ਗਦਈਪੁਰ ’ਚ ਜਲਦ ਬਣਾਇਆ ਜਾਵੇ ਸਬ-ਸਟੇਸ਼ਨ : ਸ਼ਰਮਾ

ਕਿਹਾ- ਸੜਕਾਂ ਦੀ ਬਦਹਾਲੀ ਕਾਰਨ ਅਧੂਰੀ ਰਹੀ ਪਾਵਰਕਾਮ ਦੀ ਮੌਕ ਡ੍ਰਿਲ ਡਿਪਟੀ ਚੀਫ ਰਿਪੋਰਟਰ, ਪੰਜਾਬੀ ਜਾਗਰਣ, ਜਲੰਧਰ : ਇੰਜੀਨੀਅਰਿੰਗ ਇੰਡਸਟਰੀਜ਼ ਐਸੋਸੀਏਸ਼ਨ ਦੀ ਮੀਟਿੰਗ ਵਿੱਚ ਗਦਈਪੁਰ ’ਚ ਬਿਜਲੀ ਸਬ-ਸਟੇਸ਼ਨ ਦੇ ਤੁਰੰਤ ਨਿਰਮਾਣ ਦੀ ਮੰਗ ਮਜ਼ਬੂਤੀ ਨਾਲ ਚੁੱਕੀ ਗਈ। ਐਸੋਸੀਏਸ਼ਨ ਦੇ ਪ੍ਰਧਾਨ ਸੁਨੀਲ ਸ਼ਰਮਾ ਨੇ ਕਿਹਾ ਕਿ ਗਦਈਪੁਰ ਉਦਯੋਗਿਕ ਖੇਤਰ ’ਚ ਸਬ-ਸਟੇਸ਼ਨ ਉਦਯੋਗਾਂ ਦੀ ਵਾਧੂ ਲੋੜ ਤੇ ਭਵਿੱਖੀ ਵਿਕਾਸ ਲਈ ਬਹੁਤ ਜ਼ਰੂਰੀ ਹੈ। ਉਨ੍ਹਾਂ ਦੱਸਿਆ ਕਿ ਵੀਰਵਾਰ ਰਾਤ ਬਿਜਲੀ ਬੋਰਡ ਦੇ ਸੀਨੀਅਰ ਅਧਿਕਾਰੀਆਂ ਵੱਲੋਂ ਪ੍ਰਸਤਾਵਿਤ ਸਾਈਟ ਨਗਰ ਨਿਗਮ ਦੇ ਸਾਲਿਡ ਵੇਸਟ ਟਰੀਟਮੈਂਟ ਪਲਾਂਟ ਰਾਜਾ ਗਾਰਡਨ, ਗਦਈਪੁਰ ਤੱਕ 70 ਫੁੱਟ ਮਲਟੀ-ਐਕਸਲ ਟਰਾਲੇ ਨੂੰ ਲਿਜਾ ਕੇ ਮੌਕ ਡ੍ਰਿਲ ਕਰਨ ਦੀ ਤਿਆਰੀ ਕੀਤੀ ਗਈ ਸੀ। ਮੌਕ ਡ੍ਰਿਲ ਦਾ ਮਕਸਦ ਭਾਰੀ ਟਰਾਂਸਫਾਰਮਰਾਂ ਤੇ ਉਪਕਰਣਾਂ ਨੂੰ ਭਵਿੱਖ |ਚ ਸਾਈਟ ਤੱਕ ਪਹੁੰਚਾਉਣ ਦੀ ਸਮਰੱਥਾ ਦੀ ਜਾਂਚ ਕਰਨਾ ਸੀ ਪਰ ਗਦਈਪੁਰ ਦੀ ਗਲੀ ਨੰਬਰ 4 ਦੀ ਬਦਤਰ ਹਾਲਤ ਸੜਕ ਕਾਰਨ ਟਰਾਲਾ ਸਾਈਟ ਤੱਕ ਪਹੁੰਚ ਨਹੀਂ ਸਕਿਆ, ਜਿਸ ਨਾਲ ਇਹ ਸਪੱਸ਼ਟ ਹੋ ਗਿਆ ਕਿ ਮੌਜੂਦਾ ਸੜਕਾਂ ਭਾਰੀ ਵਾਹਨਾਂ ਲਈ ਅਨੁਕੂਲ ਨਹੀਂ। ਐਸੋਸੀਏਸ਼ਨ ਨੇ ਇਸ ਸਥਿਤੀ ਨੂੰ ਗੰਭੀਰ ਦੱਸਦਿਆਂ ਮੇਅਰ ਵਿਨੀਤ ਧੀਰ ਤੇ ਹਲਕਾ ਇੰਚਾਰਜ ਦਿਨੇਸ਼ ਢੱਲ ਨੂੰ ਤੁਰੰਤ ਸੜਕ ਸੁਧਾਰਨ ਦੀ ਅਪੀਲ ਕੀਤੀ ਹੈ। ਸੁਨੀਲ ਸ਼ਰਮਾ ਨੇ ਕਿਹਾ ਕਿ ਸਬ-ਸਟੇਸ਼ਨ ਦੇ ਕੰਮ ਨੂੰ ਸ਼ੁਰੂ ਕਰਨ ਲਈ ਮੌਕ ਡ੍ਰਿਲ ਦੀ ਸਫਲਤਾ ਲਾਜ਼ਮੀ ਹੈ ਤੇ ਇਸ ਲਈ ਸੜਕ ਦਾ ਮੁੜ-ਨਿਰਮਾਣ ਤੁਰੰਤ ਕੀਤਾ ਜਾਣਾ ਚਾਹੀਦਾ ਹੈ। ਉਨ੍ਹਾਂ ਦੱਸਿਆ ਕਿ ਇਸ ਵਕਤ ਗਦਈਪੁਰ, ਬੁਲੰਦਪੁਰ, ਰੰਧਾਵਾ, ਮਸੰਦਾ, ਬੱਲਾ, ਰਾਏਪੁਰ-ਰਸੂਲਪੁਰ ਆਦਿ ਖੇਤਰਾਂ ਨੂੰ ਫੋਕਲ ਪੁਆਇੰਟ ਸਬ-ਸਟੇਸ਼ਨ ਤੋਂ ਬਿਜਲੀ ਮਿਲ ਰਹੀ ਹੈ, ਜੋ ਪਹਿਲਾਂ ਹੀ ਓਵਰਲੋਡਡ ਹੈ। ਲੰਮੀ ਦੂਰੀ ਕਾਰਨ ਲਾਈਨ ਲੌਸ, ਵੋਲਟੇਜ਼ ਡ੍ਰੌਪ ਤੇ ਲਾਈਨ ਕਾਸਟ ਬਹੁਤ ਵੱਧ ਰਹੀ ਹੈ, ਜਿਸ ਨਾਲ ਉਦਯੋਗ ਪ੍ਰਭਾਵਿਤ ਹੋ ਰਹੇ ਹਨ। ਐਸੋਸੀਏਸ਼ਨ ਦੇ ਬਿਜਲੀ ਮਾਮਲਿਆਂ ਦੇ ਸਲਾਹਕਾਰ ਸੰਦੀਪ ਗੁਪਤਾ ਨੇ ਕਿਹਾ ਕਿ ਨਵਾਂ ਸਬ-ਸਟੇਸ਼ਨ ਬਣਨ ਨਾਲ ਲਾਈਨ ਲੌਸ ਤੇ ਵੋਲਟੇਜ਼ ਡ੍ਰੌਪ ਦੀ ਸਮੱਸਿਆ ਖਤਮ ਹੋਵੇਗੀ, ਪੀਐੱਸਪੀਸੀਐੱਲ ਤੇ ਉਦਯੋਗਾਂ ਦੋਵਾਂ ਦਾ ਸਮਾਂ ਤੇ ਧਨ ਬਚੇਗਾ ਤੇ ਰੋਜ਼ਗਾਰ ਦੇ ਨਵੇਂ ਮੌਕੇ ਬਣਨਗੇ। ਐਸੋਸੀਏਸ਼ਨ ਨੇ ਪਾਵਰਕਾਮ ਤੋਂ ਮੰਗ ਕੀਤੀ ਹੈ ਕਿ ਮੌਕ ਡ੍ਰਿਲ ਸਫਲ ਹੋਣ ਨਾਲ ਹੀ ਸਾਈਟ ਨੂੰ ਅੰਤਿਮ ਮਨਜ਼ੂਰੀ ਦਿੱਤੀ ਜਾਵੇ। ਸੁਨੀਲ ਸ਼ਰਮਾ ਨੇ ਚੇਤਾਵਨੀ ਦਿੱਤੀ ਹੈ ਕਿ ਜੇ ਸੜਕ ਸੁਧਾਰ ’ਚ ਦੇਰੀ ਹੋਈ ਤਾਂ ਸਬ-ਸਟੇਸ਼ਨ ਪ੍ਰੋਜੈਕਟ ਪ੍ਰਭਾਵਿਤ ਹੋ ਸਕਦਾ ਹੈ ਤੇ ਖੇਤਰ ਦਾ ਵਿਕਾਸ ਰੁਕ ਸਕਦਾ ਹੈ। ਮੀਟਿੰਗ ’ਚ ਰਾਹੁਲ ਬਰਤਾ, ਅਰੁਣ ਸ਼ਰਮਾ, ਗੌਤਮ ਸ਼ਰਮਾ, ਚੇਤਨ ਸ਼ਰਮਾ, ਦਿਆਲ ਧਮੀਜਾ, ਅਸ਼ੋਕ ਕੁਮਾਰ, ਵਰਿੰਦਰ ਕੁਮਾਰ ਤੇ ਅਮਨ ਚਾਵਲਾ ਮੌਜੂਦ ਸਨ।