ਨਵੀਂ ਦਿੱਲੀ : ਵਿਆਹ ਦਾ ਸੀਜ਼ਨ (Wedding 2021) ਸ਼ੁਰੂ ਹੋ ਗਿਆ ਹੈ। ਜੇ ਤੁਸੀਂ ਸੋਨਾ ਤੇ ਚਾਂਦੀ (Gold-silver) ਖਰੀਦਣ ਦੀ ਯੋਜਨਾ ਬਣਾ ਰਹੇ ਹੋ, ਤਾਂ ਤੁਹਾਡੇ ਲਈ ਕੰਮ ਦੀ ਖ਼ਬਰ ਹੈ। ਇਕ ਹੀ ਦਿਨ ਵਿਚ ਸੋਨੇ ਦੀ ਕੀਮਤ ਵਿਚ 1,000 ਰੁਪਏ ਦੀ ਗਿਰਾਵਟ ਆਈ ਹੈ।

ਅਹਿਮਦਾਬਾਦ ਦੇ ਬਾਜ਼ਾਰ 'ਚ ਇਕ ਦਿਨ 'ਚ ਸੋਨੇ ਦੀ ਕੀਮਤ 'ਚ 1,000 ਰੁਪਏ ਦੀ ਗਿਰਾਵਟ ਦਰਜ ਕੀਤੀ ਗਈ ਹੈ। ਅਹਿਮਦਾਬਾਦ 'ਚ ਪੀਲੀ ਧਾਤੂ ਦੀ ਕੀਮਤ ਮੰਗਲਵਾਰ ਨੂੰ 50,500 ਰੁਪਏ ਤੋਂ ਘੱਟ ਕੇ 49,500 ਰੁਪਏ ਪ੍ਰਤੀ 10 ਗ੍ਰਾਮ 'ਤੇ ਬੰਦ ਹੋਈ। ਗਲੋਬਲ ਸੰਕੇਤਾਂ ਕਾਰਨ ਸੋਨੇ ਦੀਆਂ ਕੀਮਤਾਂ 'ਚ ਗਿਰਾਵਟ ਦਾ ਰੁਖ਼ ਦੇਖਿਆ ਗਿਆ।

ਵਿਸ਼ਵ ਗੋਲਡ ਕੌਂਸਲ ਅਨੁਸਾਰ ਸੋਨੇ ਦੀਆਂ ਕੀਮਤਾਂ 1,805 ਡਾਲਰ ਪ੍ਰਤੀ ਔਂਸ ਤੱਕ ਪਹੁੰਚ ਗਈਆਂ। ਇੰਡੀਆ ਸਰਾਫਾ ਐਂਡ ਜਿਊਲਰਜ਼ ਐਸੋਸੀਏਸ਼ਨ (IBJA) ਦੇ ਡਾਇਰੈਕਟਰ ਹਰੇਸ਼ ਆਚਾਰੀਆ ਨੇ ਕਿਹਾ, 'ਪਿਛਲੇ ਦੋ ਹਫਤਿਆਂ ਦੌਰਾਨ ਅੰਤਰਰਾਸ਼ਟਰੀ ਸੋਨੇ ਦੀਆਂ ਕੀਮਤਾਂ ਘੱਟ ਰਹੀਆਂ ਹਨ, ਕਿਉਂਕਿ ਡਾਲਰ ਵਿੱਚ ਤੇਜ਼ੀ ਆਈ ਅਤੇ ਅਮਰੀਕੀ ਬਾਂਡ ਬਿਹਤਰ ਰਹੇ ਹਨ।'

ਆਚਾਰੀਆ ਨੇ ਅੱਗੇ ਕਿਹਾ, 'ਇਹ ਫੈਡਰਲ ਰਿਜ਼ਰਵ ਦੇ ਚੇਅਰਮੈਨ ਜੇਰੋਮ ਪਾਵੇਲ ਲਈ ਦੂਜੇ ਕਾਰਜਕਾਲ ਲਈ ਅਮਰੀਕੀ ਰਾਸ਼ਟਰਪਤੀ ਦੇ ਸਮਰਥਨ ਤੋਂ ਬਾਅਦ ਹੋਇਆ।' ਜਿਊਲਰ ਕੀਮਤਾਂ ਵਿਚ ਕਟੌਤੀ 'ਤੇ ਖੁਸ਼ੀ ਮਨਾ ਰਹੇ ਹਨ ਕਿਉਂਕਿ ਇਸ ਨਾਲ ਸੋਨੇ ਦੇ ਗਹਿਣਿਆਂ ਦੀ ਵਿਕਰੀ ਦੀ ਗਤੀ ਵਧੇਗੀ। ਸ਼ਹਿਰ ਦੇ ਇਕ ਜਿਊਲਰ ਨੇ ਕਿਹਾ, 'ਵਿਆਹ ਦੇ ਚੱਲ ਰਹੇ ਸੀਜ਼ਨ ਕਾਰਨ ਸੋਨੇ ਦੇ ਗਹਿਣਿਆਂ ਦੇ ਨਾਲ-ਨਾਲ ਸਰਾਫਾ ਦੀ ਮੰਗ ਚੰਗੀ ਹੈ। 'ਕੀਮਤਾਂ ਵਿੱਚ ਕਮੀ ਨਾਲ ਵਿਕਰੀ ਨੂੰ ਹੋਰ ਵਾਧਾ ਮਿਲੇਗਾ।'

ਵਰਲਡ ਗੋਲਡ ਕੌਂਸਲ ਦੀ ਰਿਪੋਰਟ ਅਨੁਸਾਰ ਇਸ ਸਮੇਂ ਭਾਰਤ ਕੋਲ 653 ਮੀਟ੍ਰਿਕ ਟਨ ਸੋਨਾ ਹੈ। ਇਸ ਦੇ ਨਾਲ, ਭਾਰਤ ਸਭ ਤੋਂ ਵੱਧ ਸੋਨੇ ਦੇ ਰਿਜ਼ਰਵ ਦੇ ਮਾਮਲੇ ਵਿੱਚ ਵਿਸ਼ਵ ਵਿੱਚ 9 ਵੇਂ ਸਥਾਨ 'ਤੇ ਹੈ।

Posted By: Rajnish Kaur