5% ਕਮਿਸ਼ਨ ਕਾਰਨ ISI ਦੇ ਜਾਲ ’ਚ ਫਸ ਗਿਆ ਮਲਸੀਆਂ ਦਾ ਹਲਵਾਈ, ਵਿਦੇਸ਼ ਬੈਠੇ ਵਿਅਕਤੀ ਨੂੰ ਟ੍ਰਾਂਸਫਰ ਕੀਤੇਸੀ 35 ਲੱਖ ਰੁਪਏ; ਇੰਝ ਖੁੱਲ੍ਹਿਆ ਭੇਤ

ਸੁਕਰਾਂਤ, ਜਾਗਰਣ, ਜਲੰਧਰ : ਹਰਿਆਣਾ ਦੇ ਨੂੰਹ ਜ਼ਿਲ੍ਹੇ ਦੀ ਪੁਲਿਸ ਨੇ ਜਲੰਧਰ ਦੇ ਮਲਸੀਆਂ ਇਲਾਕੇ ਤੋਂ ਮਠਿਆਈ ਕਾਰੋਬਾਰੀ ਅਜੇ ਅਰੋੜਾ ਨੂੰ ਗ੍ਰਿਫ਼ਤਾਰ ਕੀਤਾ ਸੀ। ਇਹ ਨੈੱਟਵਰਕ ਪਾਕਿਸਤਾਨੀ ਖੁਫੀਆ ਏਜੰਸੀ ਆਈਐਸਆਈ ਦੇ ਇਸ਼ਾਰੇ 'ਤੇ ਕੰਮ ਕਰਦਾ ਸੀ। ਜਲੰਧਰ 'ਚ ਵੀਰਵਾਰ ਨੂੰ ਹੋਈ ਜਾਂਚ 'ਚ ਇਹ ਸਪਸ਼ਟ ਹੋਇਆ ਕਿ ਅਰੋੜਾ 5 ਫ਼ੀਸਦ ਕਮਿਸ਼ਨ ਦੇ ਲਾਲਚ 'ਚ ਆਈਐੱਸਆਈ ਦੇ ਨੈੱਟਵਰਕ ਵਿਚ ਫਸ ਗਿਆ ਸੀ ਤੇ ਦੇਸ਼ ਵਿਰੋਧੀ ਗਤੀਵਿਧੀਆਂ ਵਿਚ ਸ਼ਾਮਲ ਲੋਕਾਂ ਦੀ ਫੰਡਿੰਗ ਦਾ ਜ਼ਰੀਆ ਬਣ ਗਿਆ।

ਅਰੋੜਾ ਨੇ ਸਵੀਕਾਰ ਕੀਤਾ ਕਿ ਉਸ ਨੇ ਰਿਜ਼ਵਾਨ ਦੇ ਕਹਿਣ 'ਤੇ 35 ਲੱਖ ਰੁਪਏ ਵਿਦੇਸ਼ ਵਿਚ ਬੈਠੇ ਵਿਅਕਤੀ ਲਈ ਭੇਜੇ ਸਨ, ਪਰ ਉਸ ਨੂੰ ਇਹ ਨਹੀਂ ਪਤਾ ਸੀ ਕਿ ਇਹ ਪੈਸਾ ਕਿੱਥੇ ਤੇ ਕਿਸ ਲਈ ਵਰਤਿਆ ਜਾ ਰਿਹਾ ਹੈ। ਉਸ ਨੂੰ ਇਹ ਵੀ ਨਹੀਂ ਪਤਾ ਸੀ ਕਿ ਪੈਸੇ ਲੈਣ ਵਾਲਾ ਕੌਣ ਹੈ। ਰਿਜ਼ਵਾਨ ਉਸ ਦਾ ਪੁਰਾਣਾ ਜਾਣਕਾਰ ਸੀ। ਉਸ ਨੇ 35 ਲੱਖ ਰੁਪਏ ਟ੍ਰਾਂਸਫਰ ਕਰਨ ਲਈ ਕਿਹਾ ਅਤੇ ਬਦਲੇ ਵਿਚ 5 ਪ੍ਰਤੀਸ਼ਤ ਕਮਿਸ਼ਨ ਦੇਣ ਦੀ ਪੇਸ਼ਕਸ਼ ਕੀਤੀ।

ਹਰਿਆਣਾ ਦੀ ਨੂੰਹ ਪੁਲਿਸ ਹੁਣ ਨੈੱਟਵਰਕ ਦੀ ਕੜੀਆਂ ਲੱਭਣ ਵਿਚ ਜੁਟ ਗਈ ਹੈ। ਨੂੰਹ ਦੇ ਪਿੰਡ ਖਰਖੜੀ ਦੇ ਵਕੀਲ ਰਿਜ਼ਵਾਨ, ਜਿਸ ਨੂੰ ਹਾਲ ਹੀ ਵਿਚ ਆਈਐੱਸਆਈ ਨਾਲ ਜੁੜੇ ਹਵਾਲਾ ਮਾਡਿਊਲ ਵਿਚ ਗ੍ਰਿਫ਼ਤਾਰ ਕੀਤਾ ਗਿਆ ਸੀ, ਨੇ ਪੁੱਛਗਿੱਛ ਵਿਚ ਅਰੋੜਾ ਦਾ ਨਾਂ ਲਿਆ ਸੀ। ਰਿਜ਼ਵਾਨ ਨੇ ਪੁਲਿਸ ਨੂੰ ਦੱਸਿਆ ਸੀ ਕਿ ਉਸ ਨੇ ਹਾਲ ਹੀ ਵਿਚ 30-35 ਲੱਖ ਰੁਪਏ ਹਵਾਲਾ ਜ਼ਰੀਏ ਅਰੋੜਾ ਨੂੰ ਭੇਜੇ ਸਨ।

ਲੋਕਾਂ ਮੁਤਾਬਕ ਸ਼ੱਕੀ ਵਿਅਕਤੀ ਅਜੇ ਦੇ ਦਫਤਰ ਆਉਂਦੇ ਰਹੇ :

ਅਜੇ ਅਰੋੜਾ ਨੇ ਮਠਿਆਈਆਂ ਦੀ ਪੁਰਾਣੀ ਹੱਟੀ ਦੇ ਨਾਲ ਹੀ ਵੈਸਟ੍ਰਨ ਯੂਨੀਅਨ ਟ੍ਰਾਂਸਫਰ ਦਫਤਰ ਵੀ ਚਲਾਇਆ ਹੋਇਆ ਸੀ। ਲੋਕਾਂ ਮੁਤਾਬਕ ਪਿਛਲੇ ਕੁਝ ਮਹੀਨਿਆਂ ਵਿਚ ਉਸ ਦੀ ਹੱਟੀ 'ਤੇ ਕਈ ਸ਼ੱਕੀ ਲੋਕ ਆਉਂਦੇ ਸਨ ਪਰ ਕਿਸੇ ਨੇ ਇਸ 'ਤੇ ਧਿਆਨ ਨਹੀਂ ਦਿੱਤਾ। ਅਰੋੜਾ ਦਾ ਪਰਿਵਾਰ ਭਾਜਪਾ ਨਾਲ ਜੁੜਿਆ ਹੋਇਆ ਸੀ ਤੇ ਪਾਰਟੀ ਦੇ ਕਈ ਪ੍ਰੋਗਰਾਮਾਂ ਵਿਚ ਸਰਗਰਮ ਭਾਗ ਲੈਂਦਾ ਰਿਹਾ ਹੈ।