ਰਿਸ਼ਤੇਦਾਰਾਂ ਦੇ ਨਾਂ ’ਤੇ ਠੇਕੇ ਲੈਣ ਦੇ ਮਾਮਲੇ ’ਚ ਮੰਗੀ ਰਿਪੋਰਟ

ਜਾਸ, ਜਲੰਧਰ : ਸਥਾਨਕ ਸਰਕਾਰਾਂ ਵਿਭਾਗ ਨੇ ਜਲੰਧਰ ’ਚ ਜੂਨੀਅਰ ਇੰਜੀਨੀਅਰ ਤੇ ਐੱਸਡੀਓ ਪੱਧਰ ਦੇ ਮੁਲਾਜ਼ਮਾਂ ਦੇ ਕਰੀਬੀ ਰਿਸ਼ਤੇਦਾਰਾਂ ਦੇ ਨਾਂ 'ਤੇ ਵਿਕਾਸ ਕਾਰਜਾਂ ਦੇ ਠੇਕੇ ਲੈਣ ਦੇ ਮਾਮਲੇ ’ਚ ਰਿਪੋਰਟ ਮੰਗੀ ਹੈ। ਇਸ ਸਬੰਧੀ ਨਗਰ ਨਿਗਮ ਕਮਿਸ਼ਨਰ ਸੰਦੀਪ ਰਿਸ਼ੀ ਨੂੰ ਪੱਤਰ ਲਿਖ ਕੇ ਕਿਹਾ ਹੈ ਕਿ ਜਾਂਚ ਕਰਕੇ ਤੁਰੰਤ ਰਿਪੋਰਟ ਭੇਜੀ ਜਾਵੇ। ਪੱਤਰ ’ਚ ਨਗਰ ਨਿਗਮ ਦੀ ਕਾਰਜਪ੍ਰਣਾਲੀ ਤੇ ਇਸ ਸਬੰਧੀ 4 ਨਵੰਬਰ ਨੂੰ ਲਿਖੇ ਪੱਤਰ ’ਤੇ ਕੋਈ ਕਾਰਵਾਈ ਨਾ ਕਰਨ 'ਤੇ ਨਾਰਾਜ਼ਗੀ ਵੀ ਪ੍ਰਗਟਾਈ ਗਈ ਹੈ। ਪੱਤਰ ’ਚ ਲਿਖਿਆ ਗਿਆ ਹੈ ਕਿ 4 ਨਵੰਬਰ ਨੂੰ ਵੀ ਪੱਤਰ ਲਿਖ ਕੇ ਇਸ ਸਬੰਧੀ ਰਿਪੋਰਟ ਮੰਗੀ ਗਈ ਸੀ ਪਰ ਉਸ ’ਤੇ ਕੋਈ ਕਾਰਵਾਈ ਨਹੀਂ ਕੀਤੀ ਗਈ। ਇਸ ਲਈ ਹੁਣ ਫੌਰੀ ਜਾਂਚ ਕਰਕੇ ਇਸ ਦੀ ਰਿਪੋਰਟ ਭੇਜੀ ਜਾਵੇ। ਇਸ ਪੱਤਰ ਨੂੰ ਵੀ ਆਏ ਨੂੰ ਕਰੀਬ ਇਕ ਹਫਤਾ ਹੋ ਗਿਆ ਹੈ ਪਰ ਹਾਲੇ ਤੱਕ ਰਿਪੋਰਟ ਤਿਆਰ ਨਹੀਂ ਕੀਤੀ ਗਈ। ਇਸ ਤੋਂ ਇਹ ਵੀ ਸੰਕੇਤ ਮਿਲ ਰਿਹਾ ਹੈ ਕਿ ਨਗਰ ਨਿਗਮ ਇਸ ਮਾਮਲੇ ਨੂੰ ਦਬਾਉਣ ਦੀ ਕੋਸ਼ਿਸ਼ ਕਰ ਰਿਹਾ ਹੈ।

ਇਸ ਮਾਮਲੇ ਵਿਚ ਆਊਟਸੋਰਸ ’ਤੇ ਰੱਖੇ ਜੂਨੀਅਰ ਇੰਜੀਨੀਅਰ ਗੀਤਾਂਸ਼ ਦੇ ਸਹੁਰੇ ਦੇ ਨਾਮ 'ਤੇ ਬਣੀ ਕੰਪਨੀ ਗਲੋਬਲ ਕਨਸਟ੍ਰਕਸ਼ਨ ਨੂੰ ਠੇਕੇ ਦੇਣ ਦਾ ਮਾਮਲਾ ਜੱਗ ਜ਼ਾਹਿਰ ਹੋ ਚੁੱਕਾ ਹੈ ਪਰ ਨਿਗਮ ਕੋਈ ਕਾਰਵਾਈ ਨਹੀਂ ਕਰ ਰਿਹਾ। ਇਹ ਵੀ ਹੈਰਾਨੀਜਨਕ ਹੈ ਕਿ ਜੂਨੀਅਰ ਇੰਜੀਨੀਅਰ ਗੀਤਾਂਸ਼ ਖ਼ਿਲਾਫ਼ ਅਧਿਕਾਰੀਆਂ ਕੋਲ ਸਾਰੇ ਸਬੂਤ ਮੌਜੂਦ ਹਨ ਤੇ ਘਰ ਦੇ ਪਤੇ 'ਤੇ ਉਨ੍ਹਾਂ ਦੇ ਸਹੁਰੇ ਦੇ ਨਾਂ ਦੀ ਫਰਮ ਨੂੰ ਠੇਕੇ ਮਿਲਣ ਦਾ ਖੁਲਾਸਾ ਵੀ ਹੋ ਚੁੱਕਾ ਹੈ। ਮੇਅਰ ਵਨੀਤ ਧੀਰ ਨੇ ਇਸ ਮਾਮਲੇ ’ਚ ਕਾਰਵਾਈ ਦੇ ਨਿਰਦੇਸ਼ ਦਿੱਤੇ ਸਨ ਪਰ ਅਧਿਕਾਰੀਆਂ ਨੇ ਕੋਈ ਵੱਡੀ ਕਾਰਵਾਈ ਨਹੀਂ ਕੀਤੀ।

---

ਹਾਊਸ ’ਚ ਉਠੀ ਸੀ ਵਿਜਿਲੈਂਸ ਜਾਂਚ ਦੀ ਮੰਗ

ਨਗਰ ਨਿਗਮ ਹਾਊਸ ਦੀ ਮੀਟਿੰਗ ’ਚ ਵੀ ਜੇਈ ਦੇ ਰਿਸ਼ਤੇਦਾਰ ਦੇ ਟੈਂਡਰ ਲੈਣ ਦਾ ਮਾਮਲਾ ਉਠਿਆ ਸੀ ਪਰ ਹਾਲੇ ਤੱਕ ਕੋਈ ਕਾਰਵਾਈ ਨਹੀਂ ਕੀਤੀ ਗਈ। ਮੇਅਰ ਵਨੀਤ ਧੀਰ ਨੇ ਇਹ ਐਲਾਨ ਕੀਤਾ ਸੀ ਕਿ ਗਲੋਬਲ ਕਨਸਟ੍ਰਕਸ਼ਨ ਫਰਮ ਦੇ ਸਾਰੇ ਠੇਕੇ ਰੱਦ ਕਰ ਦਿੱਤੇ ਜਾਣ। ਫਾਇਨੈਂਸ ਅਤੇ ਕੰਟ੍ਰੈਕਟ ਕਮੇਟੀ ਦੀ ਮੀਟਿੰਗ ਵਿਚ ਵੀ ਸਾਰੇ ਠੇਕੇ ਰੱਦ ਕਰ ਦਿੱਤੇ ਗਏ ਸਨ। ਇਸ ਦੇ ਬਾਵਜੂਦ ਹਾਲੇ ਤੱਕ ਜੂਨੀਅਰ ਇੰਜੀਨੀਅਰ 'ਤੇ ਕੋਈ ਕਾਰਵਾਈ ਨਹੀਂ ਹੋਈ। ਵਿਰੋਧੀ ਕਾਂਗਰਸ ਤੇ ਭਾਜਪਾ ਦੇ ਕੌਂਸਲਰਾਂ ਨੇ ਗੀਤਾਂਸ਼ ਖ਼ਿਲਾਫ਼ ਵਿਜੀਲੈਂਸ ਜਾਂਚ ਦੀ ਮੰਗ ਕੀਤੀ ਸੀ ਪਰ ਹਾਲੇ ਤੱਕ ਇਸ ’ਤੇ ਵੀ ਕੋਈ ਫੈਸਲਾ ਨਹੀਂ ਹੋਇਆ।

