ਨਬਾਲਿਗ ਨੂੰ ਸੱਤ ਘੰਟਿਆਂ ’ਚ ਬਰਾਮਦ ਕਰਕੇ ਕੀਤਾ ਵਾਰਸਾਂ ਹਵਾਲੇ

ਰਾਕੇਸ਼ ਗਾਂਧੀ, ਪੰਜਾਬੀ ਜਾਗਰਣ, ਜਲੰਧਰ : ਥਾਣਾ ਡਵੀਜ਼ਨ ਨੰਬਰ 3 ਅਧੀਨ ਆਉਂਦੇ ਖੇਤਰ ’ਚ ਰਹਿੰਦੇ ਇਕ ਪਰਿਵਾਰ ਦਾ 13 ਸਾਲਾਂ ਦਾ ਲਾਪਤਾ ਹੋਇਆ ਲੜਕਾ, ਕਮਿਸ਼ਨਰੇਟ ਪੁਲਿਸ ਨੇ 7 ਘੰਟੇ ’ਚ ਬਰਾਮਦ ਕਰਕੇ ਵਾਰਸਾਂ ਨੂੰ ਸੌਂਪ ਦਿੱਤਾ ਹੈ। ਏਡੀਸੀਪੀ (ਸਥਾਨਕ) ਸੁਖਵਿੰਦਰ ਸਿੰਘ ਨੇ ਦੱਸਿਆ ਕਿ ਥਾਣਾ ਡਵੀਜ਼ਨ ਨੰਬਰ 3 ਦੇ ਮੁਖੀ ਰਜਿੰਦਰ ਸਿੰਘ ਨੂੰ ਸ਼ਿਕਾਇਤ ਮਿਲੀ ਸੀ ਕਿ ਇਕ 13 ਸਾਲ ਦਾ ਬੱਚਾ ਲਾਪਤਾ ਹੋ ਗਿਆ ਹੈ। ਜਦੋਂ ਥਾਣਾ ਮੁਖੀ ਨੇ ਮਾਮਲੇ ਦੀ ਜਾਂਚ ਕੀਤੀ ਤਾਂ ਪਤਾ ਲੱਗਾ ਕਿ ਬਚੇ ਦੀ ਮਾਂ ਨੇ ਉਸ ਨੂੰ ਨਵੇਂ ਬੂਟ ਪਾਉਣ ਤੋਂ ਰੋਕਿਆ ਸੀ। ਥਾਣਾ ਮੁਖੀ ਨੇ ਜਦ ਇਲਾਕੇ ਦੇ ਸੀਸੀਟੀਵੀ ਕੈਮਰਿਆਂ ਦੀ ਜਾਂਚ ਕੀਤੀ, ਤਾਂ ਪਤਾ ਲਗਾ ਕਿ ਬਚਾ ਘਰ ਤੋਂ ਰੇਲਵੇ ਸਟੇਸ਼ਨ ਗਿਆ ਹੈ ਤੇ ਉਹ ਅੰਮ੍ਰਿਤਸਰ ਜਾਣ ਵਾਲੀ ਗੱਡੀ ’ਚ ਬੈਠਾ ਹੈ। ਉਨ੍ਹਾਂ ਅੰਮ੍ਰਿਤਸਰ ’ਚ ਰਹਿੰਦੇ ਬੱਚੇ ਦੇ ਰਿਸ਼ਤੇਦਾਰਾਂ ਨਾਲ ਸੰਪਰਕ ਕੀਤਾ, ਤਾਂ ਪਤਾ ਲਗਾ ਕਿ ਬੱਚਾ ਉੱਥੇ ਪਹੁੰਚ ਚੁੱਕਾ ਹੈ, ਜਿਸ ਤੋਂ ਬਾਅਦ ਉਨ੍ਹਾਂ ਬੱਚੇ ਨੂੰ ਬਰਾਮਦ ਕਰਕੇ ਵਾਰਸਾਂ ਹਵਾਲੇ ਕਰ ਦਿੱਤਾ ਹੈ।