ਤਲਾਕ ਹੁਣ ਜ਼ਿੰਦਗੀ ਦਾ 'ਫੁਲ-ਸਟਾਪ' ਨਹੀਂ! ਭਾਰਤੀਆਂ 'ਚ ਵਧਿਆ ਦੂਜੇ ਵਿਆਹ ਦਾ ਰੁਝਾਨ, ਰਿਪੋਰਟ 'ਚ ਵੱਡਾ ਖ਼ੁਲਾਸਾ

ਲਾਈਫਸਟਾਈਲ ਡੈਸਕ, ਨਵੀਂ ਦਿੱਲੀ: ਇੱਕ ਖ਼ੂਬਸੂਰਤ ਲਾੜੀ ਆਪਣੇ ਵਿਆਹ ਲਈ ਤਿਆਰ ਹੋ ਰਹੀ ਹੈ। ਉਸ ਦੇ ਆਲੇ-ਦੁਆਲੇ ਮਾਤਾ-ਪਿਤਾ ਅਤੇ ਸਹੇਲੀਆਂ ਦੇ ਨਾਲ-ਨਾਲ ਉਸ ਦੀ ਛੋਟੀ ਜਿਹੀ ਧੀ ਵੀ ਉਸ ਨੂੰ ਸਜਾਉਣ ਵਿੱਚ ਖ਼ੁਸ਼ੀ-ਖ਼ੁਸ਼ੀ ਮਦਦ ਕਰ ਰਹੀ ਹੈ। ਉੱਥੇ ਹੀ, ਲਾੜਾ ਵੀ ਆਪਣੀ ਨਵੀਂ ਜੀਵਨਸਾਥੀ ਦੇ ਨਾਲ ਉਸ ਦੀ ਬੱਚੀ ਨੂੰ ਪੂਰੇ ਪਿਆਰ ਅਤੇ ਸਤਿਕਾਰ ਨਾਲ ਅਪਣਾ ਰਿਹਾ ਹੈ। ਦੇਸ਼ ਦੇ ਇੱਕ ਮੰਨੇ-ਪ੍ਰਮੰਨੇ ਜਵੈਲਰੀ ਬ੍ਰਾਂਡ ਦੇ ਵੈਡਿੰਗ ਕਲੈਕਸ਼ਨ ਦਾ ਇਹ ਇਸ਼ਤਿਹਾਰ (Add) ਸਿਰਫ਼ ਇੱਕ ਕਹਾਣੀ ਨਹੀਂ ਹੈ, ਬਲਕਿ ਸਾਡੇ ਸਮਾਜ ਵਿੱਚ ਤਲਾਕ ਅਤੇ ਦੂਜੇ ਵਿਆਹ ਨੂੰ ਲੈ ਕੇ ਬਦਲ ਰਹੀ ਹਕੀਕਤ ਦੀ ਇੱਕ ਬੇਹੱਦ ਖ਼ੂਬਸੂਰਤ ਤਸਵੀਰ ਹੈ।

ਹੁਣ ਭਾਰਤ ਵਿੱਚ ਕਿਸੇ ਰਿਸ਼ਤੇ ਦਾ ਟੁੱਟਣਾ ਜਾਂ ਜੀਵਨਸਾਥੀ ਦਾ ਸਾਥ ਛੁੱਟ ਜਾਣਾ ਜ਼ਿੰਦਗੀ ਦਾ 'ਫੁਲ-ਸਟਾਪ' ਨਹੀਂ ਮੰਨਿਆ ਜਾਂਦਾ। ਲੋਕ ਇਹ ਸਮਝ ਚੁੱਕੇ ਹਨ ਕਿ ਇੱਕ ਅਸਫ਼ਲ ਰਿਸ਼ਤਾ ਜੀਵਨ ਦਾ ਅੰਤ ਨਹੀਂ ਹੈ। ਹੁਣ ਦੂਜਾ ਵਿਆਹ ਸਿਰਫ਼ ਕੋਈ ਸਮਾਜਿਕ ਫ਼ਰਜ਼ ਨਿਭਾਉਣ ਲਈ ਨਹੀਂ, ਬਲਕਿ ਆਪਣੀ ਨਿੱਜੀ ਖ਼ੁਸ਼ੀ, ਭਾਵਨਾਤਮਕ ਸੰਤੁਲਨ ਅਤੇ ਜ਼ਿੰਦਗੀ ਨੂੰ ਇੱਕ ਨਵਾਂ ਮੌਕਾ ਦੇਣ ਲਈ ਕੀਤਾ ਜਾ ਰਿਹਾ ਹੈ।

