਜ਼ੁਰਗਾਂ ਲਈ ਸਥਿਤੀ ਹੋਰ ਵੀ ਗੰਭੀਰ ਰਹੀ, ਕਿਉਂਕਿ ਉਨ੍ਹਾਂ ਨੂੰ ਸਰਕਾਰੀ ਬੱਸਾਂ ’ਚ ਮਿਲਣ ਵਾਲੀ ਮੁਫ਼ਤ ਯਾਤਰਾ ਸਹੂਲਤ ਨਹੀਂ ਮਿਲ ਸਕੀ। ਮਜਬੂਰੀ ’ਚ ਲੋਕਾਂ ਨੂੰ ਨਿੱਜੀ ਬੱਸਾਂ ਵਿਚ ਹੀ ਸਫ਼ਰ ਕਰਨਾ ਪਿਆ। ਬਾਕਸ-- ਯਾਤਰੀਆਂ ਦੇ ਤਜਰਬੇ ਜਸਵੰਤ ਸਿੰਘ ਦਿੱਲੀ ਉਹ ਦਿੱਲੀ ਤੋਂ ਆਏ ਸਨ ਤੇ ਤਰਨਤਾਰਨ ਜਾਣ ਲੱਗੇ ਸਨ, ਨੇ ਕਿਹਾ ਕਿ ਸਵੇਰੇ 9 ਵਜੇ ਬੱਸ ਨੇ ਉਨ੍ਹਾਂ ਨੂੰ ਜਲੰਧਰ ਬੱਸ ਅੱਡੇ ’ਤੇ ਉਤਾਰਿਆ, ਜਿੱਥੇ ਹੜਤਾਲ ਕਾਰਨ 2 ਘੰਟੇ ਇੰਤਜ਼ਾਰ ਕਰਨਾ ਪਿਆ। ਸਰਕਾਰੀ ਬੱਸ ਨਹੀਂ ਮਿਲ ਰਹੀ ਸੀ ਤੇ ਨਿੱਜੀ ਬੱਸਾਂ ’ਚ ਭੀੜ ਵੱਧ ਹੋਣ ਕਾਰਨ ਉਹ ਸਾਮਾਨ ਸਮੇਤ ਬੱਸ ’ਚ ਚੜ੍ਹ ਨਹੀਂ ਸਕੇ। ਕਾਫ਼ੀ ਮਸ਼ੱਕਤ ਤੋਂ ਬਾਅਦ ਉਨ੍ਹਾਂ ਨੂੰ ਸੀਟ ਮਿਲੀ। ਬਾਕਸ-- ਵਨੀਤਾ, ਜਲੰਧਰ ਉਸ ਨੇ ਕਿਹਾ ਕਿ ਹੜਤਾਲ ਬਾਰੇ ਕੋਈ ਜਾਣਕਾਰੀ ਨਹੀਂ ਸੀ। ਉਨ੍ਹਾਂ ਨੇ ਬੱਚਿਆਂ ਨਾਲ ਅੰਮ੍ਰਿਤਸਰ ਵਿਆਹ ਸਮਾਰੋਹ ’ਚ ਜਾਣਾ ਸੀ। ਸਰਕਾਰੀ ਬੱਸ ’ਚ ਉਨ੍ਹਾਂ ਦਾ ਕਿਰਾਇਆ ਨਹੀਂ ਲੱਗਣਾ ਸੀ ਪਰ ਹੜਤਾਲ ਕਾਰਨ ਨਿੱਜੀ ਬੱਸ ’ਚ ਭੀੜ ਹੋਣ ਕਰ ਕੇ ਇੱਕ ਘੰਟੇ ਤੋਂ ਬੱਸ ਅੱਡੇ ’ਤੇ ਇੰਤਜ਼ਾਰ ਕਰ ਰਹੀ ਹੈ। ਬਾਕਸ-- ਬਲਵਿੰਦਰ ਕੌਰ, ਬਜ਼ੁਰਗ ਯਾਤਰੀ ਉਹ ਕਹਿੰਦੀ ਹੈ ਕਿ ਉਹ ਕਪੂਰਥਲਾ ਤੋਂ ਆਈ ਹੈ ਤੇ ਲੁਧਿਆਣਾ ਜਾਣਾ ਹੈ। ਪਹਿਲਾਂ ਕਪੂਰਥਲਾ ’ਚ ਆਧਾਰ ਕਾਰਡ ਵਾਲੀ ਬੱਸ ਦਾ ਇੰਤਜ਼ਾਰ ਕਰਨਾ ਪਿਆ, ਹੁਣ ਜਲੰਧਰ ’ਚ ਫਿਰ ਇੰਤਜ਼ਾਰ ਕਰ ਰਹੀ ਹੈ। ਨਿੱਜੀ ਬੱਸ ਦੇ ਕੰਡਕਟਰ ਨੇ ਉਸ ਨੂੰ ਕਿਰਾਇਆ ਜ਼ਿਆਦਾ ਲੱਗਣ ਦੀ ਗੱਲ ਦੱਸੀ ਹੈ ਤੇ ਬੱਸ ’ਚ ਚੜ੍ਹਾਉਣ ’ਚ ਮਦਦ ਕਰਨ ਦਾ ਭਰੋਸਾ ਦਿੱਤਾ ਹੈ। ਬਾਕਸ-- ਜੂਨੀਅਰ ਡਾਕਟਰਾਂ ਦੀ ਹੜਤਾਲ, ਮਰੀਜ਼ਾਂ ਨੂੰ ਇਲਾਜ ਲਈ ਕਰਨੀ ਪਈ ਉਡੀਕ ਓਪੀਡੀ ’ਚ ਸਿਹਤ ਜਾਂਚ ਲਈ ਕਈ ਘੰਟੇ ਰਹਿਣਾ ਪਿਆ ਖੜ੍ਹੇ, ਵਾਰਡਾਂ ’ਚ ਵੀ ਮਰੀਜ਼ਾਂ ਦੀ ਜਾਂਚ ਰਹੀ ਰੱਬ ਭਰੋਸੇ ਪੱਤਰ ਪ੍ਰੇਰਕ, ਪੰਜਾਬੀ ਜਾਗਰਣ, ਜਲੰਧਰ- ਸਿਵਲ ਹਸਪਤਾਲ ’ਚ ਜੂਨੀਅਰ ਡਾਕਟਰਾਂ ਨੂੰ ਤਨਖਾਹ ਨਾ ਮਿਲਣ ਤੇ ਹੋਸਟਲ ਦੀ ਸਮੱਸਿਆ ਨੂੰ ਲੈ ਕੇ ਤੀਜੇ ਦਿਨ ਵੀ ਹੜਤਾਲ ਜਾਰੀ ਰਹੀ। ਡਾਕਟਰਾਂ ਵੱਲੋਂ ਕੰਮ-ਕਾਜ ਠੱਪ ਕਰਨ ਨਾਲ ਓਪੀਡੀ ਤੇ ਵਾਰਡਾਂ ਦੀਆਂ ਸੇਵਾਵਾਂ ਪ੍ਰਭਾਵਿਤ ਹੋਈਆਂ, ਜਿਸ ਕਾਰਨ ਮਰੀਜ਼ਾਂ ਨੂੰ ਕਾਫ਼ੀ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪਿਆ। ਹੜਤਾਲ ’ਤੇ ਬੈਠੇ ਡਾਕਟਰਾਂ ਨੇ ਕੇਵਲ ਐਮਰਜੈਂਸੀ ਸੇਵਾਵਾਂ, ਜੱਚਾ-ਬੱਚਾ ਸੈਂਟਰ ਦੇ ਲੇਬਰ ਰੂਮ ਤੇ ਆਪ੍ਰੇਸ਼ਨ ਥੀਏਟਰ ਦੀਆਂ ਸੇਵਾਵਾਂ ਹੀ ਚਲਾਈਆਂ। ਉੱਧਰ ਹਸਪਤਾਲ ਦੀ ਕਾਰਜਕਾਰੀ ਮੈਡੀਕਲ ਸੁਪਰਿੰਟੈਂਡੈਂਟ ਡਾ. ਵਰਿੰਦਰ ਕੌਰ ਥਿੰਦ ਨੇ ਦਾਅਵਾ ਕੀਤਾ ਕਿ ਹਸਪਤਾਲ ਦੀਆਂ ਸੇਵਾਵਾਂ ਸੁਚਾਰੂ ਢੰਗ ਨਾਲ ਚੱਲ ਰਹੀਆਂ ਹਨ। ਸਿਵਲ ਹਸਪਤਾਲ ਰੈਜ਼ੀਡੈਂਟ ਡਾਕਟਰਜ਼ ਐਸੋਸੀਏਸ਼ਨ ਦੇ ਪ੍ਰਧਾਨ ਡਾ. ਬਲਜਿੰਦਰ ਸਿੰਘ ਨੇ ਦੱਸਿਆ ਕਿ ਹੜਤਾਲ ਦੌਰਾਨ ਐੱਮਐੰਸ ਦਫ਼ਤਰ ਦੇ ਨੇੜੇ ਜੂਨੀਅਰ ਡਾਕਟਰ ਬੈਠੇ ਰਹੇ। 