ਨਵੀਂ ਦਿੱਲੀ, ਬਿਜ਼ਨੈੱਸ ਡੈਸਕ : ਰਿਲਾਇੰਸ ਇੰਡਸਟਰੀਜ਼ ਦੇ ਚੇਅਰਮੈਨ ਅਤੇ ਅਰਬਪਤੀ ਮੁਕੇਸ਼ ਅੰਬਾਨੀ ਨੇ ਲਗਾਤਾਰ ਦੂਜੇ ਸਾਲ ਇਕ ਪੈਸਾ ਵੀ ਤਨਖਾਹ ਵਜੋਂ ਨਹੀਂ ਲਿਆ ਹੈ। ਉਨ੍ਹਾਂ ਪਿਛਲੇ ਵਿੱਤੀ ਸਾਲ ਤੋਂ ਆਪਣੀ ਕੰਪਨੀ ਰਿਲਾਇੰਸ ਇੰਡਸਟਰੀਜ਼ ਤੋਂ ਕੋਈ ਤਨਖਾਹ ਨਹੀਂ ਲਈ ਹੈ। ਰਿਲਾਇੰਸ ਨੇ ਆਪਣੀ ਤਾਜ਼ਾ ਸਾਲਾਨਾ ਰਿਪੋਰਟ ਵਿੱਚ ਕਿਹਾ ਹੈ ਕਿ ਵਿੱਤੀ ਸਾਲ 2020-21 ਲਈ ਅੰਬਾਨੀ ਦਾ ਮਿਹਨਤਾਨਾ 'ਜ਼ੀਰੋ' ਸੀ।

ਮੁਕੇਸ਼ ਅੰਬਾਨੀ ਨੇ ਕੋਰੋਨਾ ਮਹਾਮਾਰੀ ਦੇ ਫੈਲਣ ਤੋਂ ਬਾਅਦ ਕਾਰੋਬਾਰ ਅਤੇ ਅਰਥਵਿਵਸਥਾ ਨੂੰ ਹੋਏ ਨੁਕਸਾਨ ਦੇ ਮੱਦੇਨਜ਼ਰ ਸਵੈ-ਇੱਛਾ ਨਾਲ ਆਪਣੀ ਤਨਖਾਹ ਛੱਡ ਦਿੱਤੀ ਹੈ। ਉਨ੍ਹਾਂ 2020-21 ਤੇ 2021-22 ਲਈ ਕੋਈ ਤਨਖਾਹ (ਮੁਕੇਸ਼ ਅੰਬਾਨੀ ਨੀਲ ਤਨਖਾਹ) ਨਹੀਂ ਲਈ ਹੈ। ਇਨ੍ਹਾਂ ਦੋਵਾਂ ਸਾਲਾਂ 'ਚ ਮੁਕੇਸ਼ ਅੰਬਾਨੀ ਨੂੰ ਚੇਅਰਮੈਨ ਤੇ ਮੈਨੇਜਿੰਗ ਡਾਇਰੈਕਟਰ ਵਜੋਂ ਆਪਣੀ ਭੂਮਿਕਾ ਲਈ ਰਿਲਾਇੰਸ ਤੋਂ ਕੋਈ ਭੱਤਾ, ਲਾਭ, ਕਮਿਸ਼ਨ ਜਾਂ ਸ਼ੇਅਰ ਨਹੀਂ ਮਿਲੇ ਹਨ। ਇਸ ਤੋਂ ਪਹਿਲਾਂ ਮੁਕੇਸ਼ ਅੰਬਾਨੀ ਨੇ ਕੰਪਨੀ ਦੇ ਖਰਚਿਆਂ ਨੂੰ ਘਟਾਉਣ ਅਤੇ ਦੂਜਿਆਂ ਲਈ ਚੰਗੀ ਮਿਸਾਲ ਕਾਇਮ ਕਰਨ ਦੇ ਇਰਾਦੇ ਨਾਲ 2008-09 ਤਕ ਆਪਣੀ ਤਨਖਾਹ 15 ਕਰੋੜ ਰੁਪਏ ਤਕ ਸੀਮਤ ਕਰ ਦਿੱਤੀ ਸੀ। 2019-20 ਤਕ ਉਨ੍ਹਾਂ ਸਿਰਫ 15 ਕਰੋੜ ਰੁਪਏ ਤਨਖ਼ਾਹ ਵਜੋਂ ਲਏ, ਯਾਨੀ 11 ਸਾਲਾਂ ਤਕ ਉਨ੍ਹਾਂ ਦੀ ਤਨਖ਼ਾਹ ਇੱਕੋ ਜਿਹੀ ਰਹੀ।

