ਇਕ ਲੱਖ ਰੁਪਏ ਦਾ ਹੋਇਆ ਨੰਬਰ ਟ੍ਰਾਂਸਪੋਰਟ ਵਿਭਾਗ ਨੇ '295' ਨੂੰ ਬਣਾਇਆ ਫੈਂਸੀ ਨੰਬਰ, ਇੰਨੀ ਰੱਖੀ ਕੀਮਤ; ਮੂਸੇਵਾਲਾ ਦੇ ਗੀਤ ਨਾਲ ਵਧੀ ਮੰਗ

ਗੁਰਪ੍ਰੇਮ ਲਹਿਰੀ, ਜਾਗਰਣ ,ਬਠਿੰਡਾ: ਮਰਹੂਮ ਗਾਇਕ ਕਲਾਕਾਰ ਸਿੱਧੂ ਮੂਸੇਵਾਲਾ ਦੇ ਗੀਤ '295' ਦਾ ਅਸਰ ਹੁਣ ਕਾਰਾਂ ਦੇ ਨੰਬਰਾਂ ਤੱਕ ਪਹੁੰਚ ਗਿਆ ਹੈ। ਟ੍ਰਾਂਸਪੋਰਟ ਵਿਭਾਗ ਨੇ ਪਹਿਲਾਂ ਆਮ ਸ਼੍ਰੇਣੀ ਵਿਚ ਆਉਂਦੇ ਇਸ ਨੰਬਰ ਨੂੰ ਹੁਣ ਫੈਂਸੀ ਨੰਬਰ ਐਲਾਨ ਦਿੱਤਾ ਹੈ ਤੇ ਇਸ ਦੀ ਰਾਖਵੀਂ ਕੀਮਤ ਇਕ ਲੱਖ ਰੁਪਏ ਤੈਅ ਕੀਤੀ ਹੈ।

ਟ੍ਰਾਂਸਪੋਰਟ ਵਿਭਾਗ ਦੇ ਅਧਿਕਾਰੀਆਂ ਮੁਤਾਬਕ ਆਮ ਤੌਰ 'ਤੇ 0001, 0007, 0786, 9999 ਵਰਗੇ ਨੰਬਰਾਂ ਨੂੰ ਫੈਂਸੀ ਮੰਨਿਆ ਜਾਂਦਾ ਸੀ ਪਰ ਗਾਇਕ ਕਲਾਕਾਰ ਮੂਸੇਵਾਲਾ ਦੇ ਪ੍ਰਸ਼ੰਸਕਾਂ ਦੇ ਕਾਰਨ 295 ਨੰਬਰ ਦੀ ਮੰਗ ਇਸ ਪੱਧਰ ਤੱਕ ਪਹੁੰਚ ਗਈ ਹੈ ਕਿ ਇਹ ਵੀ ਪ੍ਰੀਮੀਅਮ ਨੰਬਰਾਂ ਦੀ ਸੂਚੀ ਵਿਚ ਸ਼ਾਮਲ ਹੋ ਗਿਆ। ਪਿਛਲੇ ਕੁਝ ਹਫ਼ਤਿਆਂ ਵਿਚ ਆਨਲਾਈਨ ਪੋਰਟਲ ਅਤੇ ਦਫ਼ਤਰਾਂ ਵਿਚ 295 ਨੰਬਰ ਨੂੰ ਲੈ ਕੇ ਲਗਾਤਾਰ ਪੁੱਛਗਿੱਛ ਹੋ ਰਹੀ ਸੀ। ਕਈ ਅਰਜ਼ੀਦਾਰਾਂ ਨੇ ਤਾਂ ਇਸ ਨੰਬਰ ਲਈ ਵਾਧੂ ਪੈਸਾ ਦੇਣ ਦੀ ਹਸਰਤ ਬਿਆਨ ਕੀਤੀ ਸੀ। ਇਸ ਲਈ ਜੋ ਵੀ ਅਰਜ਼ੀਦਾਰ ਇਕ ਲੱਖ ਰੁਪਏ ਦੀ ਰਾਖਵੀਂ ਕੀਮਤ ਤੋਂ ਵੱਧ ਬੋਲੀ ਲਗਾਏਗਾ, ਉਹੀ ਇਸ ਨੰਬਰ ਨੂੰ ਪ੍ਰਾਪਤ ਕਰ ਸਕੇਗਾ।

ਦੂਜੇ ਪਾਸੇ ਕੁਝ ਲੋਕ ਇਸ ਕਦਮ ਨੂੰ ਸਹੀ ਮੰਨਦੇ ਹਨ ਕਿ ਜਦੋਂ ਮੰਗ ਵਧ ਰਹੀ ਹੈ ਤਾਂ ਨੰਬਰ ਨੂੰ ਪ੍ਰੀਮੀਅਮ ਸ਼੍ਰੇਣੀ ਵਿਚ ਰੱਖਣਾ ਠੀਕ ਹੈ ਜਦੋਂਕਿ ਕੁਝ ਲੋਕ ਇਸ ਨੂੰ ਵਿਭਾਗ ਦਾ 'ਮਾਲੀਆ ਵਧਾਉਣ ਦਾ ਤਰੀਕਾ' ਦੱਸ ਰਹੇ ਹਨ। 295 ਨੰਬਰ ਦਾ ਅਚਾਨਕ ਫੈਂਸੀ ਨੰਬਰ ਬਣ ਜਾਣਾ ਗਾਇਕ ਕਲਾਕਾਰ ਮੂਸੇਵਾਲਾ ਦੀ ਹਰਮਨਪਿਆਰਤਾ ਦੀ ਮਿਸਾਲ ਹੈ।