ਅਮਰੀਕਾ ਵਿਚ ਵਿਨਾਸ਼ਕਾਰੀ ਸਮੂਹਿਕ ਗੋਲ਼ੀਬਾਰੀ, ਨਸਲਵਾਦ ਦੀਆਂ ਨਫ਼ਰਤੀ ਘਟਨਾਵਾਂ ਲਗਾਤਾਰ ਵਧ ਰਹੀਆਂ ਹਨ ਅਤੇ ਦੇਸ਼ ਦੇ ਸਭ ਸੂਬੇ ਇਨ੍ਹਾਂ ਦੀ ਲਪੇਟ ’ਚ ਆਏ ਹੋਏ ਹਨ। ਨਤੀਜੇ ਵਜੋਂ ਇਕੱਲੇ ਮਾਰਚ ਵਿਚ ਹੀ ਇਨ੍ਹਾਂ ਕਾਰਨ ਦਰਜਨਾਂ ਲੋਕ ਮਾਰੇ ਗਏ ਹਨ ਜਿਨ੍ਹਾਂ ਵਿਚ ਬੱਚੇ ਤੇ ਔਰਤਾਂ ਵੀ ਸ਼ਾਮਲ ਸਨ। ਹਾਲਾਤ ਦੀ ਗੰਭੀਰਤਾ ਦਾ ਅਨੁਮਾਨ ਇਸੇ ਤੋਂ ਲਾਇਆ ਜਾ ਸਕਦਾ ਹੈ ਕਿ ਇਸ ਮਹੀਨੇ ਅਮਰੀਕਾ ’ਚ ਹੁਣ ਤਕ ਗੋਲ਼ੀਬਾਰੀ ਦੀਆਂ 38 ਘਟਨਾਵਾਂ ਵਿਚ ਘੱਟੋ-ਘੱਟ 57 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ ਜਦਕਿ 133 ਹੋਰ ਜ਼ਖ਼ਮੀ ਹੋਏ ਹਨ।
ਜੇਕਰ ਜਨਵਰੀ 2023 ਤੋਂ 29 ਮਾਰਚ ਤਕ ਝਾਤ ਮਾਰੀਏ ਤਾਂ ਹੁਣ ਤਕ 130 ਸਮੂਹਿਕ ਗੋਲ਼ੀਬਾਰੀ ਦੀਆਂ ਘਟਨਾਵਾਂ ਵਾਪਰ ਚੁੱਕੀਆਂ ਹਨ।
ਕੈਲੀਫੋਰਨੀਆ ਦੇ ਸੈਕਰਾਮੈਂਟੋ ਕਾਊਂਟੀ ਦੇ ਇਕ ਗੁਰਦੁਆਰੇ ਵਿਚ ਨਗਰ ਕੀਰਤਨ ਦੌਰਾਨ 2 ਲੋਕਾਂ ਨੂੰ ਗੋਲ਼ੀ ਮਾਰ ਦਿੱਤੀ ਗਈ। ਅਮਰੀਕਾ ਸਰਕਾਰ ਕੁਝ ਠੋਸ ਕਦਮ ਚੁੱਕਣ ਦੀ ਬਜਾਏ ਦੋਸ਼ ਲਗਾਉਣ ਨੂੰ ਤਰਜੀਹ ਦਿੰਦੀ ਹੈ। ਮਾਪਿਆਂ ਨੂੰ ਦੋਸ਼ ਦਿਉ, ਅਧਿਆਪਕਾਂ ਨੂੰ ਦੋਸ਼ੀ ਠਹਿਰਾਓ। ਧਰਮ ਨੂੰ ਦੋਸ਼ੀ ਠਹਿਰਾਓ (ਬਸ਼ਰਤੇ ਇਹ ਈਸਾਈ ਧਰਮ ਨਾ ਹੋਵੇ)। ਮਾਨਸਿਕ ਬਿਮਾਰੀ ਨੂੰ ਦੋਸ਼ੀ ਠਹਿਰਾਓ (ਭਾਵੇਂ ਦੋਸ਼ੀ ਇਸ ਤੋਂ ਪੀੜਤ ਹੈ ਜਾਂ ਨਹੀਂ)। ਪਰ ਬੰਦੂਕਾਂ ਨੂੰ ਦੋਸ਼ ਨਾ ਦਿਉ।
