ਮਾਲ ਵਿਭਾਗ ਦੀ ਵੱਡੀ ਨਾਕਾਮੀ ਦਾ ਪਰਦਾਫਾਸ਼, ਨਕਸ਼ੇ 'ਚੋਂ ਗਾਇਬ ਹੋਇਆ ਇਕ ਕਿੱਲੇ ਦਾ ਨਹਿਰੀ ਖਾਲ੍ਹ; ਕਿਸਾਨਾਂ ’ਚ ਵਧੇ ਆਪਸੀ ਝਗੜੇ

ਤਰਲੋਚਨ ਸਿੰਘ ਜੋਧਾਨਗਰੀ, ਪੰਜਾਬੀ ਜਾਗਰਣ, ਟਾਂਗਰਾ : ਪੰਜਾਬ ਸਰਕਾਰ ਵੱਲੋਂ ਲੋਕਾਂ ਨੂੰ ਆਉਣ ਵਾਲੇ ਸਮੇਂ ਵਿਚ ਪਾਣੀ ਦੇ ਸੰਕਟ ਤੋਂ ਬਚਾਉਣ ਲਈ ਨਹਿਰੀ ਸੂਏ ਅਤੇ ਖਾਲ੍ਹ ਪੱਕੇ ਕਰਵਾ ਕੇ ਨਹਿਰੀ ਖਾਲੇ ਜੋ ਕਿ ਕਿਸਾਨਾਂ ਨੇ ਆਪਣੇ ਖੇਤਾਂ ਵਿਚ ਮਿਲਾ ਲਏ ਸਨ, ਨਵੇਂ ਸਿਰੇ ਤੋਂ ਨਿਸ਼ਾਨਦੇਹੀ ਕਰਵਾ ਕੇ ਸੀਮੈਂਟ ਦੇ ਪੋਰੇ ਪਵਾਏ ਜਾ ਰਹੇ ਹਨ। ਪਰ ਇਸ ਵਿਚ ਕੁਝ ਕਿਸਾਨਾਂ ਵੱਲੋਂ ਪੂਰਾ ਸਹਿਯੋਗ ਨਹੀਂ ਦਿੱਤਾ ਜਾ ਰਿਹਾ, ਸਗੋਂ ਮਾਲ ਵਿਭਾਗ ਦੇ ਰਿਕਾਰਡ ਵਿਚ ਦਰਜ ਨਾ ਹੋਣ ਦਾ ਬਹਾਨੇ ਦੀ ਆੜ ਨਾਲ ਕੰਮ ਵਿਚ ਰੁਕਾਵਟ ਖੜੀ ਕੀਤੀ ਜਾ ਰਹੀ ਹੈ। ਕਿਉਂਕਿ ਉਹ ਵਿਭਾਗ ਦੀ ਜ਼ਮੀਨ ਵਾਹੁਣ ਦੇ ਲਾਭ ਲੈਣ ਦੇ ਆਦੀ ਹੋ ਚੁੱਕੇ ਹਨ। ਜਦ ਕਿ ਮਾਲ ਵਿਭਾਗ ਦੇ ਰਿਕਾਰਡ ਵਿਚ ਵੀ ਵੱਡੀ ਨਕਾਮੀ ਸਾਹਮਣੇ ਆ ਰਹੀ ਹੈ। ਜਿਸ ਦੀ ਮਿਸਾਲ ਪਿੰਡ ਮੁੱਛਲ ਦੇ ਨਹਿਰੀ ਸੂਏ ਦੀਆਂ ਟੇਲਾਂ ਤੋਂ ਅੱਗੇ ਜਾ ਰਹੇ ਪਿੰਡ ਧੂਲਕਾ ਅਤੇ ਮੁੱਛਲ ਦੇ ਨਹਿਰੀ ਖਾਲ੍ਹ ਹੀ ਨਕਸ਼ੇ ਵਿਚੋਂ ਗਾਇਬ ਹੋਣ ਕਾਰਣ ਕਿਸਾਨਾਂ ਵਿਚ ਲੜਾਈਆਂ ਝਗੜਿਆਂ ਦਾ ਮੁੱਖ ਕਾਰਨ ਬਣ ਰਹੇ ਹਨ। ਪਿੰਡ ਧੂਲਕਾ ਅਤੇ ਬਾਣੀਆਂ, ਮਦੇਪੁਰ ਨੂੰ ਜਾਣ ਵਾਲੇ ਨਹਿਰੀ ਖਾਲ੍ਹ ਨੂੰ ਪੱਕਿਆਂ ਕਰਨ ਲਈ ਜ਼ਮੀਨਦੋਜ ਪੋਰੇ ਪਾਉਣ ਲਈ ਨਹਿਰੀ ਅਤੇ ਮਾਲ ਵਿਭਾਗ ਵਿਭਾਗ ਦੇ ਕਰਮਚਾਰੀ/ਅਧਿਕਾਰੀ ਪਹੁੰਚੇ ਹੋਏ ਸਨ ਤਾਂ ਸੂਏ ਦੀਆਂ ਟੇਲਾਂ ਤੋਂ ਸ਼ੁਰੂ ਹੋਣ ਵਾਲਾ ਨਹਿਰੀ ਖਾਲ੍ਹ ਮਾਲ ਅਤੇ ਨਹਿਰੀ ਵਿਭਾਗ ਦੇ ਨਕਸ਼ੇ ਵਿਚੋਂ ਗਾਇਬ ਸੀ। ਜਿਸ ਕਾਰਨ ਕਿਸਾਨ ਹਰਜਿੰਦਰ ਸਿੰਘ ਨੇ ਆਪਣੇ ਖੇਤਾਂ ਵਿਚੋਂ ਪੋਰੇ ਪਾਉਣ ਦਾ ਕੰਮ ਰੋਕ ਦਿੱਤਾ। ਅਗਲੇ ਕਿਸਾਨਾਂ ਨੇ ਵੀ ਇਹ ਕਹਿ ਕੇ ਕੰਮ ਰੋਕ ਦਿੱਤਾ ਗਿਆ ਕਿ ਪਹਿਲਾਂ ਸ਼ੁਰੂ ਵਾਲੇ ਖਾਲ੍ਹ ਪਵਾਏ ਜਾਣ ਤਾਂ ਹੀ ਅਸੀਂ ਅਗਲਾ ਕੰਮ ਕਰਨ ਦਿਆਂਗੇ। ਪਿੰਡ ਧੂਲਕਾ, ਬਾਣੀਆਂ, ਮਦੇਪੁਰ ਜਾਂਦੇ ਇਹ ਖਾਲ੍ਹ ਪਿੰਡ ਮੁਛੱਲ ਦੇ ਨਹਿਰੀ ਖਾਲ੍ਹ ਦੇ ਨਾਲ ਨਾਲ ਚੱਲਦੇ ਸਨ। ਵਿਭਾਗ ਵੱਲੋਂ ਪਿੰਡ ਮੁਛੱਲ ਦੀ ਹਦੂਦ ਵਿਚ ਆਰੰਭ ਤੋਂ ਖਾਲ੍ਹ ਕੱਢਣ ਦੀ ਕੋਸ਼ਿਸ਼ ਕੀਤੀ ਤਾਂ ਪਿੰਡ ਮੁੱਛਲ ਦੇ ਕਿਸਾਨਾਂ ਨੇ ਇਹ ਕਹਿ ਕੇ ਕੰਮ ਰੋਕ ਦਿੱਤਾ ਕਿ ਸਾਡੇ ਪਿੰਡ ਮੁੱਛਲ ਦੀ ਹਦੂਦ ਵਿਚ ਕੇਵਲ ਸਾਡੇ ਪਿੰਡ ਨੂੰ ਜਾਣ ਵਾਲਾ ਖਾਲ੍ਹ ਹੀ ਕੱਢਿਆ ਜਾਵੇ। ਇਸ ਸਮੇਂ ਨਹਿਰੀ ਅਤੇ ਮਾਲ ਵਿਭਾਗ ਦੇ ਐਸਡੀਓ ਸੁਖਬੀਰ ਸਿੰਘ, ਕਾਨੂੰਗੋ ਸਤਨਾਮ ਸਿੰਘ, ਪਟਵਾਰੀ ਮੇਹਰਬਾਨ ਸਿੰਘ, ਨਹਿਰੀ ਵਿਭਾਗ ਦੇ ਜੇਈ ਹਰਮਨ ਸਿੰਘ, ਪਟਵਾਰੀ ਹਰਿੰਦਰ ਸਿੰਘ, ਪ੍ਰਭਜੋਤ ਸਿੰਘ, ਗੁਰਦੇਵ ਸਿੰਘ, ਨਿਸ਼ਾਨ ਸਿੰਘ, ਹਰਜਿੰਦਰ ਸਿੰਘ, ਪੁਲਿਸ ਚੌਂਕੀ ਟਾਂਗਰਾ ਦੇ ਇੰਚਾਰਜ ਸਿਕੰਦਰ ਲਾਲ, ਏਐਸਆਈ ਹਜਾਰਾ ਸਿੰਘ ਹਾਜਰ ਸਨ। ਜਦੋਂ ਪੱਤਰਕਾਰਾਂ ਵੱਲੋਂ ਐਸਡੀਓ ਸੁਖਬੀਰ ਸਿੰਘ ਨੂੰ ਵਿਭਾਗੀ ਰਿਕਾਰਡ ਵਿਚੋਂ ਤਿੰਨ ਪਿੰਡਾਂ ਨੂੰ ਜਾ ਰਿਹਾ ਨਹਿਰੀ ਖਾਲ੍ਹ ਵਿਭਾਗ ਦੇ ਨਕਸ਼ੇ ਵਿਚੋਂ ਗਾਇਬ ਹੋਣ ਬਾਰੇ ਪੁੱਛਿਆ ਗਿਆ ਤਾਂ ਉਨ੍ਹਾਂ ਕਿਹਾ ਕਿ ਇਹ ਨਹਿਰੀ ਖਾਲ੍ਹ ਜ਼ੁਬਾਨੀ ਕਲਾਮੀ ਛੱਡੇ ਹੋਣਗੇ। ਜਦੋਂ ਕਿ ਬਜ਼ੁਰਗ ਕਿਸਾਨਾਂ ਅਨੁਸਾਰ ਇਹ ਖਾਲ੍ਹ ਪਿਛਲੇ ਕਈ ਦਹਾਕਿਆਂ ਤੋਂ ਚੱਲਦੇ ਰਹੇ ਹਨ। ਹੁਣ ਦੁਬਾਰਾ ਦੋਵੇ ਕਾਨੂੰਗੋ ਹਲਕਿਆਂ ਦੀ ਨਿਸ਼ਾਨਦੇਹੀ ਨਹਿਰੀ ਵਿਭਾਗ ਵੱਲੋਂ ਕਰਵਾ ਕੇ ਕਰਵਾਈ ਅਮਲ ਵਿਚ ਲਿਆਂਦੀ ਜਾ ਰਹੀ ਹੈ। ਇਸ ਮੌਕੇ ਪਿੰਡ ਮੁਛੱਲ ਦੇ ਸਾਬਕਾ ਸਰਪੰਚ ਸੁਖਰਾਜ ਸਿੰਘ ਪਿੰਡ ਧੂਲਾਕਾ ਦੇ ਸਰਪੰਚ ਵਰਿੰਦਰ ਸਿੰਘ, ਸੁਖਵਿੰਦਰ ਸਿੰਘ ਸੁਖਾ ਨੰਬਰਦਾਰ, ਜਗੀਰ ਸਿੰਘ ਮੈਂਬਰ, ਸਰਬਜੀਤ ਸਿੰਘ ਸਾਬਕਾ ਮੈਂਬਰ, ਸਰਬਜੀਤ ਸਿੰਘ ਛੱਬਾ ਸਾਬਕਾ ਮੈਂਬਰ ਆਦਿ ਹਾਜ਼ਰ ਸਨ।