44 ਡੀਐੱਨਬੀ ਕਰ ਰਹੇ ਡਾਕਟਰ ਤੇ 7 ਡੀਐੱਨਬੀ ਪੂਰੀ ਕਰਨ ਤੋਂ ਬਾਅਦ ਸਰਕਾਰੀ ਨੀਤੀਆਂ ਤਹਿਤ ਸਿਵਲ ਹਸਪਤਾਲ ’ਚ ਸੇਵਾ ਦੇ ਰਹੇ ਡਾਕਟਰਾਂ ਨੂੰ ਅਕਤੂਬਰ ਮਹੀਨੇ ਦੀ ਤਨਖਾਹ ਨਹੀਂ ਮਿਲੀ, ਜਦਕਿ ਨਵੰਬਰ ਵੀ ਖ਼ਤਮ ਹੋਣ ਨੂੰ ਹੈ। ਡੀਐੱਨਬੀ ਕਰ ਰਹੇ ਡਾਕਟਰਾਂ ਦੀ ਗਿਣਤੀ ਵੱਧ ਰਹੀ ਹੈ ਪਰ ਹੋਸਟਲ ਦੀ ਸਮੱਸਿਆ ਹੱਲ ਨਾ ਹੋਣ ਕਰ ਕੇ ਉਨ੍ਹਾਂ ਨੂੰ ਬਹੁਤ ਪਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਡਾਕਟਰਾਂ ਨੂੰ ਹਸਪਤਾਲ ਤੋਂ ਬਾਹਰ ਕਮਰੇ ਕਿਰਾਏ ’ਤੇ ਲੈ ਕੇ ਰਹਿਣਾ ਪੈ ਰਿਹਾ ਹੈ। ਡੀਐੱਨਬੀ ਕਰ ਰਹੇ ਡਾਕਟਰਾਂ ਨੂੰ 68 ਹਜ਼ਾਰ ਤੇ ਡੀਐੱਨਬੀ ਕਰਨ ਤੋਂ ਬਾਅਦ ਸੇਵਾ ਦੇ ਰਹੇ ਡਾਕਟਰਾਂ ਨੂੰ ਪ੍ਰਤੀ ਮਹੀਨਾ 81 ਹਜ਼ਾਰ ਰੁਪਏ ਸਟਾਈਪੈਂਡ ਦੇਣ ਦਾ ਪ੍ਰਬੰਧ ਹੈ। ਪ੍ਰਧਾਨ ਡਾ. ਬਲਜਿੰਦਰ ਸਿੰਘ ਨੇ ਕਿਹਾ ਕਿ ਜਦ ਤੱਕ ਮੰਗਾਂ ਪੂਰੀਆਂ ਨਹੀਂ ਹੁੰਦੀਆਂ, ਡਾਕਟਰ ਕੰਮ ’ਤੇ ਵਾਪਸ ਨਹੀਂ ਜਾਣਗੇ। ਐਸੋਸੀਏਸ਼ਨ ’ਚ ਹੜਤਾਲ ਜਾਰੀ ਰੱਖਣ ਜਾਂ ਖਤਮ ਕਰਨ ਨੂੰ ਲੈ ਕੇ ਉੱਚ ਅਧਿਕਾਰੀਆਂ ’ਚ ਚਰਚਾ ਤਾਂ ਚੱਲ ਰਹੀ ਹੈ ਪਰ ਹਾਲੇ ਕੋਈ ਨਤੀਜਾ ਨਹੀਂ ਨਿਕਲਿਆ। ਓਪੀਡੀ ’ਚ ਡਾਕਟਰ ਘੱਟ ਹੋਣ ਕਾਰਨ ਮਰੀਜ਼ਾਂ ਨੂੰ ਆਪਣੀ ਵਾਰੀ ਲਈ ਲੰਮਾ ਇੰਤਜ਼ਾਰ ਕਰਨਾ ਪਿਆ। ਵਾਰਡਾਂ ’ਚ ਵੀ ਸਮੇਂ ’ਤੇ ਡਾਕਟਰ ਰਾਊਂਡ ’ਤੇ ਨਾ ਪਹੁੰਚਣ ਕਾਰਨ ਦਾਖ਼ਲ ਮਰੀਜ਼ਾਂ ਨੂੰ ਦਿੱਕ਼ਤਾਂ ਦਾ ਸਾਹਮਣਾ ਕਰਨਾ ਪਿਆ। ਦੂਜੇ ਪਾਸੇ ਕਾਰਜਕਾਰੀ ਮੈਡੀਕਲ ਸੁਪਰਿੰਟੈਂਡੈਂਟ ਡਾ. ਵਰਿੰਦਰ ਕੌਰ ਥਿੰਦ ਨੇ ਕਿਹਾ ਕਿ ਹਸਪਤਾਲ ’ਚ ਇੰਟਰਨਸ਼ਿਪ ਕਰ ਰਹੇ ਡਾਕਟਰਾਂ ਤੋਂ ਸੇਵਾਵਾਂ ਲਈਆਂ ਜਾ ਰਹੀਆਂ ਹਨ ਤੇ ਹਸਪਤਾਲ ਦੀਆਂ ਸੇਵਾਵਾਂ ਬਿਨਾ ਕਿਸੇ ਰੁਕਾਵਟ ਦੇ ਚੱਲ ਰਹੀਆਂ ਹਨ।