ਮਹਿਜ਼ 110 ਰੁਪਏ ਤੇ ਮੋਬਾਈਲ ਲਈ ਮਜ਼ਦੂਰ ਦਾ ਬੇਰਹਿਮੀ ਨਾਲ ਕਤਲ, ਪੁਲਿਸ ਵੱਲੋਂ ਦੋ ਡਿਲੀਵਰੀ ਬੁਆਏ ਗ੍ਰਿਫ਼ਤਾਰ

ਡਿਜੀਟਲ ਡੈਸਕ, ਹੈਦਰਾਬਾਦ: ਤੇਲੰਗਾਨਾ ਦੇ ਸਿਕੰਦਰਾਬਾਦ ਤੋਂ ਇੱਕ ਬੇਹੱਦ ਦਿਲ ਦਹਿਲਾ ਦੇਣ ਵਾਲਾ ਮਾਮਲਾ ਸਾਹਮਣੇ ਆਇਆ ਹੈ। ਇੱਥੇ ਮਹਿਜ਼ 110 ਰੁਪਏ ਨਕਦ ਅਤੇ ਇੱਕ ਸਧਾਰਨ ਮੋਬਾਈਲ ਫ਼ੋਨ ਲਈ ਇੱਕ ਦਿਹਾੜੀਦਾਰ ਮਜ਼ਦੂਰ ਦਾ ਪੱਥਰਾਂ ਨਾਲ ਵਾਰ ਕਰ ਕੇ ਬੇਰਹਿਮੀ ਨਾਲ ਕਤਲ ਕਰ ਦਿੱਤਾ ਗਿਆ। ਕਈ ਦਿਨਾਂ ਦੀ ਜਾਂਚ ਤੋਂ ਬਾਅਦ ਹੈਦਰਾਬਾਦ ਪੁਲਿਸ ਨੇ ਇਸ ਮਾਮਲੇ ਵਿੱਚ ਦੋ ਡਿਲੀਵਰੀ ਬੁਆਏਜ਼ ਨੂੰ ਗ੍ਰਿਫ਼ਤਾਰ ਕੀਤਾ ਹੈ, ਜਿਨ੍ਹਾਂ ਨੇ ਲੁੱਟ-ਖੋਹ ਦੇ ਇਰਾਦੇ ਨਾਲ ਇਸ ਖ਼ੌਫਨਾਕ ਵਾਰਦਾਤ ਨੂੰ ਅੰਜਾਮ ਦਿੱਤਾ ਸੀ।

ਦੱਸ ਦੇਈਏ ਕਿ ਮ੍ਰਿਤਕ ਦੀ ਪਛਾਣ 38 ਸਾਲਾ ਜੈ ਪ੍ਰਕਾਸ਼ ਦੇਸ਼ਮੁਖ ਵਜੋਂ ਹੋਈ ਹੈ। ਜੈ ਪ੍ਰਕਾਸ਼ ਪੇਸ਼ੇ ਤੋਂ ਮਜ਼ਦੂਰ ਸੀ ਅਤੇ ਕੰਮ ਦੀ ਭਾਲ ਵਿੱਚ ਹੈਦਰਾਬਾਦ ਆਇਆ ਹੋਇਆ ਸੀ। ਉਹ ਅਕਸਰ ਵੱਖ-ਵੱਖ ਕੰਸਟ੍ਰਕਸ਼ਨ ਸਾਈਟਾਂ 'ਤੇ ਹੀ ਰਹਿੰਦਾ ਹੁੰਦਾ ਸੀ। 2 ਜੂਨ ਨੂੰ ਉਹ ਮੀਆਪੁਰ ਵਿਖੇ ਰਹਿਣ ਵਾਲੇ ਆਪਣੇ ਭਰਾ ਨੂੰ ਮਿਲਣ ਲਈ ਸਿਕੰਦਰਾਬਾਦ ਆਇਆ ਸੀ, ਪਰ ਅਗਲੀ ਹੀ ਸਵੇਰ ਉਸਦੀ ਮੌਤ ਦੀ ਖ਼ਬਰ ਆ ਗਈ।

ਖ਼ੂਨ ਨਾਲ ਲੱਥਪੱਥ ਮਿਲੀ ਸੀ ਲਾਸ਼

3 ਜੂਨ ਦੀ ਤੜਕੇ ਸਵੇਰੇ ਪੁਲਿਸ ਨੂੰ ਸੂਚਨਾ ਮਿਲੀ ਕਿ ਰੇਲਵੇ ਬ੍ਰਿਜ ਅਤੇ ਤੁਕਾਰਾਮਗੇਟ ਦੇ ਵਿਚਕਾਰ ਬਾਈਪਾਸ ਰੋਡ 'ਤੇ ਇੱਕ ਸ਼ਖਸ ਖ਼ੂਨ ਨਾਲ ਲੱਥਪੱਥ ਹਾਲਤ ਵਿੱਚ ਬੇਸੁਰਤ ਪਿਆ ਹੈ। ਜਦੋਂ ਪੁਲਿਸ ਮੌਕੇ 'ਤੇ ਪਹੁੰਚੀ ਤਾਂ ਉੱਥੋਂ ਦਾ ਮੰਜ਼ਰ ਭਿਆਨਕ ਸੀ। ਜੈ ਪ੍ਰਕਾਸ਼ ਦੇ ਸਿਰ 'ਤੇ ਗੰਭੀਰ ਸੱਟਾਂ ਦੇ ਨਿਸ਼ਾਨ ਸਨ ਅਤੇ ਕੋਲ ਹੀ ਖ਼ੂਨ ਨਾਲ ਲਿੱਬੜੇ ਦੋ ਵੱਡੇ ਪੱਥਰ ਪਏ ਸਨ।

