ਗੰਦੇ ਪਾਣੀ ਦੀ ਸਮੱਸਿਆ ਛੇਤੀ ਹੱਲ ਕਰਨ ਦੀ ਮੰਗ

-ਪਿੰਡ ਵਾਸੀਆ ’ਚ ਪਾਇਆ ਜਾ ਰਿਹੈ ਡਰ, ਹੱਲ ਕਰਨ ਦੀ ਕੀਤੀ ਮੰਗ ਅਜੇ ਸਿੰਘ ਨਾਗੀ, ਪੰਜਾਬੀ ਜਾਗਰਣ, ਫਿਲੌਰ : ਨਵਾਂਸ਼ਹਿਰ ਰੋਡ ’ਤੇ ਪੈਂਦੇ ਨਗਰ ਪਿੰਡ ਨੇੜੇ ਤਕਰੀਬਨ ਤੋ ਮਹੀਨੇ ਤੋਂ ਸੜਕ ਉੱਪਰ ਘਰਾਂ ਦਾ ਗੰਦਾ ਪਾਣੀ ਭਰ ਰਿਹਾ ਹੈ। ਇਹ ਗੰਦਾ ਪਾਣੀ ਭਿਆਨਕ ਬਿਮਾਰੀਆਂ ਦੇ ਨਾਲ-ਨਾਲ ਵੱਡੇ ਹਾਦਸਿਆਂ ਨੂੰ ਵੀ ਸੱਦਾ ਦੇ ਰਿਹਾ ਹੈ। ਨਗਰ ਪਿੰਡ ਦੇ ਰੋਡ ਨਾਲ ਲੱਗਦੇ ਮੁਹੱਲੇ ਦੇ ਲੋਕਾਂ ’ਚ ਗੰਦੇ ਪਾਣੀ ਨਾਲ ਫੈਲਣ ਵਾਲੇ ਰੋਗਾਂ ਕਾਰਨ ਡਰ ਪਾਇਆ ਜਾ ਰਿਹਾ ਹੈ। ਲੋਕਾਂ ਦੀ ਮੰਗ ਹੈ ਕਿ ਇਸ ਸਮੱਸਿਆ ਦਾ ਹੱਲ ਜਲਦ ਤੋਂ ਜਲਦ ਕਰਵਾਇਆ ਜਾਵੇ। ਇਸ ਸਮੱਸਿਆ ਸਬੰਧੀ ਗੱਲਬਾਤ ਕਰਦਿਆਂ ਪਿੰਡ ਵਾਸੀਆਂ ਨੇ ਦੱਸਿਆ ਕਿ ਪਹਿਲਾਂ ਸੜਕ ਟੁੱਟੀ ’ਤੇ ਟੋਏ ਪੈਣ ਕਾਰਨ ਕਈ ਵਾਰ ਅਣਸੁਖਾਵੀਆਂ ਘਟਨਾਵਾਂ ਵਾਪਰੀਆਂ ਅਤੇ ਕੀਮਤੀ ਜਾਨਾਂ ਚਲੀਆ ਗਈਆਂ। ਹੁਣ ਸਬੰਧਤ ਵਿਭਾਗ ਵੱਲੋਂ ਸੜਕ ਬਣਾ ਦਿੱਤੀ ਪਰ ਕੁਝ ਲੋਕ ਸੜਕ ’ਤੇ ਘਰਾਂ ਦਾ ਗੰਦਾ ਪਾਣੀ ਪਾ ਰਹੇ ਹਨ, ਜਿਸ ਕਾਰਨ ਸੜਕ ਫਿਰ ਟੁੱਟਣੀ ਸ਼ੁਰੂ ਹੋ ਚੁੱਕੀ ਹੈ ਤੇ ਟੋਏ ਪੈਣ ਕਰਕੇ ਉਥੇ ਗੰਦਾ ਪਾਣੀ ਖੜ੍ਹਾ ਹੋ ਚੁੱਕਾ ਹੈ। ਲੋਕਾਂ ਨੇ ਕਿਹਾ ਕਿ ਇਸ ਸੜਕ ’ਤੇ ਸਿਆਸੀ ਲੀਡਰਾਂ ਦਾ ਕਾਫਲਾ ਵੀ ਲੰਘਦਾ ਹੈ ਪਰ ਉਨਾਂ ਦਾ ਇਸ ਸਮੱਸਿਆ ਵੱਲ ਧਿਆਨ ਨਹੀਂ ਹੈ। ਇਲਾਕੇ ਵਾਸੀਆਂ ਨੇ ਪ੍ਰਸ਼ਾਸਨ ਨੂੰ ਚਿਤਾਵਨੀ ਦਿੱਤੀ ਹੈ ਕਿ ਜੇਕਰ ਇਸ ਸਮੱਸਿਆ ਨਾ ਹੱਲ ਨਾ ਕੀਤਾ ਗਿਆ ਤਾਂ ਉਹ ਧਰਨਾ ਦੇਣਾ ਲਈ ਮਜਬੂਰ ਹੋਣਗੇ, ਜਿਸਦਾ ਜ਼ਿੰਮੇਵਾਰ ਸਬੰਧਤ ਵਿਭਾਗ ਹੋਵੇਗਾ। ਇਸ ਮੌਕੇ ਮੀਨਾ ਕੁਮਾਰੀ, ਨਜੀਰ ਮੁਹੰਮਦ, ਕੁਲਵਿੰਦਰ ਕੁਮਾਰ, ਕੁਲਵਿੰਦਰ ਚੰਦ, ਰੇਖਾ ਰਾਣੀ, ਕਸਮੀਰੋ, ਤਾਰਾ ਚੰਦ,ਵੀਨਾ ਰਾਣੀ, ਮਕਸੂਦ, ਜਗਦੀਸ਼ ਕੁਮਾਰ, ਕਿਰਨ, ਸੁਨੀਲ, ਸਿਮਰੋ ਤੇ ਹੋਰ ਮੁਹੱਲਾ ਵਾਸੀ ਹਾਜ਼ਰ ਸਨ। ਓਧਰ ਪੰਚਾਇਤ ਸਕੱਤਰ ਰਾਜਿੰਦਰ ਕੁਮਾਰ ਨੇ ਕਿਹਾ ਕਿ ਗੰਦਾ ਪਾਣੀ ਤਕਰੀਬਨ ਇਕ ਮਹੀਨੇ ਤੋਂ ਸੜਕ ’ਚ ਪੈ ਰਿਹਾ ਹੈ। ਇਸ ਦੇ ਹੱਲ ਲਈ ਪੰਚਾਇਤੀ ਜ਼ਮੀਨ ਦੀ ਨਿਸ਼ਾਨਦੇਹੀ ਕਰਵਾਈ ਹੈ, ਉਸ ਜਗ੍ਹਾ ’ਤੇ ਪਾਣੀ ਪਾਇਆ ਜਾਵੇਗਾ। ਜਦੋਂ ਇਸ ਸਮੱਸਿਆ ਸਬੰਧੀ ਪੀਡੀਡਬਲਯੂ ਦੇ ਐੱਸਡੀਓ ਮੋਹਨ ਸਿੰਘ ਨਾਲ ਗੱਲਬਾਤ ਕੀਤੀ ਉਨ੍ਹਾਂ ਕਿਹਾ ਕਿ ਇਸ ਸਬੰਧੀ ਬੀਡੀਪੀਓ, ਤਹਿਸੀਲਦਾਰ ਤੇ ਐੱਸਡੀਐੱਮ ਦੇ ਧਿਆਨ ’ਚ ਮਾਮਲਾ ਲਿਆਂਦਾ ਗਿਆ ਹੈ ਤੇ ਨੋਟਿਸ ਭੇਜੇ ਗਏ ਹਨ। ਐੱਸਡੀਐੱਮ ਮੁਕੇਲਨ ਆਰ ਨਾਲ ਸੰਪਰਕ ਕੀਤਾ ਤਾਂ ਉਨ੍ਹਾਂ ਨੇ ਕਿਹਾ ਕਿ ਉਕਤ ਸਮੱਸਿਆ ਦਾ ਇਕ ਹਫਤੇ ’ਚ ਹੱਲ ਕਰਵਾਇਆ ਜਾਵੇਗਾ।