ਸੜਕ ਦੁਰਘਟਨਾਵਾਂ ਦੇ ਕਲੇਮ ਹਨ ਪੈਂਡਿੰਗ, ਨਾ ਲੋਕਾਂ ਨੂੰ ਜਾਣਕਾਰੀ ਨਾ ਵਿਭਾਗ ਜਾਗਰੂਕ; ਪੈਂਡਿੰਗ ਹਨ ਇੰਨੇ ਕੇਸ

ਕੈਲਾਸ਼ ਨਾਥ, ਜਾਗਰਣ, ਚੰਡੀਗੜ੍ਹ : ਸੜਕ ਦੁਰਘਟਨਾਵਾਂ ਵਿਚ ਜਾਨ ਜਾਣ ’ਤੇ ਸਰਕਾਰ ਵੱਲੋਂ ਦੋ ਲੱਖ ਰੁਪਏ ਦਾ ਅਤੇ ਜ਼ਖ਼ਮੀ ਹੋਣ ਦੀ ਹਾਲਤ ਵਿਚ 50 ਹਜ਼ਾਰ ਰੁਪਏ ਦਾ ਮੁਆਵਜ਼ਾ ਦਿੱਤਾ ਜਾਂਦਾ ਹੈ। ਸੁਪਰੀਮ ਕੋਰਟ ਦੇ ਨਿਰਦੇਸ਼ ’ਤੇ ਇਹ ਯੋਜਨਾ 2022 ਤੋਂ ਪੂਰੇ ਦੇਸ਼ ਵਿਚ ਤਾਂ ਲਾਗੂ ਹੈ ਪਰ ਨਾ ਤਾਂ ਲੋਕਾਂ ਨੂੰ ਇਸ ਸਬੰਧ ਵਿਚ ਵਧੇਰੇ ਜਾਣਕਾਰੀ ਹੈ ਅਤੇ ਨਾ ਹੀ ਸਰਕਾਰੀ ਵਿਭਾਗ ਇਸ ਨੂੰ ਲੈ ਕੇ ਜਾਗਰੂਕ ਹਨ। ਇਹੀ ਕਾਰਨ ਹੈ ਕਿ ਪੰਜਾਬ ਵਿਚ 3,300 ਕੇਸ ਪੈਂਡਿੰਗ ਪਏ ਹਨ। ਇਹ ਅੰਕੜਾ ਸਿਰਫ਼ 2022 ਤੋਂ 2023 ਤੱਕ ਦਾ ਹੀ। ਹੁਣ ਸਰਕਾਰ ਨੇ ਲੋਕਾਂ ਨੂੰ ਜਾਗਰੂਕ ਕਰਨ ਅਤੇ ਵਿਭਾਗ ਵਿਚ ਕਲੇਮ ਸੈਟਲ ਕਰਨ ਨੂੰ ਲੈ ਕੇ ਦਸੰਬਰ ਮਹੀਨੇ ਵਿਚ 8 ਜ਼ਿਲ੍ਹਿਆਂ ਵਿਚ ਕੈਂਪ ਲਾਉਣ ਦਾ ਫ਼ੈਸਲਾ ਕੀਤਾ ਹੈ। ਇਨ੍ਹਾਂ ਕੈਂਪਾਂ ਰਾਹੀਂ ਲੋਕਾਂ ਨੂੰ ਇਹ ਜਾਣਕਾਰੀ ਦਿੱਤੀ ਜਾਵੇਗੀ ਕਿ ਉਹ ਹਿੱਟ ਐਂਡ ਰਨ ਕੇਸ ਵਿਚ ਕਿਵੇਂ ਕਲੇਮ ਕਰ ਸਕਦੇ ਹਨ ਅਤੇ ਸਰਕਾਰੀ ਅਧਿਕਾਰੀਆਂ ਨੂੰ ਇਹ ਦੱਸਿਆ ਜਾਵੇਗਾ ਕਿ ਉਨ੍ਹਾਂ ਨੂੰ ਕਲੇਮ ਕਿਵੇਂ ਦੇਣਾ ਹੈ।

ਮੋਹਾਲੀ ਵਿਚ ਅਵਾਈਡ ਐਕਸੀਡੈਂਟ ਐੱਨਜੀਓ ਚਲਾਉਣ ਵਾਲੇ ਹਰਪ੍ਰੀਤ ਸਿੰਘ ਜੋ ਕਿ ਜ਼ਿਲ੍ਹਾ ਹਿੱਟ ਐਂਡ ਰਨ ਕਮੇਟੀ ਦੇ ਮੈਂਬਰ ਵੀ ਹਨ, ਨੇ ਦੱਸਿਆ ਕਿ ਸੁਪਰੀਮ ਕੋਰਟ ਦੇ ਹੁਕਮਾਂ ’ਤੇ ਸਾਰੇ ਜ਼ਿਲ੍ਹਿਾਂ ਵਿਚ ਕਮੇਟੀਆਂ ਤਾਂ ਬਣੀਆਂ ਹੋਈਆਂ ਹਨ ਪਰ ਜਾਗਰੂਕਤਾ ਦੀ ਘਾਟ ਕਾਰਨ ਪੀੜਤ ਪਰਿਵਾਰਾਂ ਨੂੰ ਕਲੇਮ ਨਹੀਂ ਮਿਲ ਪਾ ਰਿਹਾ ਹੈ। ਉਨ੍ਹਾਂ ਦੱਸਿਆ ਕਿ 16 ਨਵੰਬਰ ਨੂੰ ਇਸ ਸਬੰਧ ਵਿਚ ਟਰਾਂਸਪੋਰਟ ਮੰਤਰੀ ਲਾਲਜੀਤ ਸਿੰਘ ਭੁੱਲਰ ਦੇ ਨਾਲ ਮੀਟਿੰਗ ਹੋਈ ਸੀ, ਜਿਸ ਵਿਚ ਇਹ ਫ਼ੈਸਲਾ ਲਿਆ ਗਿਆ ਕਿ ਮਾਰਚ 2026 ਤੱਕ ਸਾਰੇ ਕੇਸਾਂ ਨੂੰ ਸੈਟਲ ਕੀਤਾ ਜਾਵੇਗਾ ਕਿਉਂਕਿ ਇਸ ਸਕੀਮ ਦੇ ਤਹਿਤ ਮੌਤ ਹੋਣ ’ਤੇ ਮ੍ਰਿਤਕ ਦੇ ਵਾਰਸਾਂ ਨੂੰ 2 ਲੱਖ ਰੁਪਏ, ਜ਼ਖ਼ਮੀ ਹੋਣ ਦੀ ਸੂਰਤ ਵਿਚ 50,000 ਰੁਪਏ ਦਾ ਮੁਆਵਜ਼ਾ ਦਿੱਤਾ ਜਾਂਦਾ ਹੈ। ਹਰਪ੍ਰੀਤ ਸਿੰਘ ਨੇ ਦੱਸਿਆ ਕਿ ਐੱਸਡੀਐੱਮ ਜ਼ਿਲ੍ਹੇ ਵਿਚ ਅਧਿਕਾਰਕ ਕਲੇਮ ਅਫ਼ਸਰ ਹੁੰਦੇ ਹਨ। ਕਿਉਂਕਿ ਲੋਕਾਂ ਨੂੰ ਇਹ ਜਾਣਕਾਰੀ ਨਹੀਂ ਹੈ ਕਿ ਉਹ ਕਲੇਮ ਕਿਵੇਂ ਲੈ ਸਕਦੇ ਹਨ, ਜਿਸ ਕਾਰਨ ਮਾਮਲੇ ਪੈਂਡਿੰਗ ਹੁੰਦੇ ਜਾ ਰਹੇ ਹਨ, ਜਿਸ ਨੂੰ ਦੇਖਦੇ ਹੋਏ ਦਸੰਬਰ ਮਹੀਨੇ ਵਿਚ ਅੱਠ ਜ਼ਿਲ੍ਹਿਆਂ ਵਿਚ ਕੈਂਪ ਲਗਾਏ ਜਾ ਰਹੇ ਹਨ। ਕੈਂਪ ਵਾਲੇ ਜ਼ਿਲ੍ਹੇ ਨੂੰ ਆਲੇ-ਦੁਆਲੇ ਦੇ ਜ਼ਿਲ੍ਹਿਆਂ ਨਾਲ ਜੋੜਿਆ ਗਿਆ ਹੈ। ਇਸ ਕੈਂਪ ਦਾ ਮੁੱਖ ਉਦੇਸ਼ ਲੋਕਾਂ ਨੂੰ ਇਹ ਜਾਣਕਾਰੀ ਦੇਣਾ ਹੈ ਕਿ ਉਹ ਕਿਵੇਂ ਕਲੇਮ ਲੈ ਸਕਦੇ ਹਨ।

ਕੈਂਪਾਂ ਦਾ ਸ਼ਡਿਊਲ

1 ਦਸੰਬਰ : ਮੋਹਾਲੀ ਨਾਲ ਲੱਗਦੇ ਜ਼ਿਲ੍ਹੇ ਰੋਪੜ, ਨਵਾਂਸ਼ਹਿਰ ਤੇ ਫਤਿਹਗੜ੍ਹ ਸਾਹਿਬ

2 ਦਸੰਬਰ : ਫ਼ਿਰੋਜ਼ਪੁਰ ਨਾਲ ਲੱਗਦੇ ਜ਼ਿਲ੍ਹੇ ਫ਼ਾਜ਼ਿਲਕਾ ਤੇ ਫ਼ਰੀਦਕੋਟ

3 ਦਸੰਬਰ : ਬਠਿੰਡਾ ਨਾਲ ਲੱਗਦੇ ਜ਼ਿਲ੍ਹੇ ਮਾਨਸੇ ਤੇ ਮੁਕਤਸਰ ਸਾਹਿਬ

9 ਦਸੰਬਰ : ਤਰਨਤਾਰਨ ਨਾਲ ਲੱਗਦਾ ਜ਼ਿਲ੍ਹਾ ਅੰਮ੍ਰਿਤਸਰ

10 ਦਸੰਬਰ : ਗੁਰਦਾਸਪੁਰ ਨਾਲ ਲੱਗਦਾ ਜ਼ਿਲ੍ਹਾ ਪਠਾਨਕੋਟ

16 ਦਸੰਬਰ : ਪਟਿਆਲਾ ਨਾਲ ਲੱਗਦੇ ਜ਼ਿਲ੍ਹੇ ਮਾਲੇਰਕੋਟਲਾ, ਸੰਗਰੂਰ ਤੇ ਬਰਨਾਲਾ

19 ਦਸੰਬਰ : ਲੁਧਿਆਣਾ ਨਾਲ ਲੱਗਦਾ ਜ਼ਿਲ੍ਹਾ ਮੋਗਾ

24 ਦਸੰਬਰ : ਜਲੰਧਰ ਨਾਲ ਲੱਗਦੇ ਜ਼ਿਲ੍ਹੇ ਹੁਸ਼ਿਆਰਪੁਰ ਤੇ ਕਪੂਰਥਲਾ