ਇਸ ਤੋਂ ਬਾਅਦ ਖ਼ਦਸ਼ਾ ਜਤਾਇਆ ਗਿਆ ਕਿ ਇਨ੍ਹਾਂ ਹੀ ਪੱਥਰਾਂ ਨਾਲ ਲਗਾਤਾਰ ਵਾਰ ਕਰਕੇ ਉਸਦਾ ਸਿਰ ਕੁਚਲਿਆ ਗਿਆ ਸੀ। ਘਟਨਾ ਸਥਾਨ ਦੇ ਕੋਲ ਸ਼ਰਾਬ ਦੀ ਇੱਕ ਬੋਤਲ ਅਤੇ ਇੱਕ ਬੈਗ ਵੀ ਖਿੱਲਰਿਆ ਹੋਇਆ ਮਿਲਿਆ।

ਕਿਵੇਂ ਦਿੱਤਾ ਵਾਰਦਾਤ ਨੂੰ ਅੰਜਾਮ?

ਸੀਸੀਟੀਵੀ (CCTV) ਫੁਟੇਜ ਅਤੇ ਤਕਨੀਕੀ ਇਨਪੁਟਸ ਦੀ ਮਦਦ ਨਾਲ ਪੁਲਿਸ ਜਦੋਂ ਮੁਲਜ਼ਮਾਂ ਤੱਕ ਪਹੁੰਚੀ, ਤਾਂ ਇੱਕ ਹੈਰਾਨ ਕਰਨ ਵਾਲੀ ਕਹਾਣੀ ਸਾਹਮਣੇ ਆਈ। ਪੁਲਿਸ ਮੁਤਾਬਕ, ਦੋ ਮੁਲਜ਼ਮਾਂ ਧਾਬੀ ਵਿਨੋਦ (ਕਿਰਾਣਾ ਡਿਲੀਵਰੀ ਬੁਆਏ) ਅਤੇ ਮੱਕਾਲਾ ਮੋਹਨ (ਫੂਡ ਡਿਲੀਵਰੀ ਬੁਆਏ) ਨੇ ਮੋਂਡਾ ਮਾਰਕੀਟ ਦੇ ਕੋਲੋਂ ਜੈ ਪ੍ਰਕਾਸ਼ ਨੂੰ ਆਪਣਾ ਨਿਸ਼ਾਨਾ ਬਣਾਇਆ।

ਪ੍ਰਵਾਸੀ ਮਜ਼ਦੂਰ ਨੂੰ ਕੁਝ ਇਸ ਤਰ੍ਹਾਂ ਬਣਾਇਆ ਸ਼ਿਕਾਰ

ਮਿਲੀ ਜਾਣਕਾਰੀ ਅਨੁਸਾਰ ਮੁਲਜ਼ਮਾਂ ਨੇ ਜੈ ਪ੍ਰਕਾਸ਼ ਨੂੰ ਸਿਕੰਦਰਾਬਾਦ ਰੇਲਵੇ ਸਟੇਸ਼ਨ ਛੱਡਣ ਦੇ ਬਹਾਨੇ ਆਪਣੀ ਇਲੈਕਟ੍ਰਿਕ ਬਾਈਕ 'ਤੇ ਬਿਠਾ ਲਿਆ। ਸਟੇਸ਼ਨ ਲੈ ਕੇ ਜਾਣ ਦੀ ਬਜਾਏ ਉਹ ਉਸਨੂੰ ਇੱਕ ਸੁੰਨਸਾਨ ਸੜਕ 'ਤੇ ਲੈ ਗਏ ਅਤੇ ਲੁੱਟ-ਖੋਹ ਕਰਨ ਲੱਗੇ। ਜਦੋਂ ਜੈ ਪ੍ਰਕਾਸ਼ ਨੇ ਇਸਦਾ ਵਿਰੋਧ ਕੀਤਾ, ਤਾਂ ਦੋਵਾਂ ਮੁਲਜ਼ਮਾਂ ਨੇ ਕੋਲ ਪਏ ਪੱਥਰਾਂ ਨਾਲ ਉਸਦੇ ਸਿਰ 'ਤੇ ਉਦੋਂ ਤੱਕ ਵਾਰ ਕੀਤੇ, ਜਦੋਂ ਤੱਕ ਕਿ ਉਸਦੀ ਜਾਨ ਨਹੀਂ ਚਲੀ ਗਈ।

110 ਰੁਪਏ ਅਤੇ ਇੱਕ ਮੋਬਾਈਲ ਫ਼ੋਨ ਲਈ ਕਤਲ

ਜ਼ਿਕਰਯੋਗ ਹੈ ਕਿ ਇੰਨੀ ਵੱਡੀ ਵਾਰਦਾਤ ਨੂੰ ਅੰਜਾਮ ਦੇਣ ਤੋਂ ਬਾਅਦ ਹਤਿਆਰਿਆਂ ਦੇ ਹੱਥ ਸਿਰਫ਼ 110 ਰੁਪਏ ਨਕਦ ਅਤੇ ਇੱਕ ਮੋਬਾਈਲ ਫ਼ੋਨ ਹੀ ਲੱਗਿਆ। ਪੁਲਿਸ ਨੇ 8 ਜੂਨ ਨੂੰ ਦੋਵਾਂ ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। ਉਨ੍ਹਾਂ ਕੋਲੋਂ ਲੁੱਟਿਆ ਹੋਇਆ ਮੋਬਾਈਲ ਅਤੇ ਵਾਰਦਾਤ ਵਿੱਚ ਵਰਤੀ ਗਈ ਇਲੈਕਟ੍ਰਿਕ ਬਾਈਕ ਬਰਾਮਦ ਕਰ ਲਈ ਗਈ ਹੈ।