ਹੁਣ ਲੁਕ ਕੇ ਨਹੀਂ, ਹੱਕ ਨਾਲ ਚੁਣ ਰਹੇ ਹਨ ਹਮਸਫ਼ਰ

ਚਾਹੇ ਮਹਾਨਗਰ ਹੋਣ ਜਾਂ ਛੋਟੇ ਸ਼ਹਿਰ ਅਤੇ ਪਿੰਡ, ਹੁਣ ਵਿਧਵਾ, ਵਿਧੁਰ ਅਤੇ ਤਲਾਕਸ਼ੁਦਾ ਲੋਕ ਦੁਬਾਰਾ ਆਪਣਾ ਹਮਸਫ਼ਰ ਚੁਣਨ ਵਿੱਚ ਝਿਜਕਦੇ ਨਹੀਂ ਹਨ। ਦੂਜਾ ਵਿਆਹ ਹੁਣ ਸਮਾਜ ਨੂੰ ਦਿਖਾਉਣ ਦਾ ਕੋਈ ਫ਼ਰਜ਼ ਨਹੀਂ ਹੈ। ਇਹ ਆਪਣੀ ਖ਼ੁਸ਼ੀ, ਮਾਨਸਿਕ ਸ਼ਾਂਤੀ ਅਤੇ ਜੀਵਨ ਨੂੰ ਇੱਕ ਹੋਰ ਮੌਕਾ ਦੇਣ ਦਾ ਫ਼ੈਸਲਾ ਹੈ। ਅੱਜ ਦੇ ਸਮੇਂ ਵਿੱਚ 'ਮਿਸ਼ਰਤ ਪਰਿਵਾਰ' (Blended Family) ਦਾ ਸੰਕਲਪ ਵੀ ਕਾਫ਼ੀ ਆਮ ਹੋ ਗਿਆ ਹੈ, ਜਿੱਥੇ ਬੱਚੇ, ਨਵੇਂ ਰਿਸ਼ਤੇ ਅਤੇ ਸਾਂਝੀਆਂ ਜ਼ਿੰਮੇਵਾਰੀਆਂ ਮਿਲ ਕੇ ਇੱਕ ਖੁਸ਼ਹਾਲ ਪਰਿਵਾਰ ਦੀ ਨੀਂਹ ਰੱਖ ਰਹੇ ਹਨ।

ਹਰ 6 ਵਿੱਚੋਂ 1 ਵਿਆਹ ਹੈ 'ਦੂਜਾ ਵਿਆਹ'

ਮੈਟਰੀਮੋਨੀਅਲ ਸਾਈਟ 'ਜੀਵਨਸਾਥੀ' ਦੀ ਇੱਕ ਤਾਜ਼ਾ ਰਿਪੋਰਟ ਇਸ ਬਦਲਦੇ ਟ੍ਰੈਂਡ ਦੀ ਗਵਾਹੀ ਦਿੰਦੀ ਹੈ। ਪਿਛਲੇ 10 ਸਾਲਾਂ ਦੇ ਅੰਦਰ ਦੂਜੇ ਵਿਆਹ ਲਈ ਪਾਰਟਨਰ ਲੱਭਣ ਵਾਲਿਆਂ ਦੀ ਗਿਣਤੀ ਵਿੱਚ 43% ਦਾ ਭਾਰੀ ਉਛਾਲ ਆਇਆ ਹੈ।

