ਮੈਨੂੰ ਪੁਰਖਿਆਂ ਦੀਆਂ ਪ੍ਰੰਪਰਾਵਾਂ ’ਤੇ ਮਾਣ ਅਜੈਬ ਸਿੰਘ ਚੱਠਾ

ਹਰ ਬੰਦੇ ਨੂੰ ਆਪਣੇ ਸਮਾਜ ਤੇ ਲੋੜਵੰਦ ਹਮਸਾਇਆਂ ਲਈ ਸਰਦੀ, ਪੁੱਜਦੀ ਸੇਵਾ ਕਰਦੇ ਰਹਿਣਾ ਚਾਹੀਦਾ। ਕੈਨੇਡਾ ਹੋਵਾਂ ਤਾਂ ਪੰਜਾਬ ਭੁੱਲਿਆ ਰਹਿੰਦਾ। ਜੇ ਪੰਜਾਬ ਹੋਵਾਂ ਤਾਂ ਕੈਨੇਡਾ ਵਿਸਰਿਆ ਰਹਿੰਦਾ ਤੇ ਮੈਂ ਪੰਜ ਦਰਿਆਵਾਂ ਦੇ ਵਹਿਣਾਂ ਵਿਚ ਵਹਿੰਦਾ ਰਹਿੰਦਾ ਹਾਂ। ਮੈਂ ਜਨਮ-ਜਾਤ ਪੰਜਾਬੀ ਹਾਂ ਤੇ ਮਾਨਵਤਾ ਲਈ ਸੇਵਾ-ਭਾਵਨਾ ਵੀ ਮੇਰੇ ’ਚ ਕੁੱਟ-ਕੁੱਟ ਕੇ ਭਰੀ ਹੋਈ ਹੈ।’ ਇਹ ਵਿਚਾਰ ਗਲੋਬ ਪਿੰਡ ਵਿਚ ਮਕਬੂਲ ਹੋ ਚੁੱਕੇ ਸਮਾਜ ਸੇਵਕ ਤੇ ਕਾਨੂੰਨਦਾਨ ਸਰਦਾਰ ਅਜੈਬ ਸਿੰਘ ਚੱਠਾ ਦੇ ਹਨ । ਉਨ੍ਹਾਂ ਦੇ ਜੀਵਨ ਦੇ ਹੋਰ ਪਹਿਲੂਆਂ ਉਤੇ ਚਾਨਣਾ ਪਾਉਂਦੀ ਗੱਲਬਾਤ ਦੇ ਕੁਝ ਅੰਸ਼ ਇਥੇ ਪੇਸ਼ ਹਨ :

- ਫਾਨੀ ਜਹਾਨ ’ਚ ਅੱਖਾਂ ਖੋਲ੍ਹਣ ਵਾਲਾ ਸਮਾਂ-ਸਥਾਨ ਤੇ ਥਿਤ-ਵਾਰ?

ਢੰਡੋਵਾਲ, ਜ਼ਿਲ੍ਹਾ ਜਲੰਧਰ ਵਿਖੇ ਮੇਰਾ ਜਨਮ 28 ਨਵੰਬਰ 1957 ਨੂੰ ਹੋਇਆ।

- ਇਸ ਧਰਤ ’ਤੇ ਰੱਬ ਤੋਂ ਬਾਅਦ ਮਾਪਿਆਂ ਨੂੰ ਮੰਨਦੇ ਹੋਵੋਗੇ?

ਰੱਬ ਤਾਂ ਕਿਸੇ ਨੇ ਵੇਖਿਆ ਨਹੀਂ ਪਰ ਮਾਂ, ਬਾਪ ਹੀ ਸਾਡੀਆਂ ਛਤਰੀਆਂ-ਛਾਂਵਾਂ ਹੁੰਦੇ...

- ਬਚਪਨ ਕਿੰਨਾ ਕੁ ਯਾਦ ਏ ?

ਚਾਰ ਸਾਲਾਂ ਦੀ ਉਮਰ ਤੋਂ ਬਾਅਦ ਵਾਲਾ ਸਾਰਾ ਬਚਪਨ ਯਾਦ ਹੈ। ਬੜਾ ਅਮੀਰ ਸੀ ਸਾਡਾ ਬਚਪਨ।

- ਪੜ੍ਹਨ-ਗੁੜ੍ਹਨ ਦਾ ਸਫ਼ਰ ਕਿੱਥੋਂ ਸ਼ੁਰੂ ਹੋਇਆ ਤੇ ਕਿੱਥੇ ਕੁ ਮੁੱਕਿਆ ?

ਪਹਿਲੀ ਤੋਂ ਚੌਥੀ ਜਮਾਤ ਸਰਕਾਰੀ ਸਕੂਲ, ਢੰਡੋਵਾਲ, ਜਲੰਧਰ ਤੋਂ ਪਾਸ ਕੀਤੀ। ਅੱਠਵੀਂ ਜਮਾਤ ਪਬਲਿਕ ਸਕੂਲ ਸ਼ਾਹਕੋਟ ਤੋਂ, ਦਸਵੀਂ ਜਮਾਤ ਨੰਗਲ ਅੰਬੀਆਂ ਤੋਂ, ਬੀਏ ਗੁਰੂ ਨਾਨਕ ਨੈਸ਼ਨਲ ਕਾਲਜ ਨਕੋਦਰ ਤੋਂ ਅਤੇ ਐੱਲਐੱਲਬੀ ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ ਤੋਂ ਪਾਸ ਕੀਤੀ ਸੀ।

- ਕੋਈ ਘਟਨਾ/ਦੁਰਘਟਨਾ ਜਿਹੜੀ ਯਾਦ ਆਵੇ ਕਦੀ ਤਾਂ ਝੁਣਝੁਣੀ ਜਿਹੀ ਛੇੜ ਜਾਂਦੀ ਹੋਵੇ...

ਜ਼ਿਕਰਯੋਗ ਵਾਕਿਆ ਤਾਂ ਕੋਈ ਨਹੀਂ ਪਰ ਫੇਰ ਵੀ ਜਦੋਂ ਇਨਸਾਨ ਸਰੀਰਕ ਤੌਰ ’ਤੇ ਬਾਕੀਆਂ ਨਾਲੋਂ ਤਗੜਾ ਹੋਵੇ ਤਾਂ ਕਈ ਤਰ੍ਹਾਂ ਦੀਆਂ ਮੁਸੀਬਤਾਂ ਤੋਂ ਬਚਾਅ ਰਹਿੰਦਾ।

- ਜ਼ਿੰਦਗੀ ਵਿਚ ਕਿੱਤਾ ਪਰਿਵਰਤਨ ਆਏ ਹੋਣੇ? ਤੁਸੀਂ ਇਨ੍ਹਾਂ ਪਰਿਵਰਤਨਾਂ ਨੂੰ ਕਿਵੇਂ ਲਿਆ?

ਮੈਂ ਡੀਪੀ ਐੱਡ ਕਰਕੇ ਮਾਸਟਰ ਬਣਨਾ ਚਾਹੁੰਦਾ ਸੀ ਪਰ ਪਿਤਾ ਸ੍ਰੀ ਦੇ ਕਹਿਣ ਉਤੇ ਕਾਨੂੰਨ ਦੀ ਪੜ੍ਹਾਈ ਪਾਸ ਕੀਤੀ ਤੇ 1981 ਤੋਂ ਬਾਅਦ ਹੁਣ ਤੱਕ ਇਸੇ ਖੇਤਰ ਵਿਚ ਨਿਰਵਿਘਨਤਾ ਨਾਲ ਕਾਰਜ ਨਿਭਾ ਰਿਹਾ ਹਾਂ।

- ਸਫ਼ਲ ਪਿਤਾ, ਪਤੀ, ਕਾਨੂੰਨਦਾਨ ਜਾਂ ਇਕ ਪ੍ਰਬੰਧਕ ਹੋਣ ਤੋਂ ਪਹਿਲਾਂ ਤੁਸੀਂ ਨਿਮਰ ਜਿਹੇ ਸ਼ਖ਼ਸ ਵੀ ਵਿਖਾਈ ਦੇਂਦੇ ਹੋ। ਇਸ ਸ਼ਖ਼ਸੀਅਤ ਦਾ ਰਾਜ?

