ਫਾਇਨਾਂਸ ਕੰਪਨੀ ’ਤੇ ਗਹਿਣੇ ਰੱਖੀਆਂ ਵਾਲੀਆਂ ਨਾ ਮੋੜਨ ’ਤੇ ਦੋਸ਼

-ਫਾਇਨਾਂਸ ਦਫ਼ਤਰ ’ਚ ਸਟਾਫ ਤੇ ਗਾਹਕ ਵਿਚਾਲੇ ਬਹਿਸ -ਰਿਪੋਰਟ ਮਿਲਣ ’ਤੇ ਥਾਣਾ-3 ਦੀ ਪੁਲਿਸ ਨੇ ਸ਼ੁਰੂ ਕੀਤੀ ਜਾਂਚ ਰਾਕੇਸ਼ ਗਾਂਧੀ, ਪੰਜਾਬੀ ਜਾਗਰਣ, ਜਲੰਧਰ : ਸ਼ਨਿਚਰਵਾਰ ਦੁਪਹਿਰ ਨੂੰ ਰੇਲਵੇ ਰੋਡ ਤੇ ਮੁਥੂਟ ਫਾਈਨੈਂਸ ਦਫਤਰ ’ਚ ਇਕ ਗਾਹਕ ਤੇ ਸਟਾਫ ਵਿਚਕਾਰ ਬਹਿਸ ਹੋ ਗਈ। ਜਦੋਂ ਗਾਹਕ ਆਪਣੀਆਂ 3 ਗ੍ਰਾਮ ਸੋਨੇ ਦੀਆਂ ਵਾਲੀਆਂ ਵਾਪਸ ਲੈਣ ਆਇਆ, ਤਾਂ ਸਟਾਫ ਨੇ ਸੋਨਾ ਦੇਣ ਤੋਂ ਇਨਕਾਰ ਕਰ ਦਿੱਤਾ। ਮਾਮਲੇ ਦੀ ਰਿਪੋਰਟ ਥਾਣਾ 3 ਨੂੰ ਕੀਤੀ ਗਈ ਤੇ ਪੁਲਿਸ ਨੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਜਾਣਕਾਰੀ ਦਿੰਦੇ ਹੋਏ ਰੇਲਵੇ ਰੋਡ ਦੇ ਵਾਸੀ ਰਾਕੇਸ਼ ਕੁਮਾਰ ਨੇ ਦੱਸਿਆ ਕਿ ਇਕ ਸਾਲ ਪਹਿਲਾਂ 9 ਦਸੰਬਰ 2024 ਨੂੰ ਉਸ ਨੇ ਮੁਥੂਟ ਫਾਈਨੈਂਸ ਰੇਲਵੇ ਰੋਡ ਸ਼ਾਖਾ ’ਚ 12 ਹਜ਼ਾਰ ਦਾ ਕਰਜ਼ਾ ਲੈਣ ਲਈ 3 ਗ੍ਰਾਮ ਸੋਨੇ ਦੀਆਂ ਵਾਲੀਆਂ ਗਿਰਵੀ ਰੱਖੀਆਂ ਸਨ, ਜਿਸ ਤੇ ਉਹ ਨਿਯਮਤ ਵਿਆਜ ਅਦਾ ਕਰ ਰਿਹਾ ਸੀ। ਦੋ ਮਹੀਨਿਆਂ ਦਾ ਵਿਆਜ ਅਜੇ ਵੀ ਬਕਾਇਆ ਸੀ ਤੇ ਉਹ ਅੱਜ ਆਪਣੀ ਮਾਂ ਨਾਲ ਪੈਸੇ ਵਾਪਸ ਕਰਨ ਤੇ ਆਪਣਾ ਕਰਜ਼ਾ ਬੰਦ ਕਰਨ ਬਾਰੇ ਚਰਚਾ ਕਰਨ ਲਈ ਮੁਥੂਟ ਫਾਈਨੈਂਸ ਦਫ਼ਤਰ ਗਿਆ। ਇਸ ਦੌਰਾਨ ਮੁਥੂਟ ਫਾਈਨੈਂਸ ਦੇ ਮੁਲਾਜ਼ਮਾਂ ਨੇ ਉਸਨੂੰ ਦੱਸਿਆ ਕਿ ਉਨ੍ਹਾਂ ਕੋਲ ਉੱਥੇ ਕੋਈ ਸੋਨਾ ਗਿਰਵੀ ਨਹੀਂ ਰੱਖਿਆ ਗਿਆ ਸੀ। ਪੀੜਤ ਦਾ ਦਾਅਵਾ ਹੈ ਕਿ ਲੰਬੀ ਬਹਿਸ ਤੋਂ ਬਾਅਦ ਮੁਲਾਜ਼ਮਾਂ ਨੇ ਉਸ ਦੇ ਸੋਨੇ ਨੂੰ ਨਕਲੀ ਵੀ ਐਲਾਨ ਦਿੱਤਾ। ਬਹਿਸ ਦੌਰਾਨ ਰਾਕੇਸ਼ ਕੁਮਾਰ ਨੇ ਮੁਲਾਜ਼ਮਾਂ ਤੋਂ ਪੁੱਛਿਆ ਕਿ ਜੇ ਵਾਲੀਆਂ ਨਕਲੀ ਸਨ ਤਾਂ ਉਨ੍ਹਾਂ ਨੇ ਉਸ ਨੂੰ ਕਰਜ਼ਾ ਕਿਵੇਂ ਦਿੱਤਾ। ਜਵਾਬ ਨਾ ਦੇ ਸਕਣ ਕਰਕੇ ਉਹ ਅੰਦਰ ਚਲੇ ਗਏ ਤੇ ਦਰਵਾਜ਼ਾ ਬੰਦ ਕਰ ਦਿੱਤਾ। ਰਾਕੇਸ਼ ਕੁਮਾਰ ਨੇ ਪੁਲਿਸ ਥਾਣੇ ’ਚ ਸ਼ਿਕਾਇਤ ਦਰਜ ਕਰਵਾਈ। ਦੋਵਾਂ ਧਿਰਾਂ ਦੀ ਗੱਲ ਸੁਣਨ ਤੋਂ ਬਾਅਦ ਮੌਕੇ ਤੇ ਪਹੁੰਚੇ ਥਾਣਾ ਮੁਖੀ ਨੇ ਬੁੱਧਵਾਰ ਸਵੇਰੇ ਉਸ ਨੂੰ ਸਮਾਂ ਦਿੱਤਾ ਹੈ। ਉਸ ਨੇ ਕਿਹਾ ਕਿ ਜੇਕਰ ਉਹ ਚੀਜ਼ਾਂ ਦਾ ਹੱਲ ਕਰ ਸਕਦੇ ਹਨ, ਤਾਂ ਇਹ ਠੀਕ ਹੈ, ਨਹੀਂ ਤਾਂ ਉਹ ਕਾਨੂੰਨੀ ਕਾਰਵਾਈ ਕਰਨਗੇ।