ਕਿੰਨੀ ਹੈ ਨੀਤਾ ਅੰਬਾਨੀ ਦੀ ਕਮਾਈ

ਮੁਕੇਸ਼ ਅੰਬਾਨੀ ਦੀ ਪਤਨੀ ਨੀਤਾ, ਜੋ ਕੰਪਨੀ ਦੇ ਬੋਰਡ 'ਚ ਗੈਰ-ਕਾਰਜਕਾਰੀ ਨਿਰਦੇਸ਼ਕ ਹਨ, ਨੂੰ ਮੀਟਿੰਗ 'ਚ ਸ਼ਾਮਲ ਹੋਣ ਲਈ 5 ਲੱਖ ਰੁਪਏ ਤੋਂ ਇਲਾਵਾ 2 ਕਰੋੜ ਰੁਪਏ ਦਾ ਕਮਿਸ਼ਨ ਮਿਲਿਆ ਹੈ। ਪਿਛਲੇ ਸਾਲ ਉਨ੍ਹਾਂ ਨੂੰ 8 ਲੱਖ ਰੁਪਏ ਸਿਟਿੰਗ ਫੀਸ ਤੇ 1.65 ਕਰੋੜ ਰੁਪਏ ਕਮਿਸ਼ਨ ਮਿਲੀ ਸੀ। ਮੁਕੇਸ਼ ਅੰਬਾਨੀ ਦੇ ਚਚੇਰੇ ਭਰਾਵਾਂ ਨਿਖਿਲ ਤੇ ਹਿਤਲ ਮੇਸਵਾਨੀ ਦੀ ਤਨਖ਼ਾਹ 24 ਕਰੋੜ ਰੁਪਏ ਹੈ ਪਰ ਇਸ ਵਾਰ ਇਸ ਵਿੱਚ 17.28 ਕਰੋੜ ਰੁਪਏ ਦੀ ਕਮਿਸ਼ਨ ਵੀ ਸ਼ਾਮਲ ਹੈ।

ਨੀਤਾ ਅੰਬਾਨੀ ਤੋਂ ਇਲਾਵਾ ਹੋਰ ਗ਼ੈਰ-ਕਾਰਜਕਾਰੀ ਨਿਰਦੇਸ਼ਕਾਂ 'ਚ ਦੀਪਕ ਸੀ ਜੈਨ, ਰਘੂਨਾਥ ਏ ਮਾਸ਼ੇਲਕਰ, ਆਦਿਲ ਜੈਨੁਲਭਾਈ, ਰਮਿੰਦਰ ਸਿੰਘ ਗੁਜਰਾਲ, ਸ਼ੁਮੀਤ ਬੈਨਰਜੀ, ਸਾਬਕਾ ਐਸਬੀਆਈ ਚੇਅਰਮੈਨ ਅਰੁੰਧਤੀ ਭੱਟਾਚਾਰੀਆ ਤੇ ਸਾਬਕਾ ਸੀਵੀਸੀ ਕੇਵੀ ਚੌਧਰੀ ਸ਼ਾਮਲ ਹਨ। ਸਾਰੇ ਸੁਤੰਤਰ ਨਿਰਦੇਸ਼ਕਾਂ ਨੂੰ 2 ਕਰੋੜ ਰੁਪਏ ਦੀ ਕਮਿਸ਼ਨ ਮਿਲੀ ਹੈ।

Posted By: Seema Anand