ਨਵੀਂ ਦਿੱਲੀ (ਏਜੰਸੀ) : ਕਰਮਚਾਰੀ ਭਵਿੱਖ ਨਿਧੀ ਸੰਗਠਨ (EPFO) ਨੇ ਆਪਣੇ ਸਬਸਕ੍ਰਾਈਬਰਜ਼ ਲਈ 1 ਨਵੰਬਰ ਨੂੰ ਨਵੀਂ ਸਹੂਲਤ ਦੀ ਸ਼ੁਰੂਆਤ ਕੀਤੀ ਹੈ। ਹੁਣ ਸੰਗਠਿਤ ਖੇਤਰ ਦੇ ਮੁਲਾਜ਼ਮਾਂ ਨੂੰ ਯੂਨੀਵਰਸਲ ਅਕਾਊਂਟ ਨੰਬਰ ਯਾਨੀ UAN ਲਈ ਆਪਣੀ ਕੰਪਨੀ 'ਤੇ ਨਿਰਭਰ ਹੋਣ ਦੀ ਜ਼ਰੂਰਤ ਨਹੀਂ ਰਹਿ ਗਈ ਹੈ। EPFO ਅਨੁਸਾਰ, ਸਬਸਕ੍ਰਾਈਬਰਜ਼ ਹੁਣ ਕਰਮਚਾਰੀ ਭਵਿੱਖ ਨਿਧੀ ਸੰਗਠਨ ਦੀ ਵੈੱਬਸਾਈਟ https://www.epfindia.gov.in 'ਤੇ ਜਾ ਕੇ UAN ਜਨਰੇਟ ਕਰ ਸਕਦੇ ਹਨ। ਮੌਜੂਦਾ ਵਿਵਸਥਾ ਅਨੁਸਾਰ, ਮੁਲਾਜ਼ਮਾਂ ਨੇ UAN ਲਈ ਆਪਣੀ ਕੰਪਨੀ ਜ਼ਰੀਏ ਅਪਲਾਈ ਕਰਨਾ ਹੁੰਦਾ ਹੈ।

UAN ਜ਼ਰੀਏ ਮੁਲਾਜ਼ਮ ਨੌਕਰੀ ਬਦਲਣ 'ਤੇ ਆਸਾਨੀ ਨਾਲ ਆਪਣਾ ਈਪੀਏੱਫ ਵੀ ਟਰਾਂਸਫਰ ਕਰਵਾ ਸਕਦੇ ਹਨ। ਇਹ ਨੰਬਰ ਤਾਉਮਰ ਉਹੀ ਰਹਿੰਦਾ ਹੈ, ਇਹ ਬਦਲਦਾ ਨਹੀਂ ਹੈ।

UAN ਦੀ ਸਹੂਲਤ ਤੋਂ ਇਲਾਵਾ EPFO ਨੇ ਆਪਣੇ 65 ਲੱਖ ਪੈਨਸ਼ਨ ਭੋਗੀਆਂ ਲਈ ਵੀ ਇਕ ਨਵੀਂ ਸਹੂਲਤ ਸ਼ੁਰੂ ਕੀਤੀ ਹੈ। ਹੁਣ EPFO ਦੇ ਪੈਨਸ਼ਨਭੋਗੀ ਪੈਨਸ਼ਨ ਨਾਲ ਸਬੰਧਤ ਦਸਤਾਵੇਜ਼ ਜਿਵੇਂ ਪੈਨਸ਼ਨ ਪੇਮੈਂਟ ਆਰਡਰ (PPO) ਡਿਜੀਲਾਕਰ 'ਚ ਡਾਊਨਲੋਡ ਕਰ ਸਕਣਗੇ।

ਈਪੀਐੱਫਓ ਨੇ ਨੈਸ਼ਨਲ ਈ-ਗਵਰਨੈਂਸ ਡਵੀਜ਼ਨ (NeGD) ਦੇ ਡਿਜੀਲਾਕਰ ਨਾਲ ਇੰਟੀਗ੍ਰੇਟ ਕੀਤਾ ਹੈ ਤਾਂ ਜੋ ਇਲੈਕਟ੍ਰਾਨਿਕ ਪੀਪੀਓ ਉਸ ਵਿਚ ਜਮ੍ਹਾਂ ਹੋ ਸਕੇ ਤੇ ਪੈਨਸ਼ਨ ਭੋਗੀਆਂ ਲਈ ਇਹ ਸੁਖਾਲਾ ਹੋਵੇ। EPFO ਦੇ 67ਵੇਂ ਸਥਾਪਨਾ ਦਿਵਸ ਮੌਕੇ ਕਿਰਤ ਮੰਤਰੀ ਸੰਤੋਸ਼ ਗੰਗਵਾਰ ਨੇ ਇਨ੍ਹਾਂ ਦੋ ਸਹੂਲਤਾਂ ਨੂੰ ਲਾਂਚ ਕੀਤਾ। ਉਨ੍ਹਾਂ ਈ-ਇੰਸਪੈਕਸ਼ਨ ਵੀ ਲਾਂਚ ਕੀਤਾ ਜਿਹੜਾ ਈਪੀਐੱਫ ਦਾ ਡਿਜੀਟਲ ਇੰਟਰਫੇਸ ਹੈ। ਤੁਹਾਨੂੰ ਦੱਸ ਦੇਈਏ ਕਿ ਕਰਮਚਾਰੀ ਭਵਿੱਖ ਨਿਧੀ ਸੰਗਠਨ (EPFO) ਦੇ ਸਬਸਕ੍ਰਾਈਬਰਜ਼ ਦੀ ਗਿਣਤੀ 6 ਕਰੋੜ ਤੋਂ ਜ਼ਿਆਦਾ ਹੈ। ਇਹ 12.7 ਲੱਖ ਕਰੋੜ ਰੁਪਏ ਤੋਂ ਜ਼ਿਆਦਾ ਦੇ ਫੰਡ ਨੂੰ ਮੈਨੇਜ ਕਰਦਾ ਹੈ।

Posted By: Seema Anand