ਪਹਿਲੇ ਸਥਾਨ ਤੋਂ ਇਸ ਵਾਰ ਚੌਥੇ 'ਤੇ ਖਿਸਕਿਆ ਜ਼ਿਲ੍ਹਾ ਗੁਰਦਾਸਪੁਰ, 15 ਨੇ ਬਣਾਈ ਮੈਰਿਟ 'ਚ ਥਾਂ

Publish Date:Fri, 26 May 2023 06:56 PM (IST)

ਆਕਾਸ਼, ਗੁਰਦਾਸਪੁਰ

ਪੰਜਾਬ ਸਕੂਲ ਸਿੱਖਿਆ ਬੋਰਡ ਨੇ ਸ਼ੁੱਕਰਵਾਰ ਨੂੰ ਦਸਵੀਂ ਜਮਾਤ ਦਾ ਨਤੀਜਾ ਜਾਰੀ ਕਰ ਦਿੱਤਾ ਹੈ। ਇਸ 'ਚ ਸਾਲ 2022 'ਚ ਸੂਬੇ 'ਚੋਂ ਪਹਿਲੇ ਸਥਾਨ 'ਤੇ ਰਹਿਣ ਵਾਲਾ ਜ਼ਿਲ੍ਹਾ ਗੁਰਦਾਸਪੁਰ ਇਸ ਵਾਰ ਚੌਥੇ ਸਥਾਨ 'ਤੇ ਖਿਸਕ ਗਿਆ ਹੈ। ਇੱਥੇ ਇਹ ਦਿਲਚਸਪ ਇੱਤਫਾਕ ਹੀ ਕਿਹਾ ਜਾਏਗਾ ਕਿ ਇਸ ਵਾਰ ਬਾਰ੍ਹਵੀਂ ਦੇ ਨਤੀਜਿਆਂ ਵਿੱਚ ਕਹਾਣੀ ਬਿਲਕੁਲ ਉਲਟ ਨਜ਼ਰ ਆਈ। ਦੋ ਦਿਨ ਪਹਿਲਾ ਜਾਰੀ ਹੋਏ ਬਾਰ੍ਹਵੀਂ ਦੇ ਨਤੀਜਿਆਂ ਵਿੱਚ ਹੈਰਾਨੀਜਨਕ ਛੜੱਪਾ ਮਾਰਦਿਆਂ ਪੰਜਾਬ ਭਰ ਵਿੱਚ ਫਾਡੀ ਤੋਂ ਟਾਪ ਵਿੱਚ ਪਹੁੰਚ ਗਿਆ ਸੀ। ਦਸਵੀ ਦੀ ਗਲ ਕਰੀਏ ਤਾਂ ਹਾਲਾਂਕਿ 23 ਜਿਲਿ੍ਹਆਂ ਵਿੱਚੋਂ ਚੌਥਾ ਨੰਬਰ ਵੀ ਕੋਈ ਮਾੜਾ ਨਹੀਂ ਕਿਹਾ ਜਾਵੇਗਾ ਪਰ ਪਿਛਲੇ ਸਾਲ ਨਾਲੋਂ ਦਰਜ ਕੀਤੀ ਗਿਰਾਵਟ ਨੂੰ ਨਕਾਰਿਆ ਵੀ ਨਹੀਂ ਜਾ ਸਕਦਾ। ਜੇਕਰ ਮੈਰਿਟ ਦੀ ਗੱਲ ਕਰੀਏ ਤਾਂ ਕੁੜੀਆਂ ਨੇ ਇੱਕ ਵਾਰ ਫਿਰ ਲੜਕਿਆਂ ਨੂੰ ਇਸ ਵਿੱਦਿਅਕ ਮੁਕਾਬਲੇ ਵਿੱਚ ਪਛਾੜ ਦਿੱਤਾ ਹੈ। ਇਸ ਵਾਰ ਮੈਰਿਟ 'ਚ ਸਥਾਨ ਹਾਸਲ ਕਰਨ ਵਾਲੇ 15 ਵਿਦਿਆਰਥੀਆਂ 'ਚੋਂ 13 ਲੜਕੀਆਂ ਹਨ, ਜਦਕਿ ਸਿਰਫ 2 ਲੜਕੇ ਹੀ ਮੈਰਿਟ 'ਚ ਸਥਾਨ ਹਾਸਲ ਕਰ ਸਕੇ ਹਨ। ਜ਼ਿਲ੍ਹੇ ਵਿੱਚ ਪਾਸ ਪ੍ਰਤੀਸ਼ਤਤਾ 'ਚ ਵੀ 0.9 ਫੀਸਦੀ ਦੀ ਗਿਰਾਵਟ ਦਰਜ ਕੀਤੀ ਗਈ ਹੈ। ਸਾਲ 2022 ਵਿੱਚ ਜ਼ਿਲ੍ਹੇ ਦੇ ਕੁੱਲ 19674 ਬੱਚਿਆਂ ਨੇ ਦਸਵੀਂ ਜਮਾਤ ਦੀ ਪ੍ਰਰੀਖਿਆ ਦਿੱਤੀ ਸੀ, ਜਿਨਾਂ੍ਹ ਵਿੱਚੋਂ 19580 ਬੱਚੇ ਪਾਸ ਹੋਏ ਸਨ। ਉਸ ਸਮੇਂ ਜ਼ਿਲ੍ਹੇ ਦੀ ਪਾਸ ਪ੍ਰਤੀਸ਼ਤਤਾ 99.52 ਸੀ। ਇਸ ਸਾਲ ਦੇ ਨਤੀਜੇ ਦੀ ਗੱਲ ਕਰੀਏ ਤਾਂ ਜ਼ਿਲ੍ਹੇ ਦੇ ਕੁੱਲ 18971 ਬੱਚੇ ਪ੍ਰਰੀਖਿਆ ਵਿੱਚ ਬੈਠੇ ਸਨ, ਜਿਨਾਂ੍ਹ ਵਿੱਚੋਂ 18710 ਬੱਚੇ ਪਾਸ ਐਲਾਨੇ ਗਏ ਹਨ। ਇਸ ਵਾਰ ਪਾਸ ਪ੍ਰਤੀਸ਼ਤਤਾ ਘੱਟ ਕੇ 98.62 ਰਹਿ ਗਈ ਹੈ। ਭਾਵੇਂ ਸਿੱਖਿਆ ਵਿਭਾਗ ਮਿਸ਼ਨ 100 ਫੀਸਦੀ ਅੱਗੇ ਵੱਧ ਰਿਹਾ ਸੀ, ਪਰ ਜ਼ਿਲ੍ਹੇ ਦੇ ਨਤੀਜਿਆਂ ਵਿੱਚ ਆਈ ਗਿਰਾਵਟ ਨੇ ਇਸ ਮੁਹਿੰਮ ਨੂੰ ਕੁਝ ਹੱਦ ਤੱਕ ਝਟਕਾ ਦਿੱਤਾ ਹੈ।