ਪਾਕਿਸਤਾਨ ਗਈ ਪੰਜਾਬ ਦੀ ਔਰਤ ਲਾਪਤਾ, ਇਮੀਗ੍ਰੇਸ਼ਨ ਦਫ਼ਤਰ 'ਚ ਦਿੱਤੀ ਸੀ ਅਧੂਰੀ ਜਾਣਕਾਰੀ; ਸੁਰੱਖਿਆ ਏਜੰਸੀਆਂ ਨੇ ਸ਼ੁਰੂ ਕੀਤੀ ਜਾਂਚ

ਜਾਗਰਣ ਸੰਵਾਦਦਾਤਾ, ਅੰਮ੍ਰਿਤਸਰ : ਪਾਕਿਸਤਾਨ 'ਚ ਸਿੱਖ ਜਥੇ ਦੇ ਨਾਲ ਗਈ ਕਪੂਰਥਲਾ ਜ਼ਿਲ੍ਹੇ ਦੀ ਇਕ ਔਰਤ ਪਾਕਿਸਤਾਨ 'ਚ ਲਾਪਤਾ ਹੋ ਗਈ। ਧਾਰਮਿਕ ਸਥਾਨਾਂ ਦੇ ਦਰਸ਼ਨ ਤੋਂ ਬਾਅਦ ਜਿੱਥੇ ਪੂਰਾ ਜਥਾ ਵਾਪਸ ਭਾਰਤ ਆ ਗਿਆ, ਉਥੇ ਉਕਤ ਔਰਤ ਅਜੇ ਤਕ ਆਪਣੇ ਘਰ ਨਹੀਂ ਪਹੁੰਚੀ ਹੈ।

ਜਾਣਕਾਰੀ ਮੁਤਾਬਕ, ਸਰਬਜੀਤ ਨਾਂ ਦੀ ਇਸ ਔਰਤ ਨੇ ਪਾਕਿਸਤਾਨ ਜਾਣ ਤੋਂ ਪਹਿਲਾਂ ਇਮੀਗ੍ਰੇਸ਼ਨ ਦਫਤਰ 'ਚ ਜਾਣਕਾਰੀ ਅਧੂਰੀ ਦਿੱਤੀ ਸੀ, ਜਿਸ ਦੀ ਜਾਂਚ ਹੁਣ ਸੁਰੱਖਿਆ ਏਜੰਸੀਆਂ ਨੇ ਸ਼ੁਰੂ ਕਰ ਦਿੱਤੀ ਹੈ। ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਜਥਾ ਵਾਪਸ ਆਉਣ ਤੋਂ ਬਾਅਦ ਜਦੋਂ ਔਰਤ ਦੇ ਘਰ ਨਾ ਪਹੁੰਚਣ ਦੀ ਜਾਣਕਾਰੀ ਮਿਲੀ ਤਾਂ ਪਰਿਵਾਰ ਨੇ ਇਸ ਦੀ ਸ਼ਿਕਾਇਤ ਸੰਬੰਧਿਤ ਵਿਭਾਗਾਂ ਨੂੰ ਦਿੱਤੀ।

ਇਮੀਗ੍ਰੇਸ਼ਨ ਤੇ ਸੁਰੱਖਿਆ ਏਜੰਸੀਆਂ ਹੁਣ ਇਹ ਪਤਾ ਲਗਾਉਣ 'ਚ ਜੁਟੀਆਂ ਹਨ ਕਿ ਔਰਤ ਕਿੱਥੇ ਰੁਕੀ ਹੋਈ ਹੈ, ਕਿਹੜੇ ਹਾਲਾਤ 'ਚ ਉਹ ਜਥੇ ਤੋਂ ਅਲੱਗ ਹੋਈ ਤੇ ਕੀ ਉਸਨੇ ਪਾਕਿਸਤਾਨ 'ਚ ਰੁਕਣ ਦਾ ਕੋਈ ਨਿੱਜੀ ਫੈਸਲਾ ਲਿਆ ਹੈ। ਇਸ ਮਾਮਲੇ ਨੂੰ ਲੈ ਕੇ ਪੰਜਾਬ ਪੁਲਿਸ, ਕੇਂਦਰ ਸਰਕਾਰ ਦੀਆਂ ਜਾਂਚ ਏਜੰਸੀਆਂ ਤੇ ਐਸਜੀਪੀਸੀ ਵੀ ਲਗਾਤਾਰ ਸੰਪਰਕ 'ਚ ਹਨ।

ਉਸਦੇ ਮੋਬਾਈਲ 'ਤੇ ਵੀ ਸੰਪਰਕ ਨਹੀਂ ਹੋ ਰਿਹਾ। ਮਾਮਲੇ ਦੀ ਸੰਵੇਦਨਸ਼ੀਲਤਾ ਨੂੰ ਦੇਖਦਿਆਂ ਦੋਹਾਂ ਦੇਸ਼ਾਂ ਵਿਚਕਾਰ ਤਾਲਮੇਲ ਵਧਾਇਆ ਜਾ ਰਿਹਾ ਹੈ। ਜਾਂਚ ਪੂਰੀ ਹੋਣ ਤਕ ਅਧਿਕਾਰੀ ਕਿਸੇ ਵੀ ਸੰਭਾਵਨਾ ਨੂੰ ਨਕਾਰ ਨਹੀਂ ਰਹੇ।