2016 ਦੇ ਅੰਕੜੇ: ਉਸ ਸਮੇਂ 11% ਲੋਕ ਦੂਜੇ ਵਿਆਹ ਦੀ ਤਲਾਸ਼ ਵਿੱਚ ਸਨ।

2025 ਦੇ ਅੰਕੜੇ: ਹੁਣ ਇਹ ਸੰਖਿਆ ਵਧ ਕੇ 16% ਹੋ ਚੁੱਕੀ ਹੈ।

ਅੱਜ ਸਫ਼ਲ ਹੋਣ ਵਾਲਾ ਹਰ ਛੇਵਾਂ ਵਿਆਹ ਅਸਲ ਵਿੱਚ ਇੱਕ 'Second Marriage' ਹੀ ਹੁੰਦਾ ਹੈ।

ਪਹਿਲੀ ਵਾਰ ਵਿਆਹ ਕਰਨ ਵਾਲੇ ਵੀ ਦੇ ਰਹੇ ਹਨ ਸਾਥ

ਹੈਰਾਨੀ ਦੀ ਗੱਲ ਇਹ ਹੈ ਕਿ ਤਲਾਕਸ਼ੁਦਾ ਲੋਕਾਂ ਨਾਲ ਘਰ ਵਸਾਉਣ ਵਿੱਚ ਉਹ ਲੋਕ ਵੀ ਪਿੱਛੇ ਨਹੀਂ ਹਨ ਜਿਨ੍ਹਾਂ ਦਾ ਇਹ ਪਹਿਲਾ ਵਿਆਹ ਹੈ। ਲਗਭਗ 15% ਅਜਿਹੇ ਲੋਕ, ਜੋ ਪਹਿਲੀ ਵਾਰ ਵਿਆਹ ਦੇ ਬੰਧਨ ਵਿੱਚ ਬੱਝ ਰਹੇ ਹਨ, ਤਲਾਕਸ਼ੁਦਾ ਪ੍ਰੋਫਾਈਲਾਂ ਵਿੱਚ ਆਪਣੀ ਦਿਲਚਸਪੀ ਦਿਖਾ ਰਹੇ ਹਨ। ਇੱਕ ਮੀਡੀਆ ਰਿਪੋਰਟ ਦੇ ਅਨੁਸਾਰ, ਮੈਟਰੋ ਸ਼ਹਿਰਾਂ ਵਿੱਚ ਹੋਣ ਵਾਲੇ 30% ਵਿਆਹਾਂ ਵਿੱਚ ਘੱਟੋ-ਕੰਮ ਇੱਕ ਪਾਰਟਨਰ ਅਜਿਹਾ ਹੁੰਦਾ ਹੈ ਜਿਸਦਾ ਪਹਿਲਾਂ ਵਿਆਹ ਹੋ ਚੁੱਕਾ ਹੁੰਦਾ ਹੈ।

ਮੈਚਮੇਕਿੰਗ ਐਪ 'ਰੀਬਾਊਂਸ' ਦੇ ਇੱਕ ਸਰਵੇ ਵਿੱਚ ਸਾਹਮਣੇ ਆਇਆ ਹੈ ਕਿ 28% ਤਲਾਕਸ਼ੁਦਾ ਵਿਅਕਤੀ ਆਪਣੇ ਪੁਰਾਣੇ ਦੁੱਖਾਂ ਨੂੰ ਭੁਲਾ ਕੇ ਨਵੀਂ ਸ਼ੁਰੂਆਤ ਕਰਨ ਲਈ ਪੂਰੀ ਤਰ੍ਹਾਂ ਰਾਜ਼ੀ ਹਨ। ਟੇਅਰ-1 (Tier-1) ਸ਼ਹਿਰਾਂ ਵਿੱਚ 35% ਤੋਂ ਵੱਧ ਤਲਾਕਸ਼ੁਦਾ ਔਰਤਾਂ ਖ਼ਾਸ ਮੈਚਮੇਕਿੰਗ ਐਪਸ ਦੇ ਜ਼ਰੀਏ ਆਪਣੇ ਲਈ ਦੂਜਾ ਮੌਕਾ ਤਲਾਸ਼ ਰਹੀਆਂ ਹਨ। ਦੱਸ ਦੇਈਏ ਕਿ ਰਿਸ਼ਤੇ ਦੀ ਸ਼ੁਰੂਆਤ ਵਿੱਚ ਹੀ 'ਕਪਲ ਥੈਰੇਪੀ' (Couple Therapy) ਨੂੰ ਲੈ ਕੇ 41% ਲੋਕ ਖੁੱਲ੍ਹ ਕੇ ਚਰਚਾ ਕਰਦੇ ਹਨ।

ਜੀਵਨਸਾਥੀ ਲੱਭਣ ਦੇ ਨਵੇਂ ਡਿਜੀਟਲ ਆਪਸ਼ਨ

ਹੁਣ ਹਮਸਫ਼ਰ ਦੀ ਤਲਾਸ਼ ਸਿਰਫ਼ ਪਰਿਵਾਰਾਂ ਜਾਂ ਵਿਚੋਲਿਆਂ ਦੇ ਭਰੋਸੇ ਨਹੀਂ ਹੈ। ਦੂਜੇ ਵਿਆਹ ਲਈ ਇੰਟਰਨੈੱਟ 'ਤੇ ਕਈ ਖ਼ਾਸ ਪਲੇਟਫਾਰਮ ਮੌਜੂਦ ਹਨ, ਜਿਵੇਂ- secondshaadi.com, divorveematrimony.com ਅਤੇ secondsutra.com। ਇਸ ਤੋਂ ਇਲਾਵਾ, ਆਮ ਮੈਟਰੀਮੋਨੀਅਲ ਵੈੱਬਸਾਈਟਾਂ ਅਤੇ ਐਪਸ 'ਤੇ ਵੀ ਸੈਕਿੰਡ ਮੈਰਿਜ ਲਈ ਵੱਖਰੇ ਸੈਕਸ਼ਨ ਬਣਾਏ ਗਏ ਹਨ। ਇਹੀ ਨਹੀਂ, ਤਲਾਕਸ਼ੁਦਾ ਲੋਕਾਂ ਦੀਆਂ ਲੋੜਾਂ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਖ਼ਾਸ ਡੇਟਿੰਗ ਐਪਸ ਵੀ ਚਲਨ ਵਿੱਚ ਆ ਚੁੱਕੇ ਹਨ।

ਆਪਣਿਆਂ ਦਾ ਸਾਥ ਤੇ ਮੈਰਿਜ ਕਾਊਂਸਲਿੰਗ ਦਾ ਵਧਦਾ ਦਾਇਰਾ

ਕੁਝ ਸਾਲ ਪਹਿਲਾਂ ਤੱਕ ਵਿਆਹ ਟੁੱਟਣ 'ਤੇ ਦੁਬਾਰਾ ਘਰ ਵਸਾਉਣਾ ਕਾਫ਼ੀ ਮੁਸ਼ਕਲਾਂ ਭਰਿਆ ਹੁੰਦਾ ਸੀ, ਪਰ ਹੁਣ ਸਮਾਜ ਦਾ ਨਜ਼ਰੀਆ ਪੂਰੀ ਤਰ੍ਹਾਂ ਬਦਲ ਚੁੱਕਾ ਹੈ।

ਕਾਊਂਸਲਿੰਗ ਵਿੱਚ ਬਦਲਾਅ: 3 ਤੋਂ 4 ਸਾਲ ਪਹਿਲਾਂ ਜਿੱਥੇ ਦੂਜੇ ਵਿਆਹ ਲਈ ਸਲਾਹ (Counseling) ਲੈਣ ਵਾਲੇ ਲੋਕ ਨਾਂ ਦੇ ਬਰਾਬਰ ਸਨ, ਉੱਥੇ ਹੀ ਹੁਣ ਵਿਆਹ ਨਾਲ ਜੁੜੀ ਕਾਊਂਸਲਿੰਗ ਲਈ ਆਉਣ ਵਾਲੇ ਹਰ 10 ਵਿੱਚੋਂ 2 ਜਾਂ 3 ਲੋਕ ਤਲਾਕਸ਼ੁਦਾ ਜਾਂ ਵਿਧਵਾ ਹੁੰਦੇ ਹਨ।

ਪਰਿਵਾਰ ਦਾ ਭਰਪੂਰ ਸਪੋਰਟ: ਸਭ ਤੋਂ ਸਕਾਰਾਤਮਕ ਬਦਲਾਅ ਇਹ ਹੈ ਕਿ ਹੁਣ ਇਨ੍ਹਾਂ ਲੋਕਾਂ ਨੂੰ ਆਪਣੇ ਪਰਿਵਾਰਾਂ ਦਾ ਵੀ ਸਾਥ ਮਿਲ ਰਿਹਾ ਹੈ। ਕਈ ਮਾਮਲਿਆਂ ਵਿੱਚ ਸੱਸ-ਸਹੁਰਾ ਖ਼ੁਦ ਆਪਣੀ ਘੱਟ ਉਮਰ ਦੀ ਵਿਧਵਾ ਨੂੰਹ ਨੂੰ ਦੂਜਾ ਵਿਆਹ ਕਰਨ ਦੀ ਹਿੰਮਤ ਦੇ ਰਹੇ ਹਨ। ਉੱਥੇ ਹੀ, ਵੱਡੀ ਉਮਰ ਦੇ ਬਜ਼ੁਰਗਾਂ ਨੂੰ ਭਾਵਨਾਤਮਕ ਸਹਾਰੇ ਲਈ ਉਨ੍ਹਾਂ ਦੇ ਆਪਣੇ ਧੀ-ਪੁੱਤ ਦੁਬਾਰਾ ਵਿਆਹ ਕਰਨ ਲਈ ਪ੍ਰੇਰਿਤ ਕਰ ਰਹੇ ਹਨ।