---

ਮੰਤਰੀ ਦੇ ਵੈਸਟ ਹਲਕੇ ’ਚ ਕੰਮ ਕਰ ਰਿਹੈ ਜੇਈ

ਜੇਈ ਗੀਤਾਂਸ਼ ਦੇ ਸਹੁਰੇ ਦੀ ਫਰਮ ਗਲੋਬਲ ਕਨਸਟ੍ਰਕਸ਼ਨ ਦਾ ਸਾਰਾ ਧਿਆਨ ਵੈਸਟ ਵਿਧਾਨ ਸਭਾ ਹਲਕੇ ’ਤੇ ਹੀ ਰਿਹਾ। ਇਸ ਫਰਮ ਨੇ ਸਿਰਫ ਵੈਸਟ ਹਲਕੇ ਦੇ ਹੀ ਟੈਂਡਰ ਭਰੇ। ਇਹ ਹਲਕਾ ਕੈਬਨਿਟ ਮੰਤਰੀ ਮਹਿੰਦਰ ਭਗਤ ਦਾ ਹੈ। ਮੰਤਰੀ ਦੇ ਹਲਕੇ ’ਚ ਹੀ ਜੇਈ ਤਾਇਨਾਤ ਹੈ। ਜੇਈ ਖ਼ਿਲਾਫ਼ ਵੀ ਕਾਰਵਾਈ ਨਾ ਹੋਣਾ ਕਈ ਸਵਾਲ ਖੜ੍ਹੇ ਕਰ ਰਿਹਾ ਹੈ। ਜੇਈ ਆਪਣੇ ਕਰੀਬੀ ਰਿਸ਼ਤੇਦਾਰਾਂ ਨੂੰ ਫਾਇਦਾ ਪਹੁੰਚਾਉਂਦਾ ਰਿਹਾ। ਇਸੇ ਤਰ੍ਹਾਂ ਸਿਰਫ ਇਕ ਜੇਈ ਹੀ ਨਹੀਂ, ਬਲਕਿ ਕਈ ਹੋਰ ਜੇਈ ਤੇ ਐੱਸਡੀਓ ਵੀ ਸ਼ੱਕ ਦੇ ਦਾਇਰੇ ’ਚ ਹਨ। ਇਸ ’ਤੇ ਨਜ਼ਰ ਰੱਖਣ ਦੀ ਗੱਲ ਕੀਤੀ ਜਾ ਰਹੀ ਹੈ ਪਰ ਹਾਲੇ ਤੱਕ ਕਿਸੇ 'ਤੇ ਵੀ ਕਾਰਵਾਈ ਨਹੀਂ ਹੋਈ।

---

ਐਂਟਰੀ ਦਰਜ ਕਰਨ ਦਾ ਹੱਕ ਖੋਹਿਆ

ਨਗਰ ਨਿਗਮ ਕਮਿਸ਼ਨਰ ਸੰਦੀਪ ਰਿਸ਼ੀ ਨੇ ਇਕ ਅਹਿਮ ਫੈਸਲੇ ਵਿਚ ਨਿਗਮ ਵਿਚ ਵਿਕਾਸ ਕਾਰਜਾਂ ਨਾਲ ਸਬੰਧਤ ਰਿਕਾਰਡ ਦਰਜ ਕਰਨ ਦਾ ਹੱਕ ਆਊਟਸੋਰਸ ਜੂਨੀਅਰ ਇੰਜੀਨੀਅਰਾਂ ਤੋਂ ਵਾਪਸ ਲੈ ਲਿਆ ਹੈ। ਹੁਣ ਸਿਰਫ ਪੱਕੇ ਜੂਨੀਅਰ ਇੰਜੀਨੀਅਰ ਹੀ ਇਹ ਰਿਕਾਰਡ ਦਰਜ ਕਰ ਸਕਣਗੇ। ਇਹ ਰਿਕਾਰਡ ਬੁੱਕ ਐੱਮਬੀ ਮਹੱਤਵਪੂਰਨ ਮੰਨੀ ਜਾਂਦੀ ਹੈ। ਮੇਅਰ ਵਨੀਤ ਧੀਰ ਨੇ ਆਊਟਸੋਰਸ ਜੂਨੀਅਰ ਇੰਜੀਨੀਅਰ ਨੂੰ ਐੱਮਬੀ ਬੁੱਕ ਨਾ ਦੇਣ ਦਾ ਨਿਰਦੇਸ਼ ਦਿੱਤਾ ਸੀ। ਇਸ ਤੋਂ ਬਾਅਦ ਹੀ ਕਮਿਸ਼ਨਰ ਨੇ ਇਹ ਹੁਕਮ ਜਾਰੀ ਕੀਤੇ ਹਨ।