ਆਪਣੇ ਕੰਮ ਨਾਲ ਮਤਲਬ ਰੱਖੋ... ਦੂਜਿਆਂ ਦੀ ਜ਼ਿੰਦਗੀ ਵਿਚ ਦਖ਼ਲ ਨਾ ਦਿਉ... ਹਰੇਕ ਇਨਸਾਨ ਖਾਸ ਹੁੰਦਾ ਹੈ... ਕਿਸੇ ਦਾ ਦਿਲ ਨਹੀਂ ਦੁਖਾਉਣਾ ਚਾਹੀਦਾ..।

- ਆਮ ਲੋਕਾਂ ਦਾ ਦੁੱਖ-ਦਰਦ ਦੂਰ ਕਰਨ ਵਾਲੇ ਸਫ਼ਰ ਦੀ ਸ਼ੁਰੂਆਤ ਕਦੋਂ ਤੇ ਕਿਉਂ ਹੋਈ?

ਕਿਸੇ ਦੇ ਕੰਮ ਆਉਣ ਉੱਤੇ ਮੈਨੂੰ ਬੜੀ ਖੁਸ਼ੀ ਮਿਲਦੀ । ਸ਼ੁਰੂ ਤੋਂ ਹੀ ਕਿਸੇ ਇਨਸਾਨ ਦੇ ਗੁਣ ਵੇਖ ਕੇ ਉਸ ਦੀ ਤਾਰੀਫ਼ ਕਰਨਾ ਚੰਗਾ ਹੁੰਦਾ। ਦੂਸਰੇ ਦੇ ਚਿਹਰੇ ’ਤੇ ਮੁਸਕਰਾਹਟ ਲਿਆਉਣਾ ਵੀ ਮੈਨੂੰ ਬਹੁਤ ਚੰਗਾ ਲੱਗਦਾ।

- ਸਮਾਜ ਸੇਵਾ ਦੀ ਸੂਚੀ ਵਿਚ ਕਿਹੜੇ, ਕਿਹੜੇ ਅਹਿਮ ਤੇ ਜ਼ਿਕਰਯੋਗ ਕਾਰਜ ਸ਼ਾਮਿਲ ਨੇ?

ਪਿੰਡ ਵਿਚ ਕਬੱਡੀ ਟੂਰਨਾਮੈਂਟ ਸ਼ੁਰੂ ਕਰਵਾਏ.। ਪੰਜਾਬੀ ਦੇ ਪਸਾਰ ਲਈ ਕਾਰਜ ਕੀਤੇ। ਪੰਜਾਬੀ ਸਾਹਿਤ ਦੀ ਚੰਗੇਰੀ ਤੇ ਮਿਆਰੀ ਸਿਰਜਣਾ ਵਿਚ ਬਣਦਾ-ਸਰਦਾ ਯੋਗਦਾਨ ਪਾਇਆ ਜਾ ਰਿਹਾ। ਗਲੋਬ ਪਿੰਡ ਵਿਚ ਨਿਮਰ ਤੇ ਅਹਿਮ ਸ਼ਖ਼ਸੀਅਤਾਂ ਨੂੰ ਵਡਿਆਉਣਾ ਮੇਰੀ ਕਮਜ਼ੋਰੀ ਰਹੀ ਹੈ।

- ਸੁਫ਼ਨੇ ਸਾਰੇ ਸਾਕਾਰ ਹੋ ਗਏ ਹੋਣੇ ਕਿ ਕੁਝ ਸਾਕਾਰ ਹੋਣੇ ਬਾਕੀ ਨੇ?

ਰੱਬ ਜੀ ਨੇ ਮੈਨੂੰ ਮੇਰੀ ਔਕਾਤ ਨਾਲੋਂ ਵੱਧ ਦਿੱਤਾ ਹੈ। ਨਾਮ, ਪਰਿਵਾਰਕ ਸੁੱਖ ਅਤੇ ਸ਼ੋਹਰਤ ਨਾਲ ਮੈਂ ਮਾਲਾਮਾਲ ਹਾਂ। ਜਿੰਨੀ ਹਿੰਮਤ ਬਖ਼ਸ਼ੀ ਹੈ, ਸੇਵਾ ਕਾਰਜ ਨਿਭਾਈ ਜਾ ਰਿਹਾ। ਮੈਥੋਂ ਚੰਗੇ ਕਾਰਜ ਹੁੰਦੇ ਰਹਿਣ, ਇਹੋ ਇੱਛਾ ਹੈ।

- ਪੁੰਨ ਕਾਰਜਾਂ ਦੀ ਸ਼ੁਰੂਆਤ ਪਿੱਛੇ ਕਿਸੇ ਸੱਸੀ, ਸੋਹਣੀ ਦਾ ਹੱਥ ਹੋਣਾ?

ਕੋਈ ਸੱਸੀ, ਸੋਹਣੀ ਨਹੀਂ, ਜੀਵਨ ਸਾਥੀ ਸ੍ਰੀਮਤੀ ਬਲਵਿੰਦਰ ਕੌਰ ਚੱਠਾ ਹਮੇਸ਼ਾ ਮੇਰੀ ਪ੍ਰੇਰਨਾ-ਸਰੋਤ ਰਹੀ ਹੈ।

- ਹੁਣ ਤੁਸੀਂ ਕੈਨੇਡਾ ’ਚ ਬੈਠੇ ਹੋ। ਜਨਮ ਭੋਂਇੰ ‘ਪੰਜਾਬ’ ਵੀ ਸੁਫ਼ਨਿਆਂ ’ਚ ਵੱਸਦਾ ਹੋਣਾ? ਬਹੁ-ਦਿਸ਼ਾਵਾਂ ਵੱਲ ਚੱਲਦੀ ਜੀਵਨ-ਬੇੜੀ ਕੀ ਬੰਨੇ ਲੱਗ ਚੁੱਕੀ?

ਸ਼ਾਇਦ ਮੇਰੇ ’ਚ ਇਕ ਵੱਡਾ ਨੁਕਸ ਹੈ ਕਿ ਜਿੱਥੇ ਕਿਤੇ ਹੁੰਦਾ ਹਾਂ, ਹੋਲੀ-ਸੋਲੀ ਉਥੇ ਦਾ ਹੀ ਹੁੰਦਾ ਹਾਂ। ਸੋ ਜੀਵਨ-ਬੇੜੀ ਸੋਹਣੀ ਚਾਲੇ ਚੱਲ ਰਹੀ।

- ਆਪਣੇ ਵੇਲਿਆਂ ਦੀ ਤੁਹਾਡੀ ਕੋਈ ਕਿਰਤ। ਕੋਈ ਯਾਦਗਾਰੀ ਕਾਰਨਾਮਾ ਜੋ ਅੱਜ ਵੀ ਚੇਤਿਆਂ ’ਚ ਖੁਣਿਆ ਹੋਵੇ ?

ਗਲੋਬ ਪਿੰਡ ’ਚ ਵੱਸਦੇ ਪੰਜਾਬੀਆਂ ਲਈ ਚਾਰ ਭਾਸ਼ਾਵਾਂ ਵਿਚ ‘ਕਾਇਦਾ-ਏ-ਨੂਰ’ ਤਿਆਰ ਕਰਨ ’ਤੇ ਮੈਨੂੰ ਬੜਾ ਫ਼ਖ਼ਰ ਹੈ।

- ਸੁਣਿਆ ਹੈ ਕਿ ਕੁਝ ਪ੍ਰਵਾਸੀ ਸਮਾਜ ਸੇਵਕ, ਸਾਹਿਤਕਾਰ ਤੇ ਸਿਆਸਤਦਾਨ ਮਾਇਆ ਦੇ ਜ਼ੋਰ ਪੰਜਾਬ ਜਾ ਕੇ ਚਰਚਾ ਕਰਵਾਉਂਦੇ ਤੇ ਫਿਰ ਤਿਕੱੜਮਬਾਜ਼ੀ ਨਾਲ ਇਨਾਮ-ਇਕਰਾਮ ਤੇ ਲੋਈਆਂ, ਦੁਸ਼ਾਲੇ ਵੀ ਹਥਿਆਉਂਦੇ । ਕੀ ਇਹ ਰੁਝਾਨ ਸਹੀ ਹੈ?

ਕਿਸੇ ਨੇ ਕੋਈ ਚੰਗਾ ਕਾਰਜ ਕੀਤਾ ਹੈ ਤਾਂ ਉਸ ਦੀ ਪ੍ਰਸੰਸਾ ਹੋਣੀ ਚਾਹੀਦੀ ਹੈ। ਇਨਾਮ-ਇਕਰਾਮ ਮਿਲਣੇ ਚਾਹੀਦੇ। ਮੈਂ ਧਿੱਗੋਜ਼ੋਰੀ ਪ੍ਰਾਪਤ ਕੀਤੇ ਜਾਣ ਵਾਲੇ ਇਨਾਮਾਂ-ਸਨਮਾਨਾਂ ਦੇ ਹੱਕ ਵਿਚ ਨਹੀਂ।

- ਆਵਾਸ-ਪਰਵਾਸ ਦੌਰਾਨ ਕੋਈ ਨਿੱਜੀ ਘਟਨਾ ਜਿਹੜੀ ਨਾ ਘਟਦੀ ਤਾਂ ਅਜੋਕਾ ਜੀਵਨ ਬੜਾ ਭਾਰ-ਮੁਕਤ ਹੁੰਦਾ?

ਜ਼ਿੰਦਗੀ ਸਿੱਧੀਆਂ ਰੇਖਾਵਾਂ ’ਚ ਨਹੀਂ ਚੱਲਦੀ...ਉਤਰਾਅ, ਚੜਾਅ ਆਉਂਦੇ ਰਹਿੰਦੇ... ਚੰਗੇ, ਮਾੜੇ ਹਾਦਸੇ ਹੁੰਦੇ ਰਹਿੰਦੇ ਹਨ। ਕਿਸੇ ਇਨਸਾਨ ਦਾ ਐਟੀਚਿਊਟ ਹੀ ਸਾਰੇ ਮਸਲੇ ਹੱਲ ਕਰਨ ਵਿਚ ਸਹਾਇਕ ਹੁੰਦਾ ਹੈ।

- ਪੰਜਾਬ ਇਨੀਂ ਦਿਨੀਂ ਤੇਜ਼ੀ ਨਾਲ ਸੁੰਗੜ ਰਿਹਾ... ਇਸਦੇ ਉਲਟ ਕੈਨੇਡਾ, ਅਮਰੀਕਾ ਵਿਗਸ, ਫੈਲ ਰਹੇ... ਆਵਾਸ-ਪਰਵਾਸ ਦਾ ਇਹ ਮੌਜੂਦਾ ਰੁਝਾਨ ਕੀ ਸਹੀ ਹੈ?

ਆਵਾਸ ਪਰਵਾਸ ਦਾ ਰੁਝਾਨ ਸਦੀਆਂ ਪੁਰਾਣਾ ਹੈ। ਚੰਗੇਰੇ ਭਵਿੱਖ ਲਈ ਪਰਵਾਸ ਸੁਭ ਸ਼ਗਨ ਵੀ ਹੈ।

- ਸੁਨਹਿਰੇ ਭਵਿੱਖ ਦੀ ਆਸ ਵਿਚ ਇਥੇ ਕੈਨੇਡਾ ਆਉਣ ਵਾਲੇ ਪੰਜਾਬੀ ਵਿਦਿਆਰਥੀਆਂ ਅਤੇ ਪੇਸ਼ੇਵਰਾਂ ਦੀ ਯਥਾਯੋਗ ਸਥਾਪਤੀ ਲਈ ਕੋਈ ਮਸ਼ਵਰਾ?

ਇੱਥੇ ਆਉਣ ਵਾਲੇ ਸਾਡੇ ਬੱਚੇ ਸਿਆਣੇ ਨੇ। ਕਾਇਦੇ, ਕਾਨੂੰਨ ਵਿਚ ਰਹਿ ਕੇ ਏਥੇ ਪੜ੍ਹਾਈ-ਲਿਖਾਈ ਕਰਨਗੇ ਤਾਂ ਸਫ਼ਲਤਾ ਉਨ੍ਹਾਂ ਦੇ ਪੈਰ ਚੁੰਮੇਗੀ। ਇਥੇ 95 ਫੀਸਦੀ ਵਿਦਿਆਰਥੀ ਸਿਆਣੇ ਨੇ ...5 ਫੀਸਦੀ ਵਿਦਿਆਰਥੀ ਇਥੇ ਗੜਬੜ ਕਰਦੇ ਤੇ ਆਪਣੀਆਂ ਗਲਤੀਆਂ ਦਾ ਖਮਿਆਜ਼ਾ ਭੁਗਤ ਕੇ ਵਾਪਸ ਚਲੇ ਜਾਂਦੇ ਨੇ । ਫਿਰ ਵੀ ਸੁਭਾਅ ਦੇ ਮੁਤਾਬਕ ਇੱਥੇ ਸਾਰਾ ਕੁਝ ਠੀਕ ਚੱਲ ਰਿਹਾ...

- ਆਪੋ-ਆਪਣੇ ਕਾਰਜ ਖੇਤਰ ਵਿਚ ਹਰ ਕਿਸੇ ਨੇ ਕੋਈ ਨਾ ਕੋਈ ਖਾਹਿਸ਼ ਪੂਰਤੀ ਕਰਨੀ ਹੁੰਦੀ, ਦਰਜਾ-ਮੁਕਾਮ ਹਾਸਲ ਕਰਨਾ ਹੁੰਦਾ ਹੈ, ਕੀ ਤੁਸੀਂ ਮੁਕੰਮਲ ਹੋ ਚੱੁਕੇ?

ਅੱਜ ਤੀਕ ਕੀਤੇ ਹੋਏ ਕਾਰਜ ਉੱਤੇ ਪੂਰੀ ਤਸੱਲੀ ਹੈ ਤੇ ਨਾਲ ਹੀ ਹੋਰ ਚੰਗੇਰਾ ਕਰਨ ਨੂੰ ਵੀ ਦਿਲ ਕਰਦਾ ਰਹਿੰਦਾ ਹੈ। ਅੱਜ ਵਾਲੇ ਸਫ਼ਲ ਕਾਨੂੰਨਦਾਨ ਤੇ ਖੁਸ਼ਹਾਲ ਕੈਨੇਡੀਅਨ ਸਰਦਾਰ ਅਜੈਬ ਸਿੰਘ ਚੱਠਾ ਦੀ ਸਫ਼ਲਤਾ ਦਾ ਰਾਜ?

ਸੱਚੇ ਪਾਤਸਾਹ ਦਾ ਮਿਹਰ ਭਰਿਆ ਹੱਥ।

- ਬਰੈਂਪਟਨ, ਕੈਨੇਡਾ ਵਿਖੇ ਵਿਸ਼ਵ ਪੰਜਾਬੀ ਕਾਨਫਰੰਸ ਕਰਵਾ ਰਹੇ ਹੋ। ਇਸ ਦੀ ਰੂਪ-ਰੇਖਾ ਤੇ ਕਾਰ-ਵਿਹਾਰ ਬਾਰੇ ਚਾਨਣਾ ਪਾਉਣ ਦੀ ਕਿਰਪਾਲਤਾ ਕਰਿਉ?

ਜਗਤ ਪੰਜਾਬੀ ਸਭਾ ਦੁਆਰਾ 23, 24 ਅਤੇ 25 ਜੂਨ 2023 ਨੂੰ ਬਰੈਂਪਟਨ ਵਿਖੇ ਤਿੰਨ ਰੋਜ਼ਾ ‘ਵਰਲਡ ਪੰਜਾਬੀ ਕਾਨਫਰੰਸ’ ਕਰਵਾਈ ਜਾ ਰਹੀ ਹੈ ਜਿਸ ਦਾ ਵਿਸ਼ਾ ‘ਪੰਜਾਬੀ ਭਾਸ਼ਾ ਦੀ ਸਿੱਖਿਆ ਦਾ ਪਸਾਰਾ’ ਹੋਵੇਗਾ। ਚਾਹਤ ਹੈ ਕਿ ਗਲੋਬਲ ਪਿੰਡ ਵਿਚ ਹਰੇਕ ਪੰਜਾਬੀ ਨੂੰ ਗੁਰਮੁਖੀ ਦੀ ‘ਵਰਣਮਾਲਾ’ ਆਉਣੀ ਚਾਹੀਦੀ ਤੇ ਪੰਜਾਬੀ ਸਭਿਆਚਾਰ ਦਾ ਗਿਆਨ ਹੋਣਾ ਚਾਹੀਦਾ। ਇਹ ਕੋਸ਼ਿਸ਼ ਆਖ਼ਰੀ ਸੁਆਸਾਂ ਤਕ ਜਾਰੀ ਰਹੇਗੀ।

- ਹਰਦੇਵ ਚੌਹਾਨ

Posted By: Harjinder Sodhi