ਜ਼ਾਹਰਾ ਤੌਰ ’ਤੇ ਲੋਕ ਹੀ ਲੋਕਾਂ ਨੂੰ ਮਾਰਦੇ ਹਨ ਅਤੇ ਅਸੀਂ ਇਸ ਬਾਰੇ ਕੁਝ ਨਹੀਂ ਕਰ ਸਕਦੇ ਹਾਂ। ਅਮਰੀਕੀ ਹੁਕਮਰਾਨ ਬਾਰੂਦ ਦਾ ਭੰਡਾਰ ਖ਼ਤਮ ਕਰਨ ਲਈ ਕੋਈ ਕਦਮ ਨਹੀਂ ਚੁੱਕਦੇ। ਇਹ ਕਿਹੋ ਜਿਹਾ ਦੇਸ਼ ਹੈ ਤੇ ਉਸ ਦੀ ਸਰਕਾਰ ਕਿਹੋ ਜਿਹੀ ਹੈ ਜੋ ਆਪਣੇ ਹੀ ਲੋਕਾਂ ਦੀ ਹਿਫ਼ਾਜ਼ਤ ਨਹੀਂ ਕਰ ਰਹੀ ਤੇ ਨਿੱਤ ਦੂਸਰੇ ਦੇਸ਼ਾਂ ਵਿਚ ਜਾ ਕੇ ਵੀ ਲੋਕਾਂ ਦੀਆਂ ਜਾਨਾਂ ਨਾਲ ਖੇਡਦੇ ਰਹਿੰਦੇ ਹਨ।
ਜ਼ਿਆਦਾਤਰ ਦੇਸ਼ਾਂ ਵਿਚ ਇਹ ਫ਼ੈਸਲਾ ਲਿਆ ਗਿਆ ਹੈ ਕਿ ਬੰਦੂਕ ਦੀ ਮਾਲਕੀ ਨੂੰ ਗੰਭੀਰਤਾ ਨਾਲ ਸੀਮਤ ਕਰਨਾ ਫ਼ਾਇਦੇਮੰਦ ਹੈ ਕਿਉਂਕਿ ਭਾਵੇਂ ਬੰਦੂਕ ਮਾਲਕ ਜ਼ਿਆਦਾਤਰ ਲੋਕ ਕਾਨੂੰਨ ਦੀ ਪਾਲਣਾ ਕਰਦੇ ਹਨ ਪਰ ਕੁਝ ਸਨਕੀ ਲੋਕ ਇਨ੍ਹਾਂ ਰਾਹੀਂ ਆਪਣਾ ਜਾ ਹੋਰਾਂ ਦਾ ਨੁਕਸਾਨ ਵੀ ਕਰ ਦਿੰਦੇ ਹਨ। ਆਟੋਮੈਟਿਕ ਤੇ ਅਰਧ-ਆਟੋਮੈਟਿਕ ਹਥਿਆਰਾਂ ਸਦਕਾ ਉਹ ਮਿੰਟਾਂ-ਸਕਿੰਟਾਂ ’ਚ ਵੱਡੀ ਗਿਣਤੀ ਵਿਚ ਲੋਕਾਂ ਦੀ ਜਾਨ ਲੈ ਸਕਦੇ ਹਨ। ਕਈ ਵਾਰ ਅਮਰੀਕਾ ਵਿਚ ਬੰਦੂਕ ਦੇ ਅਧਿਕਾਰਾਂ ਦੇ ਵਕੀਲ ਉਨ੍ਹਾਂ ਉਦਾਹਰਨਾਂ ਦਾ ਵੇਰਵਾ ਦੇਣ ਵਾਲੀਆਂ ਖ਼ਬਰਾਂ ਸਾਂਝੀਆਂ ਕਰਨਾ ਪਸੰਦ ਕਰਦੇ ਹਨ ਜਿਨ੍ਹਾਂ ਵਿਚ ਜ਼ਿਕਰ ਹੁੰਦਾ ਹੈ ਕਿ ਕਿਸੇ ਬੰਦੂਕ ਮਾਲਕ ਨੇ ਘਰੇ ਵੜੇ ਹਥਿਆਰਬੰਦ ਚੋਰ ਨੂੰ ਮਾਰ ਕੇ ਜਾਂ ਭਜਾ ਕੇ ਚੋਰੀ ਦੀ ਕੋਸ਼ਿਸ਼ ਨੂੰ ਨਾਕਾਮ ਕੀਤਾ ਪਰ ਪਾਬੰਦੀਸ਼ੁਦਾ ਬੰਦੂਕ ਨਿਯੰਤਰਣ ਦੇ ਸਮਰਥਕ ਅਮਰੀਕਾ ਅਤੇ ਵਿਦੇਸ਼ਾਂ ਵਿਚ ਆਮ ਤੌਰ ’ਤੇ ਅਜਿਹੀਆਂ ਕਹਾਣੀਆਂ ਤੋਂ ਪ੍ਰਭਾਵਿਤ ਨਹੀਂ ਹੁੰਦੇ। ਕਿਸੇ ਨੂੰ ਵੀ ਆਪਣੇ ਘਰ ਦੀ ਰੱਖਿਆ ਲਈ ਬੰਦੂਕ ਦੀ ਲੋੜ ਨਹੀਂ ਪਵੇਗੀ ਜੇਕਰ ਕੋਈ ਬੰਦੂਕ ਪ੍ਰਾਪਤ ਨਹੀਂ ਕਰ ਸਕੇਗਾ। ਕਦੇ ਵੀ ਕੋਈ ਇਹ ਦਲੀਲ ਨਹੀਂ ਦਿੰਦਾ ਕਿ ਜੇ ਕੋਈ ਪਰਮਾਣੂ ਹਥਿਆਰਾਂ ਨੂੰ ਗ਼ੈਰ-ਕਾਨੂੰਨੀ ਬਣਾਉਂਦਾ ਹੈ ਤਾਂ ਸਿਰਫ਼ ਅਪਰਾਧੀ ਪਰਮਾਣੂ ਹਥਿਆਰਾਂ ਦੇ ਮਾਲਕ ਹੋਣਗੇ। ਇਹ ਇਸ ਲਈ ਹੈ ਕਿਉਂਕਿ ਪਰਮਾਣੂ ਹਥਿਆਰਾਂ ਦੀ ਮਲਕੀਅਤ ਅਤੇ ਵਰਤੋਂ ਨਾਲ ਜੁੜੀ ਸੱਭਿਆਚਾਰਕ ਪਛਾਣ ਦੀ ਕੋਈ ਭਾਵਨਾ ਨਹੀਂ ਹੈ।
ਅਮਰੀਕਾ ਵਿਚ ਗੰਨ ਕਲਚਰ ਬਹੁਤ ਹੈ ਅਤੇ ਆਬਾਦੀ ਦੇ ਇਕ ਵੱਡੇ ਹਿੱਸੇ ਲਈ ਜਾਂ ਤਾਂ ਇਸ ਵਿਚਾਰ ਲਈ ਇਕ ਅਰਧ-ਧਾਰਮਿਕ ਸ਼ਰਧਾ ਹੈ ਕਿ ਬੰਦੂਕ ਦੀ ਮਾਲਕੀ ਇਕ ਬੁਨਿਆਦੀ ਅਧਿਕਾਰ ਹੈ ਅਤੇ ਇਹ ਕਿ ਆਗਿਆਕਾਰੀ ਬੰਦੂਕ ਦੀ ਮਾਲਕੀ ਇਕ ਸਮਾਜਿਕ ਭਲਾਈ ਹੈ। ਲੋਕਾਂ ਦੀ ਪੱਕੀ ਧਾਰਨਾ ਹੈ ਕਿ ਅਮਰੀਕੀ ਸੰਵਿਧਾਨ ਦੂਜੀ ਸੋਧ ਦੁਆਰਾ ਬੰਦੂਕ ਦੀ ਮਾਲਕੀ ਦੀ ਰੱਖਿਆ ਕਰਦਾ ਹੈ ਪਰ ਬੰਦੂਕਾਂ ਦੀ ਮਾਲਕੀ ਦਾ ਅਧਿਕਾਰ ਇਕ ਕੁਦਰਤੀ ਅਧਿਕਾਰ ਹੈ, ਸਵੈ-ਰੱਖਿਆ ਦੇ ਸਭ ਤੋਂ ਵਧੀਆ ਉਪਲਬਧ ਸਾਧਨ ਦੇ ਮਾਲਕ ਹੋਣ ਦੇ ਅਧਿਕਾਰ ਲਈ ਇਕ ਤਰਕਪੂਰਨ ਸਿੱਟਾ ਹੈ। ਕੋਈ ਵੀ ਸਰਕਾਰ ਜੋ ਬੰਦੂਕ ਦੀ ਮਾਲਕੀ ’ਤੇ ਪਾਬੰਦੀ ਲਗਾਉਂਦੀ ਹੈ, ਉਹ ਸਵੈ-ਰੱਖਿਆ ਦੇ ਬੁਨਿਆਦੀ ਅਧਿਕਾਰ ਨੂੰ ਘਟਾਉਂਦੀ ਹੈ।
ਬੰਦੂਕ ਦੇ ਅਧਿਕਾਰਾਂ ਦੇ ਵਕੀਲਾਂ ਦਾ ਮੰਨਣਾ ਹੈ ਕਿ ਕਾਨੂੰਨ ਦੀ ਪਾਲਣਾ ਕਰਨ ਵਾਲੇ ਨਾਗਰਿਕਾਂ ਨੂੰ ਬੰਦੂਕਾਂ ਲੈ ਕੇ ਵਿਚਰਨ ਦੀ ਇਜਾਜ਼ਤ ਦਿੱਤੀ ਜਾਣੀ ਚਾਹੀਦੀ ਹੈ ਤਾਂ ਜੋ ਉਹ ਵੱਡੇ ਪੱਧਰ ’ਤੇ ਸਿਰਫਿਰੇ ਬੰਦੂਕਧਾਰੀਆਂ ਲਈ ਰੁਕਾਵਟ ਬਣ ਸਕਣ। ਲੋਕਾਂ ਨੂੰ ਆਪਣੀਆਂ ਬੰਦੂਕਾਂ ਫਿਲਮ ਥੀਏਟਰ ਵਿਚ ਲੈ ਜਾਣੀਆਂ ਚਾਹੀਦੀਆਂ ਹਨ। ਐਲੀਮੈਂਟਰੀ ਸਕੂਲਾਂ ਦੇ ਅਧਿਆਪਕਾਂ ਨੂੰ ਹਥਿਆਰਬੰਦ ਹੋਣਾ ਚਾਹੀਦਾ ਹੈ। ਜੱਜਾਂ ਅਤੇ ਵਕੀਲਾਂ ਨੂੰ ਅਦਾਲਤ ਦੇ ਕਮਰੇ ਵਿਚ ਆਪਣੀਆਂ ਬੰਦੂਕਾਂ ਆਪਣੇ ਨਾਲ ਰੱਖਣੀਆਂ ਚਾਹੀਦੀਆਂ ਹਨ। ਅਤੇ, ਸੰਭਵ ਤੌਰ ’ਤੇ ਆਪ੍ਰੇਸ਼ਨ ਰੂਮ ਵਿਚ ਸਰਜਨਾਂ ਨੂੰ ਇਸ ਤਰ੍ਹਾਂ ਕਰਨਾ ਚਾਹੀਦਾ ਹੈ। ਵਿਚਾਰ ਇਹ ਹੈ ਕਿ ਕੁਝ ਖੇਤਰਾਂ ਨੂੰ ਬੰਦੂਕਾਂ ਤੋਂ ਮੁਕਤ ਵਜੋਂ ਇਸ਼ਤਿਹਾਰ ਦੇ ਕੇ ਅਸੀਂ ਉਨ੍ਹਾਂ ਨੂੰ ਵੱਡੇ ਸਿਰਫਿਰੇ ਨਿਸ਼ਾਨੇਬਾਜ਼ਾਂ ਲਈ ਆਸਾਨ ਨਿਸ਼ਾਨੇ ਬਣਾ ਰਹੇ ਹਾਂ। ਇਸ ਦੇ ਬਾਵਜੂਦ ਇਹ ਸਪਸ਼ਟ ਹੈ ਕਿ ਫ਼ਿਲਹਾਲ ਬੰਦੂਕ ਦੀ ਮਾਲਕੀ ’ਤੇ ਸਖ਼ਤ ਪਾਬੰਦੀਆਂ ਦਾ ਵਿਚਾਰ ਅਮਰੀਕਾ ਹਾਰ ਗਿਆ ਹੈ। ਮੇਰੇ ਵਰਗੇ ਬਹੁਤ ਸਾਰੇ ਉਦਾਰਵਾਦੀਆਂ ਨੇ ਇਸ ਨੂੰ ਗੰਭੀਰ ਨੀਤੀਗਤ ਸਥਿਤੀ ਵਜੋਂ ਲੈਣਾ ਵੀ ਛੱਡ ਦਿੱਤਾ ਹੈ। ਜਦੋਂ ਵੀ ਕੋਈ ਨਵਾਂ ਸਮੂਹਿਕ ਗੋਲ਼ੀਬਾਰੀ ਦਾ ਕਾਂਡ ਹੁੰਦਾ ਹੈ, ਅਸੀਂ ਉਸ ਨੂੰ ਸਵੀਕਾਰ ਕਰ ਲੈਂਦੇ ਹਾਂ ਕਿਉਂਕਿ ਅਮਰੀਕਾ ਦੁਨੀਆ ਦੀ ਸਭ ਤੋਂ ਵੱਧ ਹਥਿਆਰਬੰਦ ਆਬਾਦੀ ਹੋਣ ਦੇ ਬੇਮਿਸਾਲ ਲਾਭ ਲਈ ਇਹ ਭੁਗਤਾਨ ਕਰਨ ਲਈ ਤਿਆਰ ਹੈ।
ਖ਼ੁਦ ਨੂੰ ਸੱਭਿਅਕ ਅਤੇ ਲੋਕਰਾਜੀ ਕਹਿਣ ਵਾਲੇ ਅਮਰੀਕਾ ’ਚ ਵਧ ਰਹੀ ‘ਬੰਦੂਕ ਸੰਸਕਿ੍ਰਤੀ’ ਦੇ ਨਾਲ-ਨਾਲ ਲੋਕਾਂ ’ਚ ਵਧ ਰਹੀ ਅਸਹਿਣਸ਼ੀਲਤਾ ਅਤੇ ਆਸਾਨੀ ਨਾਲ ਹਥਿਆਰਾਂ ਦੀ ਉਪਲਬਧਤਾ ਦਾ ਮਾੜਾ ਨਤੀਜਾ ਦੁਖਦਾਈ ਘਟਨਾਵਾਂ ਵਜੋਂ ਨਿਕਲ ਰਿਹਾ ਹੈ। ਇਸ ਬਾਰੇ ਅੱਜ ਤਕ ਨਾ ਤਾਂ ਅਮਰੀਕਾ ਦੇ ਕਿਸੇ ਵੀ ਰਾਸ਼ਟਰਪਤੀ ਨੇ ਕੁਝ ਕਿਹਾ ਤੇ ਨਾ ਕੀਤਾ ਤੇ ਨਾ ਕੁਝ ਭਵਿੱਖ ਵਿਚ ਕਰਨ-ਕਰਾਉਣ ਦੀ ਉਮੀਦ ਹੈ।
ਜੇ ਲੋਕਰਾਜੀ ਦੇਸ਼ਾਂ ’ਚ ਅਜਿਹਾ ਹੋਵੇਗਾ ਤਾਂ ਫਿਰ ਲੋਕਰਾਜ ਅਤੇ ਤਾਨਾਸ਼ਾਹੀ ਵਾਲੇ ਦੇਸ਼ਾਂ ’ਚ ਫ਼ਰਕ ਹੀ ਕੀ ਰਹਿ ਜਾਵੇਗਾ। ਲਗਾਤਾਰ ਅਜਿਹੇ ਮਾਮਲੇ ਸਾਹਮਣੇ ਆਉਣ ਨੂੰ ਧਿਆਨ ’ਚ ਰੱਖਦਿਆਂ ਰਾਸ਼ਟਰਪਤੀ ਜੋਅ ਬਾਇਡਨ ਨੇ ਇਕ ਹੁਕਮ ’ਚ ਕਿਹਾ ਹੈ ਕਿ ਹਥਿਆਰਾਂ ਦੀ ਵਿਕਰੀ ਤੋਂ ਪਹਿਲਾਂ ਇਨ੍ਹਾਂ ਨੂੰ ਖ਼ਰੀਦਣ ਵਾਲੇ ਦੇ ਪਿਛੋਕੜ ਦੀ ਚੰਗੀ ਤਰ੍ਹਾਂ ਜਾਂਚ ਕੀਤੀ ਜਾਵੇ। ਜੇਕਰ ਬਾਇਡਨ ਨੂੰ ਪੁੱਛਿਆ ਜਾਵੇ ਕਿ ਜੋ ਗੰਨਾਂ ਗੋਲ਼ੀਬਾਰੀ ਲਈ ਵਰਤੀਆਂ ਗਈਆਂ ਹਨ, ਉਹ ਤਾਂ ਬਲੈਕ ਮਾਰਕੀਟ ਤੋਂ ਖ਼ਰੀਦੀਆਂ ਜਾਂਦੀਆਂ ਹਨ, ਨਾ ਕਿ ਲਾਇਸੈਂਸ ਲੈ ਕੇ ਇਹ ਖ਼ਰੀਦੀਆਂ ਜਾਂਦੀਆਂ ਹਨ। ਤਾਂ ਫਿਰ ਪਿਛੋਕੜ ਦੀ ਜਾਂਚ ਇੱਥੇ ਕੀ ਕਰੇਗੀ। ਲਗਪਗ 53 ਫ਼ੀਸਦੀ ਅਮਰੀਕੀ ਲੋਕ ਦੇਸ਼ ’ਚ ਹਥਿਆਰਾਂ ’ਤੇ ਪਾਬੰਦੀ ਦੇ ਸਖ਼ਤ ਕਾਨੂੰਨਾਂ ਦੇ ਹੱਕ ’ਚ ਹਨ, ਫਿਰ ਵੀ ਕੋਈ ਅਹਿਮ ਕਾਨੂੰਨ ਪਾਸ ਨਹੀਂ ਕੀਤਾ ਜਾ ਸਕਿਆ। ਇਸ ਲਈ ਜਦੋਂ ਤਕ ਅਜਿਹਾ ਨਹੀਂ ਹੋਵੇਗਾ, ਉਦੋਂ ਤਕ ਉੱਥੇ ਗੋਲ਼ੀਬਾਰੀ ਹੁੰਦੀ ਹੀ ਰਹੇਗੀ ਅਤੇ ਬੇਕਸੂਰ ਬੱਚੇ, ਔਰਤਾਂ, ਮਰਦ ਇਸੇ ਤਰ੍ਹਾਂ ਮਰਦੇ ਰਹਿਣਗੇ।
.jpg)
-ਸੁਰਜੀਤ ਸਿੰਘ ਫਲੋਰਾ
-(ਲੇਖਕ ਟੋਰਾਂਟੋ ਆਧਾਰਤ ਵੈਟਰਨ ਜਰਨਲਿਸਟ ਹੈ)।
-ਸੰਪਰਕ : 647-829-9397
Posted By: Jagjit Singh
Copyright © 2023 Jagran Prakashan Limited.