ਮਨੀਮਾਜਰਾ ਵਾਸੀਆਂ ਨੇ ਜੁਆਇੰਟ ਕਮਿਸ਼ਨਰ ਨੂੰ ਘਰਾਂ ਦੀ ਐਨਓਸੀ ਜਾਰੀ ਕਰਨ ਦੀ ਕੀਤੀ ਮੰਗ

ਤਰੁਣ ਭਜਨੀ, ਪੰਜਾਬੀ ਜਾਗਰਣ, ਚੰਡੀਗੜ੍ਹ: ਆਲ ਮਨੀਮਾਜਰਾ ਐਸੋਸੀਏਸ਼ਨ ਦੇ ਪ੍ਰਧਾਨ ਐਸ.ਐਸ. ਪਰਵਾਨਾ ਅਤੇ ਆਮ ਆਦਮੀ ਪਾਰਟੀ ਦੇ ਪੇਂਡੂ ਪ੍ਰਦੇਸ਼ ਜਨਰਲ ਸਕੱਤਰ ਹਰਪ੍ਰੀਤ ਸਿੰਘ ਹੈਪੀ ਨੇ ਨਗਰ ਨਿਗਮ ਦੇ ਜੋਇੰਟ ਕਮਿਸ਼ਨਰ ਡਾ. ਇੰਦਰਜੀਤ ਨਾਲ ਮੁਲਾਕਾਤ ਕਰਕੇ ਮਨੀਮਾਜਰਾ ਦੇ ਘਰਾਂ ਦੀ ਐਨਓਸੀ ਦੀ ਕਾਰਵਾਈ ਜਲਦੀ ਪੂਰੀ ਕਰਨ ਦੀ ਮੰਗ ਕੀਤੀ। ਇਹ ਮੀਟਿੰਗ ਨਗਰ ਨਿਗਮ ਦੇ ਸੈਕਟਰ-17 ਸਥਿਤ ਦਫ਼ਤਰ ਵਿੱਚ ਹੋਈ, ਜਿੱਥੇ ਉਨ੍ਹਾਂ ਨੇ ਮਨੀਮਾਜਰਾ ਵਾਸੀਆਂ ਨੂੰ ਦਰਪੇਸ਼ ਸਮੱਸਿਆਵਾਂ ਬਾਰੇ ਵਿਸਥਾਰ ਨਾਲ ਜਾਣਕਾਰੀ ਦਿੱਤੀ। ਦੱਸਣਯੋਗ ਹੈ ਕਿ ਹਾਲ ਹੀ ਵਿੱਚ ਡਾ. ਇੰਦਰਜੀਤ ਨੇ ਮਨੀਮਾਜਰਾ ਨਗਰ ਨਿਗਮ ਦੇ ਸਬ-ਆਫਿਸ ਦਾ ਚਾਰਜ ਸੰਭਾਲਿਆ ਹੈ, ਪਰ ਅਜੇ ਤੱਕ ਉਹ ਮਨੀਮਾਜਰਾ ਦਫ਼ਤਰ ਨਹੀਂ ਪਹੁੰਚੇ ਹਨ । ਹਰਪ੍ਰੀਤ ਸਿੰਘ ਹੈਪੀ ਨੇ ਦੱਸਿਆ ਕਿ ਡਾ. ਇੰਦਰਜੀਤ ਨੇ ਉਨ੍ਹਾਂ ਨੂੰ ਭਰੋਸਾ ਦਿਵਾਇਆ ਹੈ ਕਿ ਉਹ ਵੀਰਵਾਰ ਨੂੰ ਮਨੀਮਾਜਰਾ ਦਫ਼ਤਰ ਆ ਕੇ ਲੋਕਾਂ ਦੀਆਂ ਸ਼ਿਕਾਇਤਾਂ ਸੁਣਣਗੇ ਅਤੇ ਟੈਕਸ ਬ੍ਰਾਂਚ ਵਿੱਚ ਅਟਕੀਆਂ ਐਨਓਸੀ ਦੀਆਂ ਫਾਈਲਾਂ ਬਾਰੇ ਪੂਰੀ ਜਾਣਕਾਰੀ ਲੈ ਕੇ ਜਲਦੀ ਕਾਰਵਾਈ ਸ਼ੁਰੂ ਕਰਨਗੇ। ਜਾਣਕਾਰੀ ਮੁਤਾਬਕ, ਮਨੀਮਾਜਰਾ ਦੇ ਨਿਵਾਸੀਆਂ ਦੀਆਂ ਲਗਭਗ 300 ਐਨਓਸੀ ਫਾਈਲਾਂ ਕਈ ਮਹੀਨਿਆਂ ਤੋਂ ਰੁਕੀ ਪਈਆਂ ਹਨ। ਐਸ.ਐਸ. ਪਰਵਾਨਾ ਅਤੇ ਹਰਪ੍ਰੀਤ ਸਿੰਘ ਦਾ ਕਹਿਣਾ ਹੈ ਕਿ ਹੁਣ ਉਨ੍ਹਾਂ ਨੂੰ ਪੂਰਾ ਭਰੋਸਾ ਹੈ ਕਿ ਨਵੇਂ ਜੋਇੰਟ ਕਮਿਸ਼ਨਰ ਡਾ. ਇੰਦਰਜੀਤ ਜਲਦੀ ਹੀ ਲੋਕਾਂ ਦੀਆਂ ਇਹ ਅਟਕੀ ਹੋਈਆਂ ਫਾਈਲਾਂ ਕਲੀਅਰ ਕਰਵਾਉਣਗੇ, ਤਾਂ ਜੋ ਮਨੀਮਾਜਰਾ ਵਾਸੀਆਂ ਨੂੰ ਲੰਬੇ ਸਮੇਂ ਤੋਂ ਚੱਲ ਰਹੀ ਇਸ ਸਮੱਸਿਆ ਤੋਂ ਰਾਹਤ ਮਿਲ ਸਕੇ।