ਟੀਚਰ ਫੈਸਟ ਮੁਕਾਬਲੇ ’ਚ ਬਿਨਪਾਲਕੇ ਸਕੂਲ ਦੀ ਝੰਡੀ

ਸੁਖਵਿੰਦਰ ਸਿੰਘ, ਪੰਜਾਬੀ ਜਾਗਰਣ, ਭੋਗਪੁਰ : ਸਰਕਾਰੀ ਸੀਨੀਅਰ ਸੈਕੰਡਰੀ ਸਮਾਰਟ ਸਕੂਲ ਬਿਨਪਾਲਕੇ ’ਚ ਆਰਏਏ ਅਧੀਨ ਭੋਗਪੁਰ ਬਲਾਕ ਦੇ ਅੱਪਰ–ਪ੍ਰਾਇਮਰੀ ਸਕੂਲਾਂ ਦੇ ਅਧਿਆਪਕਾਂ ਲਈ ਟੀਚਰ ਫੈਸਟ ਮੁਕਾਬਲਾ ਪ੍ਰਿੰਸੀਪਲ ਸੁਰਿੰਦਰ ਕੁਮਾਰ ਰਾਣਾ ਦੀ ਅਗਵਾਈ ’ਚ ਕਰਵਾਇਆ ਗਿਆ, ਜਿਸ ’ਚ 17 ਅਧਿਆਪਕਾਂ ਨੇ ਭਾਗ ਲਿਆ। ਇਹ ਮੁਕਾਬਲਾ 10 ਕੈਟੇਗਰੀਜ਼ ’ਚ ਕਰਵਾਇਆ ਗਿਆ। ਟੀਚਿੰਗ ਏਡ ਕੈਟੇਗਰੀ ’ਚ ਗਗਨਦੀਪ ਕੌਰ ਨੇ ਪਹਿਲਾ, ਕਰਮਜੀਤ ਕੌਰ ਨੇ ਦੂਜਾ ਤੇ ਰਾਜਵੰਤ ਕੌਰ ਨੇ ਤੀਜਾ ਸਥਾਨ ਹਾਸਲ ਕੀਤਾ। ਆਈਟੀ ਟੂਲਜ਼ ਕੈਟੇਗਰੀ ’ਚ ਸੁਖਵਿੰਦਰ ਕੁਮਾਰ ਮਾਹੀ ਪਹਿਲੇ ਤੇ ਮਨਪ੍ਰੀਤ ਸਿੰਘ ਦੂਜੇ ਸਥਾਨ ’ਤੇ ਰਹੇ। ਰੀਅਲ ਲਾਈਫ ਐਪਲੀਕੇਸ਼ਨ ਕੈਟੇਗਰੀ ’ਚ ਨਲਿਨੀ ਸਿੱਕਾ ਨੇ ਪਹਿਲਾ ਤੇ ਊਸ਼ਾ ਸੈਣੀ ਨੇ ਦੂਜਾ ਸਥਾਨ ਪ੍ਰਾਪਤ ਕੀਤਾ। ਸੁੰਦਰ ਲਿਖਾਈ ਕੈਟੇਗਰੀ ’ਚ ਸਰਬਜੀਤ ਕੌਰ ਪਹਿਲੇ, ਰੂਪ ਰਾਣੀ ਦੂਜੇ ਤੇ ਬਲਜੀਤ ਕੌਰ ਤੀਜੇ ਸਥਾਨ ’ਤੇ ਰਹੇ। ਮੁਕਾਬਲੇ ਦਾ ਉਦੇਸ਼ ਅਧਿਆਪਕਾਂ ਨੂੰ ਨਵੀਂ ਤਕਨੀਕਾਂ ਨਾਲ ਪੜ੍ਹਾਉਣ ਲਈ ਪ੍ਰੇਰਿਤ ਕਰਨਾ ਤੇ ਉਨ੍ਹਾਂ ’ਚ ਮੁਕਾਬਲੇ ਦੀ ਭਾਵਨਾ ਪੈਦਾ ਕਰਨਾ ਸੀ। ਜੱਜਾਂ ਦੀ ਭੂਮਿਕਾ ਵੱਖ-ਵੱਖ ਸਕੂਲਾਂ ਦੇ ਅਧਿਆਪਕਾਂ ਨੇ ਨਿਭਾਈ। ਪ੍ਰਿੰਸੀਪਲ ਸੁਰਿੰਦਰ ਕੁਮਾਰ ਰਾਣਾ ਤੇ ਜੱਜਾਂ ਵੱਲੋਂ ਜੇਤੂ ਅਧਿਆਪਕਾਂ ਨੂੰ ਮੋਮੈਂਟੋ ਤੇ ਸਰਟੀਫਿਕੇਟ ਭੇਟ ਕੀਤੇ ਗਏ। ਪ੍ਰੋਗਰਾਮ ਦੇ ਸੰਚਾਲਨ ’ਚ ਗਗਨਦੀਪ ਕੌਰ ਸਮੇਤ ਸਕੂਲ ਸਟਾਫ ਦਾ ਵਿਸ਼ੇਸ਼ ਯੋਗਦਾਨ ਰਿਹਾ।