ਵੇਲਿੰਗਟਨ (ਪੀਟੀਆਈ) : ਨਿਊਜ਼ੀਲੈਂਡ ਦੇ ਚੋਟੀ ਦੇ ਕ੍ਰਿਕਟਰਾਂ ਨੇ ਕੋਵਿਡ-19 ਮਹਾਮਾਰੀ ਕਾਰਨ ਲੰਬੇ ਆਰਾਮ ਤੋਂ ਬਾਅਦ ਸੋਮਵਾਰ ਤੋਂ ਲਿੰਕਨ ਦੇ ਹਾਈ ਪਰਫਾਰਮੈਂਸ ਸੈਂਟਰ 'ਚ ਟੀਮ ਅਭਿਆਸ ਸ਼ੁਰੂ ਕਰ ਦਿੱਤਾ। ਨਿਊਜ਼ੀਲੈਂਡ ਕ੍ਰਿਕਟ ਨੇ ਕਿਹਾ ਕਿ ਸਤੰਬਰ ਤਕ ਕੁਲ ਛੇ ਕੌਮੀ ਕੈਂਪ ਲਗਾਏ ਜਾਣਗੇ। ਕੋਰੋਨਾ ਵਾਇਰਸ ਕਾਰਨ ਨਿਊਜ਼ੀਲੈਂਡ 'ਚ ਮਾਰਚ ਤੋਂ ਹੀ ਕ੍ਰਿਕਟ ਸਰਗਰਮੀਆਂ ਠੱਪ ਸਨ।ਜਿਨ੍ਹਾਂ ਪੁਰਸ਼ ਖਿਡਾਰੀਆਂ ਨੇ ਸੋਮਵਾਰ ਨੂੰ ਅਭਿਆਸ 'ਚ ਹਿੱਸਾ ਲਿਆ, ਉਨ੍ਹਾਂ 'ਚ ਟਾਮ ਲਾਥਮ, ਹੈਨਰੀ ਨਿਕੋਲਸ, ਮੈਟ ਹੈਨਰੀ ਤੇ ਡੈਰਿਲ ਮਿਸ਼ੇਲ ਸ਼ਾਮਲ ਸਨ। ਕਪਤਾਨ ਕੇਨ ਵਿਲੀਅਮਸਨ ਅਗਲੇ ਹਫ਼ਤੇ ਮਾਊਂਟ ਮੈਂਗਾਨੁਈ 'ਚ ਸ਼ੁਰੂ ਹੋਣ ਵਾਲੇ ਕੈਂਪ 'ਚ ਹਿੱਸਾ ਲੈਣਗੇ। ਨਿਊਜ਼ੀਲੈਂਡ ਦੀ ਮਹਿਲਾ ਟੀਮ ਦੇ ਅਧਿਕਾਰਤ ਟਵਿੱਟਰ ਹੈਂਡਲ 'ਤੇ ਲਿੰਕਨ 'ਚ ਖਿਡਾਰੀਆਂ ਵੱਲੋਂ ਅਭਿਆਸ ਕਰਨ ਦੀਆਂ ਤਸਵੀਰਾਂ ਪੋਸਟ ਕੀਤੀਆਂ ਗਈਆਂ। ਪੁਰਸ਼ ਟੀਮ ਦੇ ਖਿਡਾਰੀਆਂ ਨੇ ਦੂਸਰੇ ਸੈਸ਼ਨ 'ਚ ਅਭਿਆਸ ਕੀਤਾ। ਟੀਮ ਦੀ ਉਪ ਕਪਤਾਨ ਤੇ ਆਲ-ਰਾਊਂਡਰ ਐਮੀ ਸੈਟਰਵੇਟ ਨੇ ਕਿਹਾ ਕਿ ਵਾਪਸੀ ਕਰ ਕੇ ਚੰਗਾ ਲੱਗ ਰਿਹਾ ਹੈ। ਸਾਥੀਆਂ ਨਾਲ ਹਮੇਸ਼ਾ ਆਨੰਦ ਆਉਂਦਾ ਹੈ।

ਸਟੀਡ ਨੇ ਖਾਰਿਜ ਕੀਤੀਆਂ ਵਿਲੀਅਮਸਨ ਨੂੰ ਕਪਤਾਨੀ ਤੋਂ ਹਟਾਉਣ ਦੀਆਂ ਕੋਸ਼ਿਸ਼ਾਂ ਕਰਨ ਦੀ ਅਟਕਲਾਂ

ਨਿਊਜ਼ੀਲੈਂਡ ਦੇ ਕੋਚ ਗੈਰੀ ਸਟੀਡ ਨੇ ਸੋਮਵਾਰ ਨੂੰ ਇਨ੍ਹਾਂ ਅਟਕਲਾਂ ਨੂੰ ਖਾਰਿਜ ਕੀਤਾ ਕਿ ਉਨ੍ਹਾਂ ਕੇਨ ਵਿਲੀਅਮਸਨ ਨੂੰ ਟੈਸਟ ਕਪਤਾਨੀ ਤੋਂ ਹਟਾਉਣ ਦੀ ਕੋਸ਼ਿਸ਼ ਕੀਤੀ। ਉਨ੍ਹਾਂ ਕਿਹਾ ਕਿ ਇਸ 'ਚ ਕੋਈ ਸੱਚਾਈ ਨਹੀਂ ਹੈ ਤੇ ਕਪਤਾਨ ਨਾਲ ਉਨ੍ਹਆਂ ਦੇ ਰਿਸ਼ਤੇ ਮਜ਼ਬੂਤ ਹਨ। ਇਸ ਸਾਲ ਦੀ ਸ਼ੁਰੂਆਤ 'ਚ ਆਸਟ੍ਰੇਲੀਆ ਹੱਥੋਂ ਨਿਊਜ਼ੀਲੈਂਡ ਦੀ 0-3 ਦੀ ਹਾਰ ਤੋਂ ਬਾਅਦ ਇਸ ਤਰ੍ਹਾਂ ਦੀਆਂ ਅਟਕਲਾਂ ਸਾਹਮਣੇ ਆਈਆਂ ਸਨ ਕਿ ਸਟੀਡ ਨੇ ਟੈਸਟ ਕਪਤਾਨੀ ਲਈ ਵਿਲੀਅਮਸਨ ਦੀ ਬਜਾਏ ਖੱਬੇ ਹੱਥ ਦੇ ਬੱਲੇਬਾਜ਼ ਟਾਮ ਲਾਥਮ ਨੂੰ ਕਪਤਾਨੀ ਲਈ ਤਰਜੀਹ ਦਿੱਤੀ ਹੈ।

Posted By: